Safaniyaah 3
yarooshalam ka anjaam
1us sarkash, naapaak aur zaalim shaher par afsos jo yarooshalam kahelaata hai. 2na vah sunta, na tarbiyat qabool karta hai. na vah rabb par bharosa rakhta, na apnay khuda kay qareeb aata hai. 3jo buzurg us kay beech men hain vah dahaadatay huay sherbabar hain. us kay qaazee shaam kay vaqt bhookay phirnay vaalay bhedeeay hain jo tuloo-ay-subah tak shikaar kee ek haddee tak naheen chhodtay. 4us kay nabee gustaakh aur ghaddaar hain. us kay imaam maqdis kee behuramtee aur shareeat say ziyaadtee kartay hain.
5lekin rabb bhee shaher kay beech men hai, aur vah raast hai, vah beinsaafee naheen karta. subah-ba-subah vah apna insaaf qaaim rakhta hai, ham kabhee us say maheroom naheen rahetay. lekin bedeen sharm say vaaqif hee naheen hota.
6rabb farmaata hai, “main nay qaumon ko nest-o-naabood kar diya hai. un kay qilaay tabaah, un kee galiyaan sunsaan hain. ab un men say koee naheen guzarta. un kay shaher itnay barbaad hain ki koee bhee un men naheen raheta. 7main bola, ‘beshak yarooshalam mera khauf maan kar meree tarbiyat qabool karega. kyoonki kya zaroorat hai ki us kee rihaaishgaah mit jaaay aur meree tamaam sazaaen us par naazil ho jaaen.’ lekin us kay baashinday mazeed josh kay saath apnee buree harkaton men lag gaay.” 8chunaanchay rabb farmaata hai, “ab meray intizaar men raho, us din kay intizaar men jab main shikaar karnay kay liyay uthoongaa [a] ek aur mumkina tarjuma : gavaahee denay kay liyay. . kyoonki main nay aqvaam ko jama karnay ka faisla kiya hai. main mamaalik ko ikattha karkay un par apna ghazab naazil karoonga. tab vah meray sakht qaher ka nishaana ban jaaengay, pooree duniya meree ghairat kee aag say bhasm ho jaaegee.
israaeel kay liyay naee ummeed
9lekin is kay baad main aqvaam kay honton ko paak-saaf karoonga taaki vah aainda rabb ka naam lay kar ibaadat karen, ki vah shaana-ba-shaana khadee ho kar meree khidmat karen. 10us vaqt meray parastaar, meree muntashir huee qaum ethopiya kay daryaaon kay paar say bhee a kar mujhay qurbaaniyaan pesh karegee.
11ai siyyoon betee, us din tujhay sharmasaar naheen hona padega haalaanki too nay mujh say bevafa ho kar nihaayat buray kaam kiay hain. kyoonki main teray darmiyaan say teray mutakabbir shekheebaazon ko nikaaloonga. aainda too meray muqaddas pahaad par maghroor naheen hogee. 12main tujh men sirf qaum kay ghareebon aur zarooratmandon ko chhodoonga, un sab ko jo rabb kay naam men panaah lengay. 13israaeel ka yah bacha hua hissa na ghalat kaam karega, na jhoot bolega. un kee zabaan par fareb naheen hoga. tab vah bhedon kee tarah charaagaah men charengay aur aaraam karengay. unhen daraanay vaala koee naheen hoga.”
14ai siyyoon betee, khushee kay naaray laga! ai israaeel, khushee mana! ai yarooshalam betee, shaadmaan ho, pooray dil say shaadiyaana baja. 15kyoonki rabb nay teree saza mita kar teray dushman ko bhaga diya hai. rabb jo israaeel ka baadshaah hai teray darmiyaan hee hai. aainda tujhay kisee nuqsaan say darnay kee zaroorat naheen hogee.
16us din log yarooshalam say kahengay, “ai siyyoon, mat darna! hausla na haar, teray haath dheelay na hon. 17rabb tera khuda teray darmiyaan hai, tera pahelavaan tujhay najaat dega. vah shaadmaan ho kar teree khushee manaaega. us kee muhabbat teray qusoor ka zikr hee naheen karegee balki vah tujh say intihaaee khush ho kar shaadiyaana bajaayga.”
18rabb farmaata hai, “main eed ko tark karnay vaalon ko tujh say door kar doonga, kyoonki vah teree rusvaaee ka baais thay. 19main un say bhee nipat loonga jo tujhay kuchal rahay hain. jo langadaata hai usay main bachaaoonga, jo muntashir hain unhen jama karoonga. jis mulk men bhee un kee rusvaaee huee vahaan main un kee taareef aur ehatiraam karaaoonga. 20us vaqt main tumhen jama karkay vatan men vaapas laaoonga. main tumhaaray dekhtay dekhtay tumhen bahaal karoonga aur duniya kee tamaam aqvaam men tumhaaree taareef aur ehatiraam karaaoonga.” yah rabb ka farmaan hai.