Safaniyaah 2
hosh men aao!
1ai behaya qaum, jama ho kar haaziree kay liyay khadee ho ja, 2is say pahelay ki muqarrara din a kar tujhay bhoosay kee tarah uda lay jaaay. aisa na ho ki tum rabb kay sakht ghussay ka nishaana ban jaao, ki rabb ka ghazabnaak din tum par naazil ho jaaay.
3ai mulk kay tamaam farotno, ai us kay ahkaam par amal karnay vaalo, rabb ko talaash karo! raastbaazee kay taalib ho, haleemee dhoondo. shaayad tum us din rabb kay ghazab say bach jaao [a] lafzee tarjuma : chhupay rah sako. .
israaeel kay dushmanon ka anjaam
4ghazza ko chhod diya jaaega, asqaloon veeraan-o-sunsaan ho jaaega. dopaher kay vaqt hee ashdood kay baashindon ko nikaala jaaega, aqroon ko jad say ukhaada jaaega. 5kretay say aaee huee qaum par afsos jo saahilee ilaaqay men rahetee hai. kyoonki rabb tumhaaray baaray men farmaata hai, “ai filistiyon kee sarzameen, ai mulk-ay-kan’aan, main tujhay tabaah karoonga, ek bhee baaqee naheen rahega.” 6tab yah saahilee ilaaqa charaanay kay liyay istemaal hoga, aur charvaahay us men apnee bhed-bakriyon kay liyay baaday bana lengay. 7mulk yahoodaah kay gharaanay kay bachay huon kay qabzay men aaega, aur vahee vahaan charengay, vahee shaam kay vaqt asqaloon kay gharon men aaraam karengay. kyoonki rabb un ka khuda un kee dekh-bhaal karega, vahee unhen bahaal karega.
8“main nay moaabiyon kee laan-taan aur ammoniyon kee ihaanat par ghaur kiya hai. unhon nay meree qaum kee rusvaaee aur us kay mulk kay khilaaf badee badee baaten kee hain.” 9is liyay rabb-ul-afwaaj jo israaeel ka khuda hai farmaata hai, “meree hayaat kee qasam, moaab aur ammon kay ilaaqay sadoom aur amoora kee maanind ban jaaengay. un men khudrau pauday aur namak kay gadhay hee paaay jaaengay, aur vah abad tak veeraan-o-sunsaan rahengay. tab meree qaum ka bacha hua hissa unhen loot kar un kee zameen par qabza kar lega.”
10yahee un kay takabbur ka ajr hoga. kyoonki unhon nay rabb-ul-afwaaj kee qaum ko laan-taan karkay qaum kay khilaaf badee badee baaten kee hain. 11jab rabb mulk kay tamaam devtaaon ko tabaah karega to un kay rongtay khaday ho jaaengay. tamaam saahilee ilaaqon kee aqvaam us kay saamnay jhuk jaaengee, har ek apnay apnay maqaam par usay sijda karega.
12rabb farmaata hai, “ai ethopiya kay baashindo, meree talvaar tumhen bhee maar daalegee.”
13vah apna haath shimaal kee taraf bhee badha kar asoor ko tabaah karega. neenva veeraan-o-sunsaan ho kar registaan jaisa khushk ho jaaega. 14shaher kay beech men revad aur deegar kaee qism kay jaanvar aaraam karengay. dashtee ulloo aur khaarapusht us kay tootay-phootay satoonon men basera karengay, aur janglee jaanvaron kee cheekhen khidkiyon men say goonjengee. gharon kee daheleezen malbay kay dheron men chhupee rahengee jabki un kee deodaar kee lakdee har guzarnay vaalay ko dikhaaee degee. 15yahee us khushbaash shaher ka anjaam hoga jo pahelay itnee hifaazat say basta tha aur jo dil men kaheta tha, “main hee hoon, meray siva koee aur hai hee naheen.” aainda vah registaan hoga, aisee jagah jahaan jaanvar hee aaraam karengay. har musaafir “tauba tauba” kah kar vahaan say guzrega.