Safaniyaah 1

¹zail men rabb ka vah kalaam qalamband hai jo safaniyaah bin kooshee bin jidaliyaah bin amariyaah bin hizaqiyaah par naazil hua. us vaqt yoosiyaah bin amoon yahoodaah ka baadshaah tha.

²rabb farmaata hai, “main roo-ay-zameen par say sab kuchh mita daaloonga, ³insaan-o-haivaan, parindon, machhliyon, thokar khilaanay vaalee cheezon aur bedeenon ko. tab zameen par insaan ka naam-o-nishaan tak naheen rahega.” yah rabb ka farmaan hai.

⁴“yahoodaah aur yarooshalam kay tamaam baashindon par meree saza naazil hogee. baal devta kee jitnee bhee butparastee ab tak rah gaee hai usay nest-o-naabood kar doonga. na butparast pujaariyon ka naam-o-nishaan rahega, ⁵na un ka jo chhaton par sooraj, chaand balki aasmaan kay pooray lashkar ko sijda kartay hain, jo rabb kee qasam khaanay kay saath saath milkoom devta kee bhee qasam khaatay hain. ⁶jo rabb kee pairvee chhod kar na usay talaash kartay, na us kee marzee darayaaft kartay hain vah sab kay sab tabaah ho jaaengay.

⁷ab rabb qaadir-ay-mutlaq kay saamnay khaamosh ho jaao, kyoonki rabb ka din qareeb hee hai. rabb nay is kay liyay zabah kee qurbaanee tayyaar karkay apnay mehamaanon ko makhsoos-o-muqaddas kar diya hai.” ⁸rabb farmaata hai, “jis din main yah qurbaanee chadhaaoonga us din buzurgon, shahezaadon aur ajnabee libaas pahennay vaalon ko saza doonga. ⁹us din main un par saza naazil karoonga jo tavahhumaparastee kay baais daheleez par qadam rakhnay say gurez kartay hain, jo apnay maalik kay ghar ko zulm aur fareb say bhar detay hain.”

¹⁰rabb farmaata hai, “us din machhlee kay darvaazay say zor kee cheekhen, naay shaher say aah-o-zaaree aur pahaadiyon say kadaktee aavaazen sunaaee dengee. ¹¹ai maktees muhallay kay baashindo, vaavaila karo, kyoonki tumhaaray tamaam taajir halaak ho jaaengay. vahaan kay jitnay bhee saudaagar chaandee toltay hain vah nest-o-naabood ho jaaengay.

¹²tab main charaagh lay kar yarooshalam kay konay konay men un ka khoj lagaaoonga jo is vaqt baday aaraam say baithay hain, khwaah haalaat kitnay buray kyoon na hon. main un say nipat loonga jo sochtay hain, ‘rabb kuchh naheen karega, na achchha kaam aur na bura.’ ¹³aisay logon ka maal loot liya jaaega, un kay ghar mismaar ho jaaengay. vah naay makaan taameer to karengay lekin un men rahengay naheen, angoor kay baagh lagaaengay lekin un kee mai piengay naheen.”

¹⁴rabb ka azeem din qareeb hee hai, vah badee tezee say ham par naazil ho raha hai. suno! vah din talkh hoga. haalaat aisay hongay ki bahaadur faujee bhee cheekh kar madad kay liyay pukaarengay. ¹⁵rabb ka poora ghazab naazil hoga, aur log pareshaanee aur museebat men mubtala rahengay. har taraf tabaahee-o-barbaadee, har taraf andhera hee andhera, har taraf ghanay baadal chhaaay rahengay. ¹⁶us din dushman narsinga phoonk kar aur jang kay naaray laga kar qil’aaband shaheron aur burjon par toot padega. ¹⁷rabb farmaata hai, “choonki logon nay mera gunaah kiya hai is liyay main un ko badee museebat men uljha doonga. vah andhon kee tarah tatol tatol kar idhar udhar phirengay, un ka khoon khaak kee tarah giraaya jaaega aur un kee naashen gobar kee tarah zameen par phainkee jaaengee.” ¹⁸jab rabb ka ghazab naazil hoga to na un ka sona, na chaandee unhen bacha sakegee. us kee ghairat pooray mulk ko aag kee tarah bhasm kar degee. vah mulk kay tamaam baashindon ko halaak karega, haan un ka anjaam haulnaak hoga.