Zakariyaah 8
ek naya aaghaaz
1ek baar phir rabb-ul-afwaaj ka kalaam mujh par naazil hua, 2“rabb-ul-afwaaj farmaata hai ki main badee ghairat say siyyoon kay liyay lad raha hoon, baday ghussay men us kay liyay jidd-o-jahd kar raha hoon. 3rabb farmaata hai ki main siyyoon kay paas vaapas aaoonga, dubaara yarooshalam kay beech men sukoonat karoonga. tab yarooshalam ‘vafaadaaree ka shaher’ aur rabb-ul-afwaaj ka pahaad ‘koh-ay-muqaddas’ kahelaaega. 4kyoonki rabb-ul-afwaaj farmaata hai, ‘buzurg mard-o-khavaateen dubaara yarooshalam kay chaukon men baithengay, aur har ek itna umrraseeda hoga ki usay chhadee ka sahaara lena padega. 5saath saath chauk khel-kood men masroof ladkon-ladkiyon say bharay rahengay.’
6rabb-ul-afwaaj farmaata hai, ‘shaayad yah us vaqt bachay huay israaeeliyon ko naamumkin lagay. lekin kya aisa kaam meray liyay jo rabb-ul-afwaaj hoon naamumkin hai? hargiz naheen!’ 7rabb-ul-afwaaj farmaata hai, ‘main apnee qaum ko mashriq aur maghrib kay mamaalik say bacha kar 8vaapas laaoonga, aur vah yarooshalam men basengay. vahaan vah meree qaum hongay aur main vafaadaaree aur insaaf kay saath un ka khuda hoonga.’
9rabb-ul-afwaaj farmaata hai, ‘hausla rakh kar taameeree kaam takmeel tak pahunchaao! aaj bhee tum un baaton par etimaad kar saktay ho jo nabiyon nay rabb-ul-afwaaj kay ghar kee bunyaad daaltay vaqt sunaaee theen. 10yaad rahay ki us vaqt say pahelay na insaan aur na haivaan ko mehanat kee mazdooree miltee thee. aanay jaanay vaalay kaheen bhee dushman kay hamlon say mahfooz naheen thay, kyoonki main nay har aadmee ko us kay hamsaay ka dushman bana diya tha.’ 11lekin rabb-ul-afwaaj farmaata hai, ‘ab say main tum say jo bachay huay ho aisa sulook naheen karoonga. 12log salaamatee say beej boengay, angoor kee bel vaqt par apna phal laaegee, kheton men faslen pakengee aur aasmaan os padnay dega. yah tamaam cheezen main yahoodaah kay bachay huon ko meeraas men doonga. 13ai yahoodaah aur israaeel, pahelay tum deegar aqvaam men laanat ka nishaana ban gaay thay, lekin ab jab main tumhen riha karoonga to tum barkat ka baais hogay. daro mat! hausla rakho!’
14rabb-ul-afwaaj farmaata hai, ‘pahelay jab tumhaaray baapdaada nay mujhay taish dilaaya to main nay tum par aafat laanay ka musammam iraada kar liya tha aur kabhee na pachhtaaya. 15lekin ab main yarooshalam aur yahoodaah ko barkat dena chaahata hoon. is men mera iraada utna hee pakka hai jitna pahelay tumhen nuqsaan pahunchaanay men pakka tha. chunaanchay daro mat! 16lekin in baaton par dhyaan do, ek doosray say sachch baat karo, adaalat men sachchaaee aur salaamatee par mabnee faislay karo, 17apnay padosee kay khilaaf buray mansoobay mat baandho aur jhootee qasam khaanay kay shauq say baaz aao. in tamaam cheezon say main nafrat karta hoon.’ yah rabb ka farmaan hai.”
18ek baar phir rabb-ul-afwaaj ka kalaam mujh par naazil hua, 19“rabb-ul-afwaaj farmaata hai ki aaj tak yahoodaah kay log chauthay, paanchven, saatven aur dasven maheenay men roza rakh kar maatam kartay aaay hain. lekin ab say yah auqaat khushee-o-shaadmaanee kay mauqay hongay jin par jashn manaaogay. lekin sachchaaee aur salaamatee ko piyaar karo!
20rabb-ul-afwaaj farmaata hai ki aisa vaqt aaega jab deegar aqvaam aur mut’addid shaheron kay log yahaan aaengay. 21ek shaher kay baashinday doosray shaher men ja kar kahengay, ‘aao, ham yarooshalam ja kar rabb say iltimaas karen, rabb-ul-afwaaj kee marzee darayaaft karen. ham bhee jaaengay.’ 22haan, mut’addid aqvaam aur taaqatvar ummaten yarooshalam aaengee taaki rabb-ul-afwaaj kee marzee maaloom karen aur us say iltimaas karen.
23rabb-ul-afwaaj farmaata hai ki un dinon men mukhtalif aqvaam aur ahel-ay-zabaan kay das aadmee ek yahoodee kay daaman ko pakad kar kahengay, ‘hamen apnay saath chalnay den, kyoonki ham nay suna hai ki allaah aap kay saath hai’.”