Zakariyaah 7
tum meree sunnay say inkaar kartay ho
1daara baadshaah kee hukoomat kay chauthay saal men rabb zakariyaah say hamkalaam hua. kislev yaanee navven maheenay ka chautha din [a] 4 disambar. tha. 2us vaqt bait-el shaher nay saraazar aur rajam-malik ko us kay aadmiyon samet yarooshalam bheja tha taaki rabb say iltimaas karen. 3saath saath unhen rabb-ul-afwaaj kay ghar kay imaamon ko yah savaal pesh karna tha, “ab ham kaee saal say paanchven maheenay men roza rakh kar rabb kay ghar kee tabaahee par maatam kartay aaay hain. kya laazim hai ki ham yah dastoor aainda bhee jaaree rakhen?”
4tab mujhay rabb-ul-afwaaj say javaab mila, 5“mulk kay tamaam baashindon aur imaamon say kah, ‘beshak tum 70 saal say paanchven aur saatven maheenay men roza rakh kar maatam kartay aaay ho. lekin kya tum nay yah dastoor vaaqaee meree khaatir ada kiya? hargiz naheen! 6eedon par bhee tum khaatay-peetay vaqt sirf apnee hee khaatir khushee manaatay ho. 7yah vahee baat hai jo main nay maazee men bhee nabiyon kee maarifat tumhen bataaee, us vaqt jab yarooshalam men aabaadee aur sukoon tha, jab gird-o-navaah kay shaher dasht-ay-najab aur maghrib kay nishebee pahaadee ilaaqay tak aabaad thay’.”
8is naatay say zakariyaah par rabb ka ek aur kalaam naazil hua, 9“rabb-ul-afwaaj farmaata hai, ‘adaalat men munsifaana faislay karo, ek doosray par meharbaanee aur rahem karo! 10bevaaon, yateemon, ajnabiyon aur ghareebon par zulm mat karna. apnay dil men ek doosray kay khilaaf buray mansoobay na baandho.’ 11jab tumhaaray baapdaada nay yah kuchh suna to vah is par dhyaan denay kay liyay tayyaar naheen thay balki akad gaay. unhon nay apna munh doosree taraf pher kar apnay kaanon ko band kiay rakha. 12unhon nay apnay dilon ko heeray kee tarah sakht kar liya taaki shareeat aur vah baaten un par asar’andaaz na ho saken jo rabb-ul-afwaaj nay apnay rooh kay vaseelay say guzashta nabiyon ko bataanay ko kaha tha. tab rabb-ul-afwaaj ka shadeed ghazab un par naazil hua. 13vah farmaata hai, ‘choonki unhon nay meree na sunee is liyay main nay faisla kiya ki jab vah madad kay liyay mujh say iltija karen to main bhee un kee naheen sunoonga. 14main nay unhen aandhee say uda kar tamaam deegar aqvaam men muntashir kar diya, aisee qaumon men jin say vah naavaaqif thay. un kay jaanay par vatan itna veeraan-o-sunsaan hua ki koee na raha jo us men aaay ya vahaan say jaaay. yoon unhon nay us khushgavaar mulk ko tabaah kar diya’.”