Zakariyaah 6
chaar rath
1main nay phir apnee nigaah uthaaee to kya dekhta hoon ki chaar rath peetal kay do pahaadon kay beech men say nikal rahay hain. 2pahelay rath kay ghoday surkh, doosray kay siyaah, 3teesray kay safed aur chauthay kay dhabbedaar thay. sab taaqatvar thay.
4jo farishta mujh say baat kar raha tha us say main nay savaal kiya, “meray aaqa, in ka kya matlab hai?” 5us nay javaab diya, “yah aasmaan kee chaar roohen [a] ya havaaen. hain. pahelay yah pooree duniya kay maalik kay huzoor khadee theen, lekin ab vahaan say nikal rahee hain. 6siyaah ghodon ka rath shimaalee mulk kee taraf ja raha hai, safed ghodon ka maghrib kee taraf, aur dhabbedaar ghodon ka junoob kee taraf.”
7yah taaqatvar ghoday badee betaabee say is intizaar men thay ki duniya kee gasht karen. phir us nay hukm diya, “chalo, duniya kee gasht karo.” vah fauran nikal kar duniya kee gasht karnay lagay. 8farishtay nay mujhay aavaaz day kar kaha, “un ghodon par khaas dhyaan do jo shimaalee mulk kee taraf badh rahay hain. yah us mulk par mera ghussa utaarengay.”
israaeel ka aanay vaala baadshaah
9rabb ka kalaam mujh par naazil hua, 10“aaj hee yoosiyaah bin safaniyaah kay ghar men ja! vahaan teree mulaaqaat baabal men jilaavatan kiay huay israaeeliyon khaldee, toobiyaah aur yadaayaah say hogee jo is vaqt vahaan pahunch chukay hain. jo hadiay vah apnay saath laaay hain unhen qabool kar. 11un kee yah sona-chaandee lay kar taaj bana lay, phir taaj ko imaam-ay-aazam yashooa bin yahoosadaq kay sar par rakh kar 12usay bata, ‘rab-ul-afwaaj farmaata hai ki ek aadmee aanay vaala hai jis ka naam kompal hai. us kay saay men bahut komplen phoot nikalengee, aur vah rabb ka ghar taameer karega. 13haan, vahee rabb ka ghar banaaega aur shaan-o-shaukat kay saath takht par baith kar hukoomat karega. vah imaam kee haisiyat say bhee takht par baithega, aur donon uhdon men ittifaaq aur salaamatee hogee.’ 14taaj ko heelam, toobiyaah, yadaayaah aur hen bin safaniyaah kee yaad men rabb kay ghar men mahfooz rakha jaaay. 15log doordaraaz ilaaqon say a kar rabb ka ghar taameer karnay men madad karengay.”
tab tum jaan logay ki rabb-ul-afwaaj nay mujhay tumhaaray paas bheja hai. agar tum dhyaan say rabb apnay khuda kee suno to yah sab kuchh poora ho jaaega.