Zakariyaah 5

chhatee roya : udnay vaala toomaar

¹main nay ek baar phir apnee nazar uthaaee to ek udta hua toomaar dekha. ²farishtay nay poochha, “tujhay kya nazar aata hai?” main nay javaab diya, “ek udta hua toomaar jo 30 fut lamba aur 15 fut chauda hai.” ³vah bola, “is say muraad ek laanat hai jo pooray mulk par bhejee jaaegee. is toomaar kay ek taraf likha hai ki har chor ko mita diya jaaega aur doosree taraf yah ki jhootee qasam khaanay vaalay ko nest kiya jaaega. ⁴rabb-ul-afwaaj farmaata hai, ‘main yah bhejoonga to chor aur meray naam kee jhootee qasam khaanay vaalay kay ghar men laanat daakhil hogee aur us kay beech men rah kar usay lakdee aur patthar samet tabaah kar degee’.”

saatveen roya : tokree men aurat

⁵jo farishta mujh say baat kar raha tha us nay a kar mujh say kaha, “apnee nigaah utha kar vah dekh jo nikal kar a raha hai.” ⁶main nay poochha, “yah kya hai?” us nay javaab diya, “yah anaaj kee paimaaish karnay kee tokree hai. yah pooray mulk men nazar aatee hai.” ⁷tokree par seesay ka dhakna tha. ab vah khul gaya, aur tokree men baithee huee ek aurat dikhaaee dee. ⁸farishta bola, “is aurat say muraad bedeenee hai.” us nay aurat ko dhakka day kar tokree men vaapas kar diya aur seesay ka dhakna zor say band kar diya.

⁹main nay dubaara apnee nazar uthaaee to do aurton ko dekha. un kay laqlaq kay say par thay, aur udtay vaqt hava un kay saath thee. tokree kay paas pahunch kar vah usay utha kar aasmaan-o-zameen kay darmiyaan lay gaeen. ¹⁰jo farishta mujh say guftagu kar raha tha us say main nay poochha, “aurten tokree ko kidhar lay ja rahee hain?” ¹¹us nay javaab diya, “mulk-ay-baabal men. vahaan vah us kay liyay ghar bana dengee. jab ghar tayyaar hoga to tokree vahaan us kee apnee jagah par rakhee jaaegee.”