Zakariyaah 4

paanchveen roya : sonay ka shamaadaan aur zaitoon kay darakht

¹jis farishtay nay mujh say baat kee thee vah ab meray paas vaapas aaya. us nay mujhay yoon jaga diya jis tarah gaheree neend sonay vaalay ko jagaaya jaata hai. ²us nay poochha, “tujhay kya nazar aata hai?” main nay javaab diya, “khaalis sonay ka shamaadaan jis par tel ka piyaala aur saat charaagh hain. har charaagh kay saat munh hain. ³zaitoon kay do darakht bhee dikhaaee detay hain. ek darakht tel kay piyaalay kay daaeen taraf aur doosra us kay baaeen taraf hai. ⁴lekin meray aaqa, in cheezon ka matlab kya hai?”

⁵farishta bola, “kya yah tujhay maaloom naheen?” main nay javaab diya, “naheen, meray aaqa.”

⁶farishtay nay mujh say kaha, “zarubbaabal kay liyay rabb ka yah paighaam hai,

‘rab-ul-afwaaj farmaata hai ki too na apnee taaqat, na apnee quvvat say balki meray rooh say hee kaamyaab hoga.’ ⁷kya raastay men bada pahaad haail hai? zarubbaabal kay saamnay vah hamvaar maidaan ban jaaega. aur jab zarubbaabal rabb kay ghar ka aakhiree patthar lagaaega to haazireen pukaar uthengay, ‘mubaarak ho! mubaarak ho’!”

⁸rabb ka kalaam ek baar phir mujh par naazil hua, ⁹“zarubbaabal kay haathon nay is ghar kee bunyaad daalee, aur usee kay haath usay takmeel tak pahunchaaengay. tab too jaan lega ki rabb-ul-afwaaj nay mujhay tumhaaray paas bheja hai. ¹⁰go taameer kay aaghaaz men bahut kam nazar aata hai to bhee us par hiqaarat kee nigaah na daalo. kyoonki log khushee manaaengay jab zarubbaabal kay haath men saahool dekhengay. (mazkoora saat charaagh rabb kee aankhen hain jo pooree duniya kee gasht lagaatee rahetee hain).”

¹¹main nay mazeed poochha, “shamaadaan kay daaen baaen kay zaitoon kay do darakhton say kya muraad hai? ¹²yahaan sonay kay do paaip bhee nazar aatay hain jin say zaitoon ka sunahera tel bah nikalta hai. zaitoon kee jo do taheniyaan un kay saath hain un ka matlab kya hai?”

¹³farishtay nay kaha, “kya too yah naheen jaanta?” main bola, “naheen, meray aaqa.” ¹⁴tab us nay farmaaya, “yah vah do masah kiay huay aadmee hain jo pooree duniya kay maalik kay huzoor khaday hotay hain.”