Zakariyaah 3

chauthee roya : imaam-ay-aazam yashooa

¹is kay baad rabb nay mujhay roya men imaam-ay-aazam yashooa ko dikhaaya. vah rabb kay farishtay kay saamnay khada tha, aur iblees us par ilzaam lagaanay kay liyay us kay daaen haath khada ho gaya tha. ²rabb nay iblees say farmaaya, “ai iblees, rabb tujhay malaamat karta hai! rabb jis nay yarooshalam ko chun liya vah tujhay daantta hai! yah aadmee to baal baal bach gaya hai, us lakdee kee tarah jo bhadaktee aag men say chheen lee gaee hai.”

³yashooa ganday kapday pahenay huay farishtay kay saamnay khada tha. ⁴jo afraad saath khaday thay unhen farishtay nay hukm diya, “us kay mailay kapday utaar do.” phir yashooa say mukhaatib hua, “dekh, main nay tera qusoor tujh say door kar diya hai, aur ab main tujhay shaandaar safed kapday pahena deta hoon.” ⁵main nay kaha, “vah us kay sar par paak-saaf pagdee baandhen!” chunaanchay unhon nay yashooa kay sar par paak-saaf pagdee baandh kar usay naay kapday pahenaaay. rabb ka farishta saath khada raha. ⁶yashooa say us nay badee sanjeedgee say kaha,

⁷“rabb-ul-afwaaj farmaata hai, ‘meree raahon par chal kar meray ahkaam par amal kar to too meray ghar kee raahanumaaee aur us kee baargaahon kee dekh-bhaal karega. phir main teray liyay yahaan aanay aur haazireen men khaday honay ka raasta qaaim rakhoonga.

⁸ai imaam-ay-aazam yashooa, sun! too aur teray saamnay baithay teray imaam bhaaee mil kar us vaqt kee taraf ishaara hain jab main apnay khaadim ko jo kompal kahelaata hai aanay doonga. ⁹dekho vah jauhar jo main nay yashooa kay saamnay rakha hai. us ek hee patthar par saat aankhen hain.’ rabb-ul-afwaaj farmaata hai, ‘main us par katba kanda karkay ek hee din men is mulk ka gunaah mita doonga. ¹⁰us din tum ek doosray ko apnee angoor kee bel aur apnay anjeer kay darakht kay saay men baithnay kee daavat dogay.’ yah rabb-ul-afwaaj ka farmaan hai.”