Zakariyaah 2
teesree roya : aadmee yarooshalam kee paimaaish karta hai
1main nay apnee nazar dubaara uthaaee to ek aadmee ko dekha jis kay haath men feeta tha. 2main nay poochha, “aap kahaan ja rahay hain?” us nay javaab diya, “yarooshalam kee paimaaish karnay ja raha hoon. main maaloom karna chaahata hoon ki shaher kee lambaaee aur chaudaaee kitnee honee chaahiay.” 3tab vah farishta ravaana hua jo ab tak mujh say baat kar raha tha. lekin raastay men ek aur farishta us say milnay aaya. 4is doosray farishtay nay kaha, “bhaag kar paimaaish karnay vaalay naujavaan ko bata day, ‘insaan-o-haivaan kee itnee badee taadaad hogee ki aainda yarooshalam kee faseel naheen hogee. 5rabb farmaata hai ki us vaqt main aag kee chaardeevaaree ban kar us kee hifaazat karoonga, main us kay darmiyaan rah kar us kee izzat-o-jalaal ka baais hoonga’.”
6rabb farmaata hai, “utho, utho! shimaalee mulk say bhaag aao. kyoonki main nay khud tumhen chaaron taraf muntashir kar diya tha. 7lekin ab main farmaata hoon ki vahaan say nikal aao. siyyoon kay jitnay log baabal [a] lafzee tarjuma : baabal betee. men rahetay hain vahaan say bach niklen!” 8kyoonki rabb-ul-afwaaj jis nay mujhay bheja vah un qaumon kay baaray men jinhon nay tumhen loot liya farmaata hai, “jo tumhen chheday vah meree aankh kee putlee ko chhedega. 9is liyay yaqeen karo ki main apna haath un kay khilaaf uthaaoonga. un kay apnay ghulaam unhen loot lengay.”
tab tum jaan logay ki rabb-ul-afwaaj nay mujhay bheja hai. 10rabb farmaata hai, “ai siyyoon betee, khushee kay naaray laga! kyoonki main a raha hoon, main teray darmiyaan sukoonat karoonga. 11us din bahut see aqvaam meray saath paivast ho kar meree qaum ka hissa ban jaaengee. main khud teray darmiyaan sukoonat karoonga.”
tab too jaan legee ki rabb-ul-afwaaj nay mujhay teray paas bheja hai.
12muqaddas mulk men yahoodaah rabb kee mauroosee zameen banega, aur vah yarooshalam ko dubaara chun lega. 13tamaam insaan rabb kay saamnay khaamosh ho jaaen, kyoonki vah uth kar apnee muqaddas sukoonatgaah say nikal aaya hai.