Zakariyaah 13

butparastee aur jhootee nubuvvat ka khaatmaa

¹us din daaood kay gharaanay aur yarooshalam kay baashindon kay liyay chashma khola jaaega jis kay zareeay vah apnay gunaahon aur naapaakee ko door kar sakengay.”

²rabb-ul-afwaaj farmaata hai, “us din main tamaam buton ko mulk men say mita doonga. un ka naam-o-nishaan tak naheen rahega, aur vah kisee ko yaad naheen rahengay.

nabiyon aur naapaakee kee rooh ko bhee main mulk say door karoonga. ³is kay baad agar koee nubuvvat karay to us kay apnay maan-baap us say kahengay, ‘too zinda naheen rah sakta, kyoonki too nay rabb ka naam lay kar jhoot bola hai.’ jab vah peshgoiyaan sunaaega to us kay apnay vaalidain usay chhed daalengay. ⁴us vaqt har nabee ko apnee roya par sharm aaegee jab nubuvvat karega. vah nabee ka baalon say bana libaas naheen pahenega taaki fareb de ⁵balki kahega, ‘main nabee naheen balki kaashtakaar hoon. javaanee say hee mera pesha kheteebaadee raha hai.’ ⁶agar koee poochhay, ‘to phir teray seenay par zakhmon kay nishaan kis tarah lagay? to javaab dega, main apnay doston kay ghar men zakhmee hua’.”

logon kee jaanch-padtaal

⁷rabb-ul-afwaaj farmaata hai, “ai talvaar, jaag uth! meray gallaabaan par hamla kar, us par jo meray qareeb hai. gallaabaan ko maar daal taaki bhed-bakriyaan tittar-bittar ho jaaen. main khud apnay haath ko chhoton kay khilaaf uthaaoonga.” ⁸rabb farmaata hai, “pooray mulk men logon kay teen hisson men say do hisson ko mitaaya jaaega. do hissay halaak ho jaaengay aur sirf ek hee hissa bacha rahega. ⁹is bachay huay hissay ko main aag men daal kar chaandee ya sonay kee tarah paak-saaf karoonga. tab vah mera naam pukaarengay, aur main un kee sunoonga. main kahoonga, ‘yah meree qaum hai,’ aur vah kahengay, ‘rabb hamaara khuda hai’.”