Zakariyaah 10

rabb hee madad kar sakta hai

¹bahaar kay mausam men rabb say baarish maango. kyoonki vahee ghanay baadal banaata hai, vahee baarish barsa kar har ek ko khet kee hariyaalee muhayya karta hai. ²tumhaaray gharon kay but fareb detay, tumhaaray ghaibdaan jhootee roya dekhtay aur farebdih khwaab sunaatay hain. un kee tasallee abas hai. isee liyay qaum ko bhed-bakriyon kee tarah yahaan say chala jaana pada. gallaabaan naheen hai, is liyay vah museebat men uljhay rahetay hain.

rabb apnee qaum ko vaapas laaegaa

³rabb farmaata hai, “meree qaum kay gallaabaanon par mera ghazab bhadak utha hai, aur jo bakray us kee raahanumaaee kar rahay hain unhen main saza doonga. kyoonki rabb-ul-afwaaj apnay revad yahoodaah kay gharaanay kee dekh-bhaal karega, usay jangee ghoday jaisa shaandaar bana dega. ⁴yahoodaah say konay ka bunyaadee patthar, mekh, jang kee kamaan aur tamaam hukmaraan nikal aaengay. ⁵sab soormay kee maanind hongay jo ladtay vaqt dushman ko galee kay kachray men kuchal dengay. rabb-ul-afwaaj un kay saath hoga, is liyay vah lad kar ghaalib aaengay. mukhaalif ghudasavaaron kee badee rusvaaee hogee.

⁶main yahoodaah kay gharaanay ko taqviyat doonga, yoosuf kay gharaanay ko chhutkaara doonga, haan un par rahem karkay unhen dubaara vatan men basa doonga. tab un kee haalat say pata naheen chalega ki main nay kabhee unhen radd kiya tha. kyoonki main rabb un ka khuda hoon, main hee un kee sunoonga. ⁷ifraaeem kay afraad soormay say ban jaaengay, vah yoon khush ho jaaengay jis tarah dil mai peenay say khush ho jaata hai. un kay bachchay yah dekh kar baagh baagh ho jaaengay, un kay dil rabb kee khushee manaaengay.

⁸main seetee baja kar unhen jama karoonga, kyoonki main nay fidya day kar unhen aazaad kar diya hai. tab vah pahelay kee tarah beshumaar ho jaaengay. ⁹main unhen beej kee tarah mukhtalif qaumon men bo kar muntashir kar doonga, lekin doordaraaz ilaaqon men vah mujhay yaad karengay. aur ek din vah apnee aulaad samet bach kar vaapas aaengay. ¹⁰main unhen misr say vaapas laaoonga, asoor say ikattha karoonga. main unhen jiliaad aur lubnaan men laaoonga, to bhee un kay liyay jagah kaafee naheen hogee. ¹¹jab vah museebat kay samundar men say guzarengay to rabb maujon ko yoon maarega ki sab kuchh paanee kee gaheraaiyon tak khushk ho jaaega. asoor ka fakhar khaak men mil jaaega, aur misr ka shaahee asa door ho jaaega. ¹²main apnee qaum ko rabb men taqviyat doonga, aur vah us ka hee naam lay kar zindagee guzaarengay.” yah rabb ka farmaan hai.