Titus 3

maseehee kirdaar

¹unhen yaad dilaana ki vah hukmaraanon aur ikhtiyaar vaalon kay taabay aur faramaambardaar rahen. vah har nek kaam karnay kay liyay tayyaar rahen, ²kisee par tuhamat na lagaaen, amnapasand aur narmdil hon aur tamaam logon kay saath narmamizaajee say pesh aaen. ³kyoonki ek vaqt tha jab ham bhee naasamajh, naaframaan aur saheeh raah say bhatkay huay thay. us vaqt ham kaee tarah kee shahevaton aur ghalat khwaahishon kee ghulaamee men thay. ham buray kaamon aur hasad karnay men zindagee guzaartay thay. doosray ham say nafrat kartay thay aur ham bhee un say nafrat kartay thay. ⁴lekin jab hamaaray najaatadihanda allaah kee meharbaanee aur muhabbat zaahir huee ⁵to us nay hamen bachaaya. yah naheen ki ham nay raast kaam karnay kay baais najaat haasil kee balki us kay rahem hee nay hamen rooh-ul-quds kay vaseelay say bachaaya jis nay hamen dho kar naay siray say janm diya aur naee zindagee ata kee. ⁶allaah nay apnay is rooh ko badee fayyaazee say hamaaray najaatadihanda eesa maseeh kay vaseelay say ham par undel diyaa ⁷taaki hamen us kay fazl say raastbaaz qaraar diya jaaay aur ham us abdee zindagee kay vaaris ban jaaen jis kee ummeed ham rakhtay hain. ⁸is baat par poora etimaad kiya ja sakta hai.

main chaahata hoon ki aap in baaton par khaas zor den taaki jo allaah par eemaan laaay hain vah dhyaan say nek kaam karnay men lagay rahen. yah baaten sab kay liyay achchhee aur mufeed hain. ⁹lekin behooda bahson, nasabanaamon, jhagdon aur shareeat kay baaray men tanaazuon say baaz rahen, kyoonki aisa karna befaaida aur fuzool hai. ¹⁰jo shakhs paarteebaaz hai usay do baar samjhaaen. agar vah is kay baad bhee na maanay to usay rifaaqat say khaarij karen. ¹¹kyoonki aap ko pata hoga ki aisa shakhs ghalat raah par hai aur gunaah men phansa hua hota hai. us nay apnee harkaton say apnay aap ko mujrim thaheraaya hai. ¹²

aakhiree hidaayaat

jab main artimaas ya tukhikus ko aap kay paas bhej doonga to meray paas aanay men jaldee karen. main neekupulis shaher men hoon, kyoonki main nay faisla kar liya hai ki sardiyon ka mausam yahaan guzaaroon. ¹³jab zenaas vakeel aur apullos safar kee tayyaariyaan kar rahay hain to un kee madad karen. khayaal rakhen ki un kee har zaroorat pooree kee jaaay. ¹⁴laazim hai ki hamaaray log nek kaam karnay men lagay rahena seekhen, khaaskar jahaan bahut zaroorat hai, aisa na ho ki aakhirkaar vah bephal niklen. ¹⁵sab jo meray saath hain aap ko salaam kahetay hain. unhen mera salaam dena jo eemaan men ham say muhabbat rakhtay hain.

allaah ka fazl aap sab kay saath hota rahay.