Titus 1

¹yah khat paulus kee taraf say hai jo allaah ka khaadim aur eesa maseeh ka rasool hai.

mujhay chun kar bheja gaya taaki main eemaan laanay aur khudaataras zindagee kee sachchaaee jaan lenay men allaah kay chunay huay logon kee madad karoon. ²kyoonki us say unhen abdee zindagee kee ummeed dilaaee jaatee hai, aisee zindagee kee jis ka vaada allaah nay duniya kay zamaanon say peshtar hee kiya tha. aur vah jhoot naheen bolta. ³apnay muqarrara vaqt par allaah nay apnay kalaam ka elaan karkay usay zaahir kar diya. yahee elaan meray sapurd kiya gaya hai aur main isay hamaaray najaatadihanda allaah kay hukm kay mutaabiq sunaata hoon.

⁴main titus ko likh raha hoon jo hamaaray mushtaraka eemaan kay mutaabiq mera haqeeqee beta hai.

khuda baap aur hamaara najaatadihanda maseeh eesa aap ko fazl aur salaamatee ata karen.

kretay men titus kee khidmat

⁵main nay aap ko kretay men is liyay chhoda tha ki aap vah kamiyaan durust karen jo ab tak rah gaee theen. yah bhee ek maqsad tha ki aap har shaher kee jamaaat men buzurg muqarrar karen, jis tarah main nay aap ko kaha tha. ⁶buzurg beilzaam ho. us kee sirf ek beevee ho. us kay bachchay eemaandaar hon aur log un par ayyaash ya sarkash honay ka ilzaam na laga saken. ⁷nigraan ko to allaah ka gharaana sambhaalnay kee zimmaadaaree dee gaee hai, is liyay laazim hai ki vah beilzaam ho. vah khudsar, ghuseela, sharaabee, ladaaka ya laalchee na ho. ⁸is kay bajaay vah mehamaan-navaaz ho aur sab achchhee cheezon say piyaar karnay vaala ho. vah samajhdaar, raastbaaz aur muqaddas ho. vah apnay aap par qaaboo rakh sakay. ⁹vah us kalaam kay saath lipta rahay jo qaabil-ay-etimaad aur hamaaree taaleem kay mutaabiq hai. kyoonki is tarah hee vah sehatabakhsh taaleem day kar doosron kee hausalaaafzaaee kar sakega aur mukhaalafat karnay vaalon ko samjha bhee sakega.

¹⁰baat yah hai ki bahut say aisay log hain jo sarkash hain, jo fuzool baaten karkay doosron ko dhoka detay hain. yah baat khaaskar un par saadiq aatee hai jo yahoodiyon men say hain. ¹¹laazim hai ki unhen chup kara diya jaaay, kyoonki yah laalach men a kar kaee logon kay pooray ghar apnee ghalat taaleem say kharaab kar rahay hain. ¹²un kay apnay ek nabee nay kaha hai, “kretay kay baashinday hamesha jhoot bolnay vaalay, vaheshee jaanvar aur sust petoo hotay hain.” ¹³us kee yah gavaahee durust hai. is vajah say laazim hai ki aap unhen sakhtee say samjhaaen taaki un ka eemaan sehatmand rahe ¹⁴aur vah yahoodee farzee kahaaniyon ya un insaanon kay ahkaam par dhyaan na den jo sachchaaee say hat gaay hain. ¹⁵jo log paak-saaf hain un kay liyay sab kuchh paak hai. lekin jo naapaak aur eemaan say khaalee hain un kay liyay kuchh bhee paak naheen hota balki un ka zahen aur un ka zameer donon naapaak ho gaay hain. ¹⁶yah allaah ko jaannay ka daava to kartay hain, lekin un kee harkaten is baat ka inkaar kartee hain. yah ghinaunay, naaframaan aur koee bhee achchha kaam karnay kay qaabil naheen hain.