Ġazal-ul-Ġazlaat 6
1ai too jo aurton men sab say khoobsoorat hai, tera mahboob kidhar chala gaya hai? us nay kaun see simt ikhtiyaar kee taaki ham teray saath us ka khoj lagaaen?
2mera mahboob yahaan say utar kar apnay baagh men chala gaya hai, vah balsaan kee kyaariyon kay paas gaya hai taaki baaghon men charay aur sosan kay phool chunay.
3main apnay mahboob kee hee hoon, aur vah mera hee hai, vah jo sosnon men charta hai.
too kitnee khoobsoorat hai
4meree mahbooba, too tirza shaher jaisee haseen, yarooshalam jaisee khoobsoorat aur alamabardaar daston jaisee robdaar hai.
5apnee nazron ko mujh say hata lay, kyoonki vah mujh men uljhan paida kar rahee hain.
teray baal un bakriyon kee maanind hain jo uchhaltee koodtee koh-ay-jiliaad say utartee hain.
6teray daant abhee abhee nahelaaee huee bhedon jaisay safed hain. har daant ka judvaan hai, ek bhee gum naheen hua.
7niqaab kay peechhay teray gaalon kee jhalak anaar kay tukdon kee maanind dikhaaee detee hai.
8go baadshaah kee 60 beeviyaan, 80 daashtaaen aur beshumaar kunvaariyaan hon 9lekin meree kabootree, meree kaamil saathee laasaanee hai. vah apnee maan kee vaahid betee hai, jis nay usay janm diya us kee paak laadlee hai. betiyon nay usay dekh kar usay mubaarak kaha, raaniyon aur daashtaaon nay us kee taareef kee,
10“yah kaun hai jo tuloo-ay-subah kee tarah chamak uthee, jo chaand jaisee khoobsoorat, aaftaab jaisee paak aur alamabardaar daston jaisee robdaar hai?”
mahbooba kay liyay aarzoo
11main akhrot kay baagh men utar aaya taaki vaadee men phootnay vaalay paudon ka muaaina karoon. main yah bhee maaloom karna chaahata tha ki kya angoor kee komplen nikal aaee ya anaar kay phool lag gaay hain.
12lekin chaltay chaltay na jaanay kya hua, meree aarzoo nay mujhay meree shareef qaum kay rathon kay paas pahunchaaya.
mahbooba kee dilakshee
13ai shoolammeet, laut a, laut a! mud kar laut a taaki ham tujh par nazar karen.
tum shoolammeet ko kyoon dekhna chaahatee ho? ham lashkargaah ka loknaach dekhna chaahatee hain