Ġazal-ul-Ġazlaat 3

raat ko mahboob kee aarzoo

¹raat ko jab main bistar par letee thee to main nay usay dhoonda jo meree jaan ka piyaara hai, main nay usay dhoonda lekin na paaya.

²main bolee, “ab main uth kar shaher men ghoomtee, us kee galiyon aur chaukon men phir kar usay talaash kartee hoon jo meree jaan ka piyaara hai.” main dhoondtee rahee lekin vah na mila.

³jo chaukeedaar shaher men gasht kartay hain unhon nay mujhay dekha. main nay poochha, “kya aap nay usay dekha hai jo meree jaan ka piyaara hai?”

⁴aagay nikaltay hee mujhay vah mil gaya jo meree jaan ka piyaara hai. main nay usay pakad liya. ab main usay naheen chhodoongee jab tak usay apnee maan kay ghar men na lay jaaoon, us kay kamray men na pahunchaaoon jis nay mujhay janm diya tha.

⁵ai yarooshalam kee betiyo, ghazaalon aur khulay maidaan kee hirniyon kee qasam khaao ki jab tak muhabbat khud na chaahay tum usay na jagaaogee, na bedaar karogee.

doolha apnay logon kay saath aata hai

⁶yah kaun hai jo dhuen kay satoon kee tarah seedha hamaaray paas chala a raha hai? us say chaaron taraf mur, bakhoor aur taajir kee tamaam khooshbooen phail rahee hain.

⁷yah to sulemaan kee paalkee hai jo israaeel kay 60 pahelavaanon say ghiree huee hai.

⁸sab talvaar say les aur tajaribaakaar faujee hain. har ek nay apnee talvaar ko raat kay haulnaak khatron ka saamna karnay kay liyay tayyaar kar rakha hai.

⁹sulemaan baadshaah nay khud yah paalkee lubnaan kay deodaar kee lakdee say banvaaee.

¹⁰us nay us kay paaay chaandee say, pusht sonay say, aur nishast arghvaanee rang kay kapday say banvaaee. yarooshalam kee betiyon nay baday piyaar say us ka androonee hissa murassaakaaree say aaraasta kiya hai.

¹¹ai siyyoon kee betiyo, nikal aao aur sulemaan baadshaah ko dekho. us kay sar par vah taaj hai jo us kee maan nay us kee shaadee kay din us kay sar par pahenaaya, us din jab us ka dil baagh baagh hua.