Ġazal-ul-Ġazlaat 1
too mera baadshaah hai
1sulemaan kee ghazal-ul-ghazlaat.
2vah mujhay apnay munh say bosay day, kyoonki teree muhabbat mai say kaheen ziyaada raahatabakhsh hai.
3teree itr kee khushboo kitnee manamohan hai, tera naam chhidka gaya mahekdaar tel hee hai. is liyay kunvaariyaan tujhay piyaar kartee hain.
4a, mujhay khainch kar apnay saath lay ja! a, ham daud kar chalay jaaen! baadshaah mujhay apnay kamron men lay jaaay, aur ham baagh baagh ho kar teree khushee manaaen. ham mai kee nisbat teray piyaar kee ziyaada taareef karen. munaasib hai ki log tujh say muhabbat karen.
mujhay haqeer na jaano
5ai yarooshalam kee betiyo, main siyaahafaam lekin manamohan hoon, main qeedaar kay khaimon jaisee, sulemaan kay khaimon kay pardon jaisee khoobsoorat hoon. 6is liyay mujhay haqeer na jaano ki main siyaahafaam hoon, ki meree jild dhoop say jhulas gaee hai. meray sagay bhaaee mujh say naaraaz thay, is liyay unhon nay mujhay angoor kay baaghon kee dekh-bhaal karnay kee zimmaadaaree dee, angoor kay apnay zaatee baagh kee dekh-bhaal main kar na sakee.
too kahaan hai?
7ai too jo meree jaan ka piyaara hai, mujhay bata ki bhed-bakriyaan kahaan chara raha hai? too unhen dopaher kay vaqt kahaan aaraam karnay bithaata hai? main kyoon niqaabposh kee tarah teray saathiyon kay revdon kay paas thaheree rahoon?
8kya too naheen jaantee, too jo aurton men sab say khoobsoorat hai? phir ghar say nikal kar khoj laga ki meree bhed-bakriyaan kis taraf chalee gaee hain, apnay memnon ko gallaabaanon kay khaimon kay paas chara.
too kitnee khoobsoorat hai
9meree mahbooba, main tujhay kis cheez say tashbeeh doon? too firaaun ka shaandaar rath khainchnay vaalee ghodee hai!
10teray gaal baaliyon say kitnay aaraasta, teree gardan motee kay gulooband say kitnee dilfareb lagtee hai.
11ham teray liyay sonay ka aisa haar banva lengay jis men chaandee kay motee lagay hongay.
12jitnee der baadshaah ziyaafat men shareek tha meray baalchhad kee khushboo chaaron taraf phailtee rahee.
13mera mahboob goya mur kee dibiya hai, jo meree chhaatiyon kay darmiyaan padee rahetee hai.
14mera mahboob meray liyay mehandee kay phoolon ka guchchha hai, jo ain-jadee kay angoor kay baaghon say laaya gaya hai.
15meree mahbooba, too kitnee khoobsoorat hai, kitnee haseen! teree aankhen kabootar hee hain.
16meray mahboob, too kitna khoobsoorat, kitna dilruba hai! saayaadaar hariyaalee hamaara bistar 17aur deodaar kay darakht hamaaray ghar kay shaheteer hain. jooneepar kay darakht takhton ka kaam detay hain.