Romiyon 8

rooh men zindagee

¹ab jo maseeh eesa men hain unhen mujrim naheen thaheraaya jaata. ²kyoonki rooh kee shareeat nay jo hamen maseeh men zindagee ata kartee hai tujhay gunaah aur maut kee shareeat say aazaad kar diya hai. ³moosvee shareeat hamaaree puraanee fitrat kee kamzor haalat kee vajah say hamen na bacha sakee. is liyay allaah nay vah kuchh kiya jo shareeat kay bas men na tha. us nay apna farzand bhej diya taaki vah gunaahgaar ka sa jism ikhtiyaar karkay hamaaray gunaahon ka kaffaara day. is tarah allaah nay puraanee fitrat men maujood gunaah ko mujrim thaheraayaa ⁴taaki ham men shareeat ka taqaaza poora ho jaaay, ham jo puraanee fitrat kay mutaabiq naheen balki rooh kay mutaabiq chaltay hain. ⁵jo puraanee fitrat kay ikhtiyaar men hain vah puraanee soch rakhtay hain jabki jo rooh kay ikhtiyaar men hain vah ruhaanee soch rakhtay hain. ⁶puraanee fitrat kee soch ka anjaam maut hai jabki rooh kee soch zindagee aur salaamatee paida kartee hai. ⁷puraanee fitrat kee soch allaah say dushmanee rakhtee hai. yah apnay aap ko allaah kee shareeat kay taabay naheen rakhtee, na hee aisa kar saktee hai. ⁸is liyay vah log allaah ko pasand naheen a saktay jo puraanee fitrat kay ikhtiyaar men hain.

⁹lekin aap puraanee fitrat kay ikhtiyaar men naheen balki rooh kay ikhtiyaar men hain. shart yah hai ki rooh-ul-quds aap men basa hua ho. agar kisee men maseeh ka rooh naheen to vah maseeh ka naheen. ¹⁰lekin agar maseeh aap men hai to phir aap ka badan gunaah kee vajah say murda hai jabki rooh-ul-quds aap ko raastbaaz thaheraanay kee vajah say aap kay liyay zindagee ka baais hai. ¹¹us ka rooh aap men basta hai jis nay eesa ko murdon men say zinda kiya. aur choonki rooh-ul-quds aap men basta hai is liyay allaah is kay zareeay aap kay faanee badnon ko bhee maseeh kee tarah zinda karega.

¹²chunaanchay meray bhaaiyo, hamaaree puraanee fitrat ka koee haq na raha ki hamen apnay mutaabiq zindagee guzaarnay par majboor karay. ¹³kyoonki agar aap apnee puraanee fitrat kay mutaabiq zindagee guzaaren to aap halaak ho jaaengay. lekin agar aap rooh-ul-quds kee quvvat say apnee puraanee fitrat kay ghalat kaamon ko nest-o-naabood karen to phir aap zinda rahengay. ¹⁴jis kee bhee raahanumaaee rooh-ul-quds karta hai vah allaah ka farzand hai. ¹⁵kyoonki allaah nay jo rooh aap ko diya hai us nay aap ko ghulaam bana kar khaufzada haalat men naheen rakha balki aap ko allaah kay farzand bana diya hai, aur usee kay zareeay ham pukaar kar allaah ko “abba” yaanee “ai baap” kah saktay hain. ¹⁶rooh-ul-quds khud hamaaree rooh kay saath mil kar gavaahee deta hai ki ham allaah kay farzand hain. ¹⁷aur choonki ham us kay farzand hain is liyay ham vaaris hain, allaah kay vaaris aur maseeh kay hammeeraas. kyoonki agar ham maseeh kay dukh men shareek hon to us kay jalaal men bhee shareek hongay.

aainda ka jalaal

¹⁸meray khayaal men hamaara maujooda dukh us aanay vaalay jalaal kee nisbat kuchh bhee naheen jo ham par zaahir hoga. ¹⁹haan, tamaam kaainaat yah dekhnay kay liyay tadaptee hai ki allaah kay farzand zaahir ho jaaen, ²⁰kyoonki kaainaat allaah kee laanat kay tahet a kar faanee ho gaee hai. yah us kee apnee naheen balki allaah kee marzee thee jis nay us par yah laanat bhejee. to bhee yah ummeed dilaaee gaee ²¹ki ek din kaainaat ko khud us kee faanee haalat kee ghulaamee say chhudaaya jaaega. us vaqt vah allaah kay farzandon kee jalaalee aazaadee men shareek ho jaaegee. ²²kyoonki ham jaantay hain ki aaj tak tamaam kaainaat karaahatee aur dard-ay-zah men tadaptee rahetee hai. ²³na sirf kaainaat balki ham khud bhee andar hee andar karaahatay hain, go hamen aanay vaalay jalaal ka pahela phal rooh-ul-quds kee soorat men mil chuka hai. ham karaahatay karaahatay shiddat say is intizaar men hain ki yah baat zaahir ho jaaay ki ham allaah kay farzand hain aur hamaaray badnon ko najaat milay. ²⁴kyoonki najaat paatay vaqt hamen yah ummeed dilaaee gaee. lekin agar vah kuchh nazar a chuka hota jis kee ummeed ham rakhtay to yah daraheqeeqat ummeed na hotee. kaun us kee ummeed rakhay jo usay nazar a chuka hai? ²⁵lekin choonki ham us kee ummeed rakhtay hain jo abhee nazar naheen aaya to laazim hai ki ham sabr say us ka intizaar karen.

²⁶isi tarah rooh-ul-quds bhee hamaaree kamzor haalat men hamaaree madad karta hai, kyoonki ham naheen jaantay ki kis tarah munaasib dua maangen. lekin rooh-ul-quds khud naaqaabil-ay-bayaan aahen bhartay huay hamaaree shafaaat karta hai. ²⁷aur khuda baap jo tamaam dilon kee tahqeeq karta hai rooh-ul-quds kee soch ko jaanta hai, kyoonki paak rooh allaah kee marzee kay mutaabiq muqaddaseen kee shafaaat karta hai.

²⁸aur ham jaantay hain ki jo allaah say muhabbat rakhtay hain un kay liyay sab kuchh mil kar bhalaaee ka baais banta hai, un kay liyay jo us kay iraaday kay mutaabiq bulaaay gaay hain. ²⁹kyoonki allaah nay pahelay say apnay logon ko chun liya, us nay pahelay say unhen is kay liyay muqarrar kiya ki vah us kay farzand kay hamshakl ban jaaen aur yoon maseeh bahut say bhaaiyon men pahelautha ho. ³⁰lekin jinhen us nay pahelay say muqarrar kiya unhen us nay bulaaya bhee, jinhen us nay bulaaya unhen us nay raastbaaz bhee thaheraaya aur jinhen us nay raastbaaz thaheraaya unhen us nay jalaal bhee bakhsha.

allaah kee maseeh men muhabbat

³¹in tamaam baaton kay javaab men ham kya kahen? agar allaah hamaaray haq men hai to kaun hamaaray khilaaf ho sakta hai? ³²us nay apnay farzand ko bhee daregh na kiya balki usay ham sab kay liyay dushman kay havaalay kar diya. jis nay hamen apnay farzand ko day diya kya vah hamen us kay saath sab kuchh muft naheen dega? ³³ab kaun allaah kay chunay huay logon par ilzaam lagaaega jab allaah khud unhen raastbaaz qaraar deta hai? ³⁴kaun hamen mujrim thaheraaega jab maseeh eesa nay hamaaray liyay apnee jaan dee? balki hamaaree khaatir is say bhee ziyaada hua. usay zinda kiya gaya aur vah allaah kay dahenay haath baith gaya, jahaan vah hamaaree shafaaat karta hai. ³⁵gharaz kaun hamen maseeh kee muhabbat say juda karega? kya koee museebat, tangee, eezaarasaanee, kaal, nangaapan, khatra ya talvaaron? ³⁶jaisay kalaam-ay-muqaddas men likha hai, “teree khaatir hamen din bhar maut ka saamna karna padta hai, log hamen zabah honay vaalee bhedon kay baraabar samajhtay hain.” ³⁷koee baat naheen, kyoonki maseeh hamaaray saath hai aur ham say muhabbat rakhta hai. us kay vaseelay say ham in sab khatron kay roo-ba-roo zabardast fatah paatay hain. ³⁸kyoonki mujhay yaqeen hai ki hamen us kee muhabbat say koee cheez juda naheen kar saktee : na maut aur na zindagee, na farishtay aur na hukmaraan, na haal aur na mustaqbil, na taaqten, ³⁹na nisheb aur na faraaz, na koee aur makhlooq hamen allaah kee us muhabbat say juda kar sakegee jo hamen hamaaray khudaavand maseeh eesa men haasil hai.