Romiyon 7

shaadee kee misaal

¹bhaaiyo, aap to shareeat say vaaqif hain. to kya aap naheen jaantay ki shareeat us vaqt tak insaan par ikhtiyaar rakhtee hai jab tak vah zinda hai? ²shaadee kee misaal len. jab kisee aurat kee shaadee hotee hai to shareeat us ka shauhar kay saath bandhan us vaqt tak qaaim rakhtee hai jab tak shauhar zinda hai. agar shauhar mar jaaay to phir vah is bandhan say aazaad ho gaee. ³chunaanchay agar vah apnay khaavand kay jeetay jee kisee aur mard kee beevee ban jaaay to usay zinaakaar qaraar diya jaata hai. lekin agar us ka shauhar mar jaaay to vah shareeat say aazaad huee. ab vah kisee doosray mard kee beevee banay to zinaakaar naheen thahertee. ⁴meray bhaaiyo, yah baat aap par bhee saadiq aatee hai. jab aap maseeh kay badan ka hissa ban gaay to aap mar kar shareeat kay ikhtiyaar say aazaad ho gaay. ab aap us kay saath paivast ho gaay hain jisay murdon men say zinda kiya gaya taaki ham allaah kee khidmat men phal laaen. ⁵kyoonki jab ham apnee puraanee fitrat kay tahet zindagee guzaartay thay to shareeat hamaaree gunaah’aalooda raghbaton ko uksaatee thee. phir yahee raghbaten hamaaray aaza par asar’andaaz hotee theen aur nateejay men ham aisa phal laatay thay jis ka anjaam maut hai. ⁶lekin ab ham mar kar shareeat kay bandhan say aazaad ho gaay hain. ab ham shareeat kee puraanee zindagee kay tahet khidmat naheen kartay balki rooh-ul-quds kee naee zindagee kay tahet.

shareeat aur gunaah

⁷kya is ka matlab yah hai ki shareeat khud gunaah hai? hargiz naheen! baat to yah hai ki agar shareeat mujh par meray gunaah zaahir na kartee to mujhay in ka kuchh pata na chalta. maslan agar shareeat na bataatee, “laalach na karna” to mujhay daraheqeeqat maaloom na hota ki laalach kya hai. ⁸lekin gunaah nay is hukm say faaida utha kar mujh men har tarah ka laalach paida kar diya. is kay bar’aks jahaan shareeat naheen hotee vahaan gunaah murda hai aur aisa kaam naheen kar paata. ⁹ek vaqt tha jab main shareeat kay baghair zindagee guzaarta tha. lekin joon hee hukm meray saamnay aaya to gunaah men jaan a gaee ¹⁰aur main mar gaya. is tarah maaloom hua ki jis hukm ka maqsad meree zindagee ko qaaim rakhna tha vahee meree maut ka baais ban gaya. ¹¹kyoonki gunaah nay hukm say faaida utha kar mujhay bahekaaya aur hukm say hee mujhay maar daala.

¹²lekin shareeat khud muqaddas hai aur is kay ahkaam muqaddas, raast aur achchhay hain. ¹³kya is ka matlab yah hai ki jo achchha hai vahee meray liyay maut ka baais ban gaya? hargiz naheen! gunaah hee nay yah kiya. is achchhee cheez ko istemaal karkay us nay meray liyay maut paida kar dee taaki gunaah zaahir ho jaaay. yoon hukm kay zareeay gunaah kee sanjeedgee hadd say ziyaada badh jaatee hai.

hamaaray andar kee kash-m-kash

¹⁴ham jaantay hain ki shareeat ruhaanee hai. lekin meree fitrat insaanee hai, mujhay gunaah kee ghulaamee men becha gaya hai. ¹⁵daraheqeeqat main naheen samajhta ki kya karta hoon. kyoonki main vah kaam naheen karta jo karna chaahata hoon balki vah jis say mujhay nafrat hai. ¹⁶lekin agar main vah karta hoon jo naheen karna chaahata to zaahir hai ki main muttafiq hoon ki shareeat achchhee hai. ¹⁷aur agar aisa hai to phir main yah kaam khud naheen kar raha balki gunaah jo meray andar sukoonat karta hai. ¹⁸mujhay maaloom hai ki meray andar yaanee meree puraanee fitrat men koee achchhee cheez naheen bastee. agarchi mujh men nek kaam karnay ka iraada to maujood hai lekin main usay amlee jaama naheen pahena sakta. ¹⁹jo nek kaam main karna chaahata hoon vah naheen karta balki vah bura kaam karta hoon jo karna naheen chaahata. ²⁰ab agar main vah kaam karta hoon jo main naheen karna chaahata to is ka matlab hai ki main khud naheen kar raha balki vah gunaah jo meray andar basta hai.

²¹chunaanchay mujhay ek aur tarah kee shareeat kaam kartee huee nazar aatee hai, aur vah yah hai ki jab main nek kaam karnay ka iraada rakhta hoon to buraaee a maujood hotee hai. ²²haan, apnay baatin men to main khushee say allaah kee shareeat ko maanta hoon. ²³lekin mujhay apnay aaza men ek aur tarah kee shareeat dikhaaee detee hai, aisee shareeat jo meree samajh kee shareeat kay khilaaf lad kar mujhay gunaah kee shareeat ka qaidee bana detee hai, us shareeat ka jo meray aaza men maujood hai. ²⁴haay, meree haalat kitnee buree hai! mujhay is badan say jis ka anjaam maut hai kaun chhudaaega? ²⁵khuda ka shukr hai jo hamaaray khudaavand eesa maseeh kay vaseelay say yah kaam karta hai.

gharaz yahee meree haalat hai, maseeh kay baghair main allaah kee shareeat kee khidmat sirf apnee samajh say kar sakta hoon jabki meree puraanee fitrat gunaah kee shareeat kee ghulaam rah kar usee kee khidmat kartee hai.