Romiyon 6

maseeh men naee zindagee

¹kya is ka matlab yah hai ki ham gunaah kartay rahen taaki allaah kay fazl men izaafa ho? ²hargiz naheen! ham to mar kar gunaah say laataalluq ho gaay hain. to phir ham kis tarah gunaah ko apnay aap par hukoomat karnay day saktay hain? ³ya kya aap ko maaloom naheen ki ham sab jinhen baptisma diya gaya hai is say maseeh eesa kee maut men shaamil ho gaay hain? ⁴kyoonki baptismay say hamen dafnaaya gaya aur us kee maut men shaamil kiya gaya taaki ham maseeh kee tarah naee zindagee guzaaren, jisay baap kee jalaalee qudrat nay murdon men say zinda kiya.

⁵choonki is tarah ham us kee maut men us kay saath paivast ho gaay hain is liyay ham us kay jee uthnay men bhee us kay saath paivast hongay. ⁶kyoonki ham jaantay hain ki hamaara puraana insaan maseeh kay saath masloob ho gaya taaki gunaah kay qabzay men yah jism nest ho jaaay aur yoon ham gunaah kay ghulaam na rahen. ⁷kyoonki jo mar gaya vah gunaah say aazaad ho gaya hai. ⁸aur hamaara eemaan hai ki choonki ham maseeh kay saath mar gaay hain is liyay ham us kay saath zinda bhee hongay, ⁹kyoonki ham jaantay hain ki maseeh murdon men say jee utha hai aur ab kabhee naheen marega. ab maut ka us par koee ikhtiyaar naheen. ¹⁰martay vaqt vah hamesha kay liyay gunaah kee hukoomat say nikal gaya, aur ab jab vah dubaara zinda hai to us kee zindagee allaah kay liyay makhsoos hai. ¹¹aap bhee apnay aap ko aisa samjhen. aap bhee mar kar gunaah kee hukoomat say nikal gaay hain aur ab aap kee maseeh men zindagee allaah kay liyay makhsoos hai.

¹²chunaanchay gunaah aap kay faanee badan men hukoomat na karay. dhyaan den ki aap us kee buree khwaahishaat kay taabay na ho jaaen. ¹³apnay badan kay kisee bhee uzv ko gunaah kee khidmat kay liyay pesh na karen, na usay naaraastee ka hathiyaar bannay den. is kay bajaay apnay aap ko allaah kee khidmat kay liyay pesh karen. kyoonki pahelay aap murda thay, lekin ab aap zinda ho gaay hain. chunaanchay apnay tamaam aaza ko allaah kee khidmat kay liyay pesh karen aur unhen raastee kay hathiyaar bannay den. ¹⁴aainda gunaah aap par hukoomat naheen karega, kyoonki aap apnee zindagee shareeat kay tahet naheen guzaartay balki allaah kay fazl kay tahet.

raastbaazee kay ghulaam

¹⁵ab savaal yah hai, choonki ham shareeat kay tahet naheen balki fazl kay tahet hain to kya is ka matlab yah hai ki hamen gunaah karnay kay liyay khula chhod diya gaya hai? hargiz naheen! ¹⁶kya aap ko maaloom naheen ki jab aap apnay aap ko kisee kay taabay karkay us kay ghulaam ban jaatay hain to aap us maalik kay ghulaam hain jis kay taabay aap hain? ya to gunaah aap ka maalik ban kar aap ko maut tak lay jaaega, ya faramaambardaaree aap kee maalikan ban kar aap ko raastbaazee tak lay jaaegee. ¹⁷daraheqeeqat aap pahelay gunaah kay ghulaam thay, lekin khuda ka shukr hai ki ab aap pooray dil say usee taaleem kay taabay ho gaay hain jo aap kay sapurd kee gaee hai. ¹⁸ab aap ko gunaah say aazaad kar diya gaya hai, raastbaazee hee aap kee maalikan ban gaee hai. ¹⁹(aap kee fitratee kamzoree kee vajah say main ghulaamee kee yah misaal day raha hoon taaki aap meree baat samajh paaen.) pahelay aap nay apnay aaza ko najaasat aur bedeenee kee ghulaamee men day rakha tha jis kay nateejay men aap kee bedeenee badhtee gaee. lekin ab aap apnay aaza ko raastbaazee kee ghulaamee men day den taaki aap muqaddas ban jaaen.

²⁰jab gunaah aap ka maalik tha to aap raastbaazee say aazaad thay. ²¹aur is ka nateeja kiya tha? jo kuchh aap nay us vaqt kiya us say aap ko aaj sharm aatee hai aur us ka anjaam maut hai. ²²lekin ab aap gunaah kee ghulaamee say aazaad ho kar allaah kay ghulaam ban gaay hain, jis kay nateejay men aap makhsoos-o-muqaddas ban jaatay hain aur jis ka anjaam abdee zindagee hai. ²³kyoonki gunaah ka ajr maut hai jabki allaah hamaaray khudaavand maseeh eesa kay vaseelay say hamen abdee zindagee kee muft nemat ata karta hai.