Romiyon 5

raastbaazee ka anjaam

¹ab choonki hamen eemaan say raastbaaz qaraar diya gaya hai is liyay allaah kay saath hamaaree sulah hai. is sulah ka vaseela hamaara khudaavand eesa maseeh hai. ²hamaaray eemaan laanay par us nay hamen fazl kay us maqaam tak pahunchaaya jahaan ham aaj qaaim hain. aur yoon ham is ummeed par fakhar kartay hain ki ham allaah kay jalaal men shareek hongay. ³na sirf yah balki ham us vaqt bhee fakhar kartay hain jab ham museebaton men phansay hotay hain. kyoonki ham jaantay hain ki museebat say saabitqadmee paida hotee hai, ⁴saabitqadmee say pukhtagee aur pukhtagee say ummeed. ⁵aur ummeed hamen sharminda honay naheen detee, kyoonki allaah nay hamen rooh-ul-quds day kar us kay vaseelay say hamaaray dilon men apnee muhabbat undelee hai.

⁶kyoonki ham abhee kamzor hee thay to maseeh nay ham bedeenon kee khaatir apnee jaan day dee. ⁷mushkil say hee koee kisee raastbaaz kee khaatir apnee jaan dega. haan, mumkin hai ki koee kisee nekokaar kay liyay apnee jaan denay kee jur’at karay. ⁸lekin allaah nay ham say apnee muhabbat ka izhaar yoon kiya ki maseeh nay us vaqt hamaaree khaatir apnee jaan dee jab ham gunaahgaar hee thay. ⁹hamen maseeh kay khoon say raastbaaz thaheraaya gaya hai. to yah baat kitnee yaqeenee hai ki ham us kay vaseelay say allaah kay ghazab say bachengay. ¹⁰ham abhee allaah kay dushman hee thay jab us kay farzand kee maut kay vaseelay say hamaaree us kay saath sulah ho gaee. to phir yah baat kitnee yaqeenee hai ki ham us kee zindagee kay vaseelay say najaat bhee paaengay. ¹¹na sirf yah balki ab ham allaah par fakhar kartay hain aur yah hamaaray khudaavand eesa maseeh kay vaseelay say hai, jis nay hamaaree sulah karaaee hai.

aadam aur maseeh

¹²jab aadam nay gunaah kiya to us ek hee shakhs say gunaah duniya men aaya. is gunaah kay saath saath maut bhee a kar sab aadmiyon men phail gaee, kyoonki sab nay gunaah kiya. ¹³shareeat kay inkishaaf say pahelay gunaah to duniya men tha, lekin jahaan shareeat naheen hotee vahaan gunaah ka hisaab naheen kiya jaata. ¹⁴taaham aadam say lay kar moosa tak maut kee hukoomat jaaree rahee, un par bhee jinhon nay aadam kee see hukm’adoolee na kee.

ab aadam aanay vaalay eesa maseeh kee taraf ishaara tha. ¹⁵lekin in donon men bada farq hai. jo nemat allaah muft men deta hai vah aadam kay gunaah say mutaabiqat naheen rakhtee. kyoonki is ek shakhs aadam kee khilaafvarzee say bahut say log maut kee zad men a gaay, lekin allaah ka fazl kaheen ziyaada muassir hai, vah muft nemat jo bahuton ko us ek shakhs eesa maseeh men milee hai. ¹⁶haan, allaah kee is nemat aur aadam kay gunaah men bahut farq hai. us ek shakhs aadam kay gunaah kay nateejay men hamen to mujrim qaraar diya gaya, lekin allaah kee muft nemat ka asar yah hai ki hamen raastbaaz qaraar diya jaata hai, go ham say beshumaar gunaah sarzad huay hain. ¹⁷is ek shakhs aadam kay gunaah kay nateejay men maut sab par hukoomat karnay lagee. lekin is ek shakhs eesa maseeh ka kaam kitna ziyaada muassir tha. jitnay bhee allaah ka vaafir fazl aur raastbaazee kee nemat paatay hain vah maseeh kay vaseelay say abdee zindagee men hukoomat karengay.

¹⁸chunaanchay jis tarah ek hee shakhs kay gunaah kay baais sab log mujrim thaheray usee tarah ek hee shakhs kay raast amal say vah darvaaza khul gaya jis men daakhil ho kar sab log raastbaaz thaher saktay aur zindagee pa saktay hain. ¹⁹jis tarah ek hee shakhs kee naafarmaanee say bahut say log gunaahgaar ban gaay, usee tarah ek hee shakhs kee faramaambardaaree say bahut say log raastbaaz ban jaaengay.

²⁰shareeat is liyay darmiyaan men a gaee ki khilaafvarzee badh jaaay. lekin jahaan gunaah ziyaada hua vahaan allaah ka fazl is say bhee ziyaada ho gaya. ²¹chunaanchay jis tarah gunaah maut kee soorat men hukoomat karta tha usee tarah ab allaah ka fazl hamen raastbaaz thahera kar hukoomat karta hai. yoon hamen apnay khudaavand eesa maseeh kee badaulat abdee zindagee haasil hotee hai.