Romiyon 4

ibraaheem eemaan say raastbaaz thaheraa

¹ibraaheem jismaanee lihaaz say hamaara baap tha. to raastbaaz thahernay kay silsilay men us ka kya tajriba tha? ²ham kah saktay hain ki agar vah shareeat par amal karnay say raastbaaz thaherta to vah apnay aap par fakhar kar sakta tha. lekin allaah kay nazdeek us kay paas apnay aap par fakhar karnay ka koee sabab na tha. ³kyoonki kalaam-ay-muqaddas men likha hai, “ibraaheem nay allaah par bharosa rakha. is bina par allaah nay usay raastbaaz qaraar diya.” ⁴jab log kaam kartay hain to un kee mazdooree koee khaas meharbaanee qaraar naheen dee jaatee, balki yah to un ka haq banta hai. ⁵lekin jab log kaam naheen kartay balki allaah par eemaan rakhtay hain jo bedeenon ko raastbaaz qaraar deta hai to un ka koee haq naheen banta. vah un kay eemaan hee kee bina par raastbaaz qaraar diay jaatay hain. ⁶daaood yahee baat bayaan karta hai jab vah us shakhs ko mubaarak kaheta hai jisay allaah baghair aamaal kay raastbaaz thaheraata hai,

⁷“mubaarak hain vah jin kay jaraaim muaaf kiay gaay,

jin kay gunaah dhaampay gaay hain.

⁸mubaarak hai vah jis ka gunaah rabb hisaab men naheen laaega.”

⁹kya yah mubaarakabaadee sirf makhtoonon kay liyay hai ya naamakhtoonon kay liyay bhee? ham to bayaan kar chukay hain ki ibraaheem eemaan kee bina par raastbaaz thahera. ¹⁰usay kis haalat men raastbaaz thaheraaya gaya? khatna karaanay kay baad ya pahelay? khatnay kay baad naheen balki pahelay. ¹¹aur khatna ka jo nishaan usay mila vah us kee raastbaazee kee muhar thee, vah raastbaazee jo usay khatna karaanay say peshtar milee, us vaqt jab vah eemaan laaya. yoon vah un sab ka baap hai jo baghair khatna karaaay eemaan laaay hain aur is bina par raastbaaz thahertay hain. ¹²saath hee vah khatna karaanay vaalon ka baap bhee hai, lekin un ka jin ka na sirf khatna hua hai balki jo hamaaray baap ibraaheem kay us eemaan kay naqsh-ay-qadam par chaltay hain jo vah khatna karaanay say peshtar rakhta tha.

allaah ka vaada eemaan say haasil hota hai

¹³jab allaah nay ibraaheem aur us kee aulaad say vaada kiya ki vah duniya ka vaaris hoga to us nay yah is liyay naheen kiya ki ibraaheem nay shareeat kee pairvee kee balki is liyay ki vah eemaan laaya aur yoon raastbaaz thaheraaya gaya. ¹⁴kyoonki agar vah vaaris hain jo shareeat kay pairokaar hain to phir eemaan beasar thahera aur allaah ka vaada mit gaya. ¹⁵shareeat allaah ka ghazab hee paida kartee hai. lekin jahaan koee shareeat naheen vahaan us kee khilaafvarzee bhee naheen.

¹⁶chunaanchay yah meeraas eemaan say miltee hai taaki is kee bunyaad allaah ka fazl ho aur is ka vaada ibraaheem kee tamaam nasal kay liyay ho, na sirf shareeat kay pairokaaron kay liyay balki un kay liyay bhee jo ibraaheem ka sa eemaan rakhtay hain. yahee ham sab ka baap hai. ¹⁷yoon allaah kalaam-ay-muqaddas men us say vaada karta hai, “main nay tujhay bahut qaumon ka baap bana diya hai.” allaah hee kay nazdeek ibraaheem ham sab ka baap hai. kyoonki us ka eemaan us khuda par tha jo murdon ko zinda karta aur jis kay hukm par vah kuchh paida hota hai jo pahelay naheen tha. ¹⁸ummeed kee koee kiran dikhaaee naheen detee thee, phir bhee ibraaheem ummeed kay saath eemaan rakhta raha ki main zaroor bahut qaumon ka baap banoonga. aur aakhirkaar aisa hee hua, jaisa kalaam-ay-muqaddas men vaada kiya gaya tha ki “teree aulaad itnee hee beshumaar hogee.” ¹⁹aur ibraaheem ka eemaan kamzor na pada, haalaanki usay maaloom tha ki main taqreeban sau saal ka hoon aur mera aur saara kay badan goya murda hain, ab bachchay paida karnay kee umr saara kay liyay guzar chukee hai. ²⁰to bhee ibraaheem ka eemaan khatm na hua, na us nay allaah kay vaaday par shak kiya balki eemaan men vah mazeed mazboot hua aur allaah ko jalaal deta raha. ²¹usay pukhta yaqeen tha ki allaah apnay vaaday ko poora karnay kee qudrat rakhta hai. ²²us kay is eemaan kee vajah say allaah nay usay raastbaaz qaraar diya. ²³kalaam-ay-muqaddas men yah baat ki allaah nay usay raastbaaz qaraar diya na sirf us kee khaatir likhee gaee ²⁴balki hamaaree khaatir bhee. kyoonki allaah hamen bhee raastbaaz qaraar dega agar ham us par eemaan rakhen jis nay hamaaray khudaavand eesa ko murdon men say zinda kiya. ²⁵hamaaree hee khataaon kee vajah say usay maut kay havaalay kiya gaya, aur hamen hee raastbaaz qaraar denay kay liyay usay zinda kiya gaya.