Romiyon 3
1to kya yahoodee honay ka ya khatna ka koee faaida hai? 2jee haan, har tarah ka! avval to yah ki allaah ka kalaam un kay sapurd kiya gaya hai. 3agar un men say baaz bevafa niklay to kya hua? kya is say allaah kee vafaadaaree bhee khatm ho jaaegee? 4kabhee naheen! laazim hai ki allaah sachcha thaheray go har insaan jhoota hai. yoon kalaam-ay-muqaddas men likha hai, “laazim hai ki too boltay vaqt raast thaheray aur adaalat kartay vaqt ghaalib aaay.”
5koee kah sakta hai, “hamaaree naaraastee ka ek achchha maqsad hota hai, kyoonki is say logon par allaah kee raastee zaahir hotee hai. to kya allaah beinsaaf naheen hoga agar vah apna ghazab ham par naazil karay?” (main insaanee khayaal pesh kar raha hoon). 6hargiz naheen! agar allaah raast na hota to phir vah duniya kee adaalat kis tarah kar sakta?
7shaayad koee aur etiraaz karay, “agar mera jhoot allaah kee sachchaaee ko kasrat say numaayaan karta hai aur yoon us ka jalaal badhta hai to vah mujhay kyoonkar gunaahgaar qaraar day sakta hai?” 8kuchh log ham par yah kufr bhee baktay hain ki ham kahetay hain, “aao, ham buraaee karen taaki bhalaaee niklay.” insaaf ka taqaaza hai ki aisay logon ko mujrim thaheraaya jaaay.
koee raastbaaz naheen
9ab ham kya kahen? kya ham yahoodee doosron say bartar hain? bilkul naheen. ham to pahelay hee yah ilzaam laga chukay hain ki yahoodee aur yoonaanee sab hee gunaah kay qabzay men hain. 10kalaam-ay-muqaddas men yoon likha hai,
“koee naheen jo raastbaaz hai, ek bhee naheen.
11koee naheen jo samajhdaar hai,
koee naheen jo allaah ka taalib hai.
12afsos, sab saheeh raah say bhatak gaay,
sab kay sab bigad gaay hain.
koee naheen jo bhalaaee karta ho, ek bhee naheen.
13un ka gala khulee qabr hai,
un kee zabaan fareb detee hai.
un kay honton men saamp ka zaher hai.
14un ka munh laanat aur kadavaahat say bhara hai.
15un kay paaon khoon bahaanay kay liyay jaldee kartay hain.
16apnay peechhay vah tabaahee-o-barbaadee chhod jaatay hain,
17aur vah salaamatee kee raah naheen jaantay.
18un kee aankhon kay saamnay khuda ka khauf naheen hota.”
19ab ham jaantay hain ki shareeat jo kuchh farmaatee hai unhen farmaatee hai jin kay sapurd vah kee gaee hai. maqsad yah hai ki har insaan kay bahaanay khatm kiay jaaen aur tamaam duniya allaah kay saamnay mujrim thaheray. 20kyoonki shareeat kay taqaazay pooray karnay say koee bhee us kay saamnay raastbaaz naheen thaher sakta, balki shareeat ka kaam yah hai ki hamaaray andar gunaahgaar honay ka ihsaas paida karay.
raastbaaz honay kay liyay eemaan zarooree hai
21lekin ab allaah nay ham par ek raah ka inkishaaf kiya hai jis say ham shareeat kay baghair hee us kay saamnay raastbaaz thaher saktay hain. tauret aur nabiyon kay saheefay bhee is kee tasdeeq kartay hain. 22raah yah hai ki jab ham eesa maseeh par eemaan laatay hain to allaah hamen raastbaaz qaraar deta hai. aur yah raah sab kay liyay hai. kyoonki koee bhee farq naheen, 23sab nay gunaah kiya, sab allaah kay us jalaal say maheroom hain jis ka vah taqaaza karta hai, 24aur sab muft men allaah kay fazl hee say raastbaaz thaheraaay jaatay hain, us fidiay kay vaseelay say jo maseeh eesa nay diya. 25kyoonki allaah nay eesa ko us kay khoon kay baais kaffaara ka vaseela bana kar pesh kiya, aisa kaffaara jis say eemaan laanay vaalon ko gunaahon kee muaafee miltee hai. yoon allaah nay apnee raastee zaahir kee, pahelay maazee men jab vah apnay sabr-o-tahemmul men gunaahon kee saza denay say baaz rahaa 26aur ab maujooda zamaanay men bhee. is say vah zaahir karta hai ki vah raast hai aur har ek ko raastbaaz thaheraata hai jo eesa par eemaan laaya hai.
27ab hamaara fakhar kahaan raha? usay to khatm kar diya gaya hai. kis shareeat say? kya aamaal kee shareeat say? naheen, balki eemaan kee shareeat say. 28kyoonki ham kahetay hain ki insaan ko eemaan say raastbaaz thaheraaya jaata hai, na ki aamaal say. 29kya allaah sirf yahoodiyon ka khuda hai? ghairyahoodiyon ka naheen? haan, ghairyahoodiyon ka bhee hai. 30kyoonki allaah ek hee hai jo makhtoon aur naamakhtoon donon ko eemaan hee say raastbaaz thaheraaega. 31phir kya ham shareeat ko eemaan say mansookh kartay hain? hargiz naheen, balki ham shareeat ko qaaim rakhtay hain.