Romiyon 2

allaah kee raast adaalat

¹ai insaan, kya too doosron ko mujrim thaheraata hai? too jo koee bhee ho tera koee uzr naheen. kyoonki too khud bhee vahee kuchh karta hai jis men too doosron ko mujrim thaheraata hai aur yoon apnay aap ko bhee mujrim qaraar deta hai. ²ab ham jaantay hain ki aisay kaam karnay vaalon par allaah ka faisla munsifaana hai. ³taaham too vahee kuchh karta hai jis men too doosron ko mujrim thaheraata hai. kya too samajhta hai ki khud allaah kee adaalat say bach jaaega? ⁴ya kya too us kee vasee meharbaanee, tahemmul aur sabr ko haqeer jaanta hai? kya tujhay maaloom naheen ki allaah kee meharbaanee tujhay tauba tak lay jaana chaahatee hai? ⁵lekin too hatdharm hai, too tauba karnay kay liyay tayyaar naheen aur yoon apnee saza men izaafa karta ja raha hai, vah saza jo us din dee jaaegee jab allaah ka ghazab naazil hoga, jab us kee raast adaalat zaahir hogee. ⁶allaah har ek ko us kay kaamon ka badla dega. ⁷kuchh log saabitqadmee say nek kaam kartay aur jalaal, izzat aur baqa kay taalib rahetay hain. unhen allaah abdee zindagee ata karega. ⁸lekin kuchh log khudgharaz hain aur sachchaaee kee naheen balki naaraastee kee pairvee kartay hain. un par allaah ka ghazab aur qaher naazil hoga. ⁹museebat aur pareshaanee har us insaan par aaegee jo buraaee karta hai, pahelay yahoodee par, phir yoonaanee par. ¹⁰lekin jalaal, izzat aur salaamatee har us insaan ko haasil hogee jo nekee karta hai, pahelay yahoodee ko, phir yoonaanee ko. ¹¹kyoonki allaah kisee ka bhee tarafdaar naheen.

¹²ghairyahoodiyon kay paas moosvee shareeat naheen hai, is liyay vah shareeat kay baghair hee gunaah karkay halaak ho jaatay hain. yahoodiyon kay paas shareeat hai, lekin vah bhee naheen bachengay. kyoonki jab vah gunaah kartay hain to shareeat hee unhen mujrim thaheraatee hai. ¹³kyoonki allaah kay nazdeek yah kaafee naheen ki ham shareeat kee baaten sunen balki vah hamen us vaqt hee raastbaaz qaraar deta hai jab shareeat par amal bhee kartay hain. ¹⁴aur go ghairyahoodiyon kay paas shareeat naheen hotee lekin jab bhee vah fitratee taur par vah kuchh kartay hain jo shareeat farmaatee hai to zaahir kartay hain ki go hamaaray paas shareeat naheen to bhee ham apnay aap kay liyay khud shareeat hain. ¹⁵is men vah saabit kartay hain ki shareeat kay taqaazay un kay dil par likhay huay hain. un ka zameer bhee is kee gavaahee deta hai, kyoonki un kay khayaalaat kabhee ek doosray kee mazammat aur kabhee ek doosray ka difa bhee kartay hain. ¹⁶gharaz, meree khushkhabaree kay mutaabiq har ek ko us din apna ajr milega jab allaah eesa maseeh kee maarifat insaanon kee posheeda baaton kee adaalat karega.

yahoodee aur shareeat

¹⁷achchha, too apnay aap ko yahoodee kaheta hai. too shareeat par inhisaar karta aur allaah kay saath apnay taalluq par fakhar karta hai. ¹⁸too us kee marzee ko jaanta hai aur shareeat kee taaleem paanay kay baais saheeh raah kee pahechaan rakhta hai. ¹⁹tujhay poora yaqeen hai, ‘main andhon ka qaaid, taareekee men basnay vaalon kee raushnee, ²⁰besamjhon ka muallim aur bachchon ka ustaad hoon.’ ek lihaaz say yah durust bhee hai, kyoonki shareeat kee soorat men teray paas ilm-o-irfaan aur sachchaaee maujood hai. ²¹ab bata, too jo auron ko sikhaata hai apnay aap ko kyoon naheen sikhaata? too jo choree na karnay kee munaadee karta hai, khud choree kyoon karta hai? ²²too jo auron ko zina karnay say mana karta hai, khud zina kyoon karta hai? too jo buton say ghin khaata hai, khud mandiron ko kyoon lootta hai? ²³too jo shareeat par fakhar karta hai, kyoon is kee khilaafvarzee karkay allaah kee beizzatee karta hai? ²⁴yah vahee baat hai jo kalaam-ay-muqaddas men likhee hai, “tumhaaray sabab say ghairyahoodiyon men allaah kay naam par kufr baka jaata hai.”

²⁵khatnay ka faaida to us vaqt hota hai jab too shareeat par amal karta hai. lekin agar too us kee hukm’adoolee karta hai to too naamakhtoon jaisa hai. ²⁶is kay bar’aks agar naamakhtoon ghairyahoodee shareeat kay taqaazon ko poora karta hai to kya allaah usay makhtoon yahoodee kay baraabar naheen thaheraaega? ²⁷chunaanchay jo naamakhtoon ghairyahoodee shareeat par amal kartay hain vah aap yahoodiyon ko mujrim thaheraaengay jin ka khatna hua hai aur jin kay paas shareeat hai, kyoonki aap shareeat par amal naheen kartay. ²⁸aap is bina par haqeeqee yahoodee naheen hain ki aap kay vaalidain yahoodee thay ya aap kay badan ka khatna zaahiree taur par hua hai. ²⁹balki haqeeqee yahoodee vah hai jo baatin men yahoodee hai. aur haqeeqee khatna us vaqt hota hai jab dil ka khatna hua hai. aisa khatna shareeat say naheen balki rooh-ul-quds kay vaseelay say kiya jaata hai. aur aisay yahoodee ko insaan kee taraf say naheen balki allaah kee taraf say taareef miltee hai.