Romiyon 16
salaam-o-duaa
1hamaaree bahen feebay aap kay paas a rahee hai. vah kinkhriya shaher kee jamaaat men khaadima hai. main us kee sifaarish karta hoon 2balki khudaavand men arz hai ki aap us ka vaisay hee istiqbaal karen jaisay ki muqaddaseen ko karna chaahiay. jis muaamalay men bhee usay aap kee madad kee zaroorat ho us men us ka saath den, kyoonki us nay bahut logon kee balki meree bhee madad kee hai.
3priskilla aur akvila ko mera salaam dena jo maseeh eesa men meray hamkhidmat rahay hain. 4unhon nay meray liyay apnee jaan par khela. na sirf main balki ghairyahoodiyon kee jamaaaten un kee ehsaanmand hain. 5un kay ghar men jama honay vaalee jamaaat ko bhee mera salaam dena.
meray azeez dost ipinetus ko mera salaam dena. vah sooba aasiya men maseeh ka pahela pairokaar yaanee us ilaaqay kee fasal ka pahela phal tha. 6mariyam ko mera salaam jis nay aap kay liyay badee mehanat-mashaqqat kee hai. 7androoneekus aur yooniya ko mera salaam. vah meray hamvatan hain aur jel men meray saath vaqt guzaara hai. rasoolon men vah numaayaan haisiyat rakhtay hain, aur vah mujh say pahelay maseeh kay peechhay ho liyay thay.
8ampaliyaatus ko salaam. vah khudaavand men mujhay azeez hai. 9maseeh men hamaaray hamkhidmat urbaanus ko salaam aur isi tarah meray azeez dost istakhus ko bhee. 10apellis ko salaam jis kee maseeh kay saath vafaadaaree ko aazmaaya gaya hai. aristuboolus kay ghar vaalon ko salaam. 11meray hamvatan herodiyon ko salaam aur isi tarah narakissus kay un ghar vaalon ko bhee jo maseeh kay peechhay ho liyay hain.
12troofena aur troofosa ko salaam jo khudaavand kee khidmat men mehanat-mashaqqat kartee hain. meree azeez bahen parsis ko salaam jis nay khudaavand kee khidmat men badee mehanat-mashaqqat kee hai. 13hamaaray khudaavand kay chunay huay bhaaee roofus ko salaam aur isi tarah us kee maan ko bhee jo meree maan bhee hai. 14asinkritus, faligon, hirmes, patrobaas, hirmaas aur un kay saathee bhaaiyon ko mera salaam dena. 15filulugus aur yooliya, neriyoos aur us kee bahen, ulimpaas aur un kay saath tamaam muqaddaseen ko salaam.
16ek doosray ko muqaddas bosa day kar salaam karen. maseeh kee tamaam jamaaaton kee taraf say aap ko salaam.
aakhiree hidaayaat
17bhaaiyo, main aap ko taakeed karta hoon ki aap un say khabardaar rahen jo paarteebaazee aur thokar ka baais bantay hain. yah us taaleem kay khilaaf hai jo aap ko dee gaee hai. un say kinaara karen 18kyoonki aisay log hamaaray khudaavand maseeh kee khidmat naheen kar rahay balki apnay pet kee. vah apnee meethee aur chiknee-chupdee baaton say saadaalauh logon kay dilon ko dhoka detay hain. 19aap kee faramaambardaaree kee khabar sab tak pahunch gaee hai. yah dekh kar main aap kay baaray men khush hoon. lekin main chaahata hoon ki aap achchha kaam karnay kay lihaaz say daanishmand aur bura kaam karnay kay lihaaz say bequsoor hon. 20salaamatee ka khuda jald hee iblees ko aap kay paaon talay kuchalva daalega.
hamaaray khudaavand eesa ka fazl aap kay saath ho.
21mera hamkhidmat teemuthiyus aap ko salaam deta hai, aur isi tarah meray hamvatan lookiyus, yaason aur sosipaatrus.
22main, tirtiyus is khat ka kaatib hoon. meree taraf say bhee khudaavand men aap ko salaam.
23gayus kee taraf say aap ko salaam. main aur pooree jamaaat us kay mehamaan rahay hain. shaher kay khazaanchee iraastus aur hamaaray bhaaee kvaartus bhee aap ko salaam kahetay hain. 24[hamaaray khudaavand eesa ka fazl aap sab kay saath hota rahay.]
aakhiree duaa
25allaah kee tamjeed ho, jo aap ko mazboot karnay par qaadir hai, kyoonki eesa maseeh kay baaray men us khushkhabaree say jo main sunaata hoon aur us bhed kay inkishaaf say jo azal say posheeda raha vah aap ko qaaim rakh sakta hai. 26ab is bhed kee haqeeqat nabiyon kay saheefon say zaahir kee gaee hai aur abdee khuda kay hukm par tamaam qaumon ko maaloom ho gaee hai taaki sab eemaan la kar allaah kay taabay ho jaaen.
27allaah kee tamjeed ho jo vaahid daanishmand hai. usee ka eesa maseeh kay vaseelay say abad tak jalaal hota rahay! aameen.