Romiyon 14

ek doosray ko mujrim mat thaheraanaa

¹jis ka eemaan kamzor hai usay qabool karen, aur us kay saath bahs-mubaahasa na karen. ²ek ka eemaan to usay har cheez khaanay kee ijaazat deta hai jabki kamzor eemaan rakhnay vaala sirf sabziyaan khaata hai. ³jo sab kuchh khaata hai vah usay haqeer na jaanay jo yah naheen kar sakta. aur jo yah naheen kar sakta vah usay mujrim na thaheraaay jo sab kuchh khaata hai, kyoonki allaah nay usay qabool kiya hai. ⁴aap kaun hain ki kisee aur kay ghulaam ka faisla karen? us ka apna maalik faisla karega ki vah khada rahay ya gir jaaay. aur vah zaroor khada rahega, kyoonki khudaavand usay qaaim rakhnay par qaadir hai.

⁵kuchh log ek din ko doosray dinon kee nisbat ziyaada ahem qaraar detay hain jabki doosray tamaam dinon kee ahemiyat baraabar samajhtay hain. aap jo bhee khayaal rakhen, har ek usay pooray yaqeen kay saath rakhay. ⁶jo ek din ko khaas qaraar deta hai vah is say khudaavand kee taazeem karna chaahata hai. isi tarah jo sab kuchh khaata hai vah is say khudaavand ko jalaal dena chaahata hai. yah is say zaahir hota hai ki vah is kay liyay khuda ka shukr karta hai. lekin jo kuchh khaanon say parhez karta hai vah bhee khuda ka shukr karkay is say us kee taazeem karna chaahata hai. ⁷baat yah hai ki ham men say koee naheen jo sirf apnay vaastay zindagee guzaarta hai aur koee naheen jo sirf apnay vaastay marta hai. ⁸agar ham zinda hain to is liyay ki khudaavand ko jalaal den, aur agar ham maren to is liyay ki ham khudaavand ko jalaal den. gharaz ham khudaavand hee kay hain, khwaah zinda hon ya murda. ⁹kyoonki maseeh isi maqsad kay liyay mua aur jee utha ki vah murdon aur zindon donon ka maalik ho. ¹⁰to phir aap jo sirf sabzee khaatay hain apnay bhaaee ko mujrim kyoon thaheraatay hain? aur aap jo sab kuchh khaatay hain apnay bhaaee ko haqeer kyoon jaantay hain? yaad rakhen ki ek din ham sab allaah kay takht adaalat kay saamnay khaday hongay. ¹¹kalaam-ay-muqaddas men yahee likha hai,

rabb farmaata hai, “meree hayaat kee qasam,

har ghutna meray saamnay jhukegaa

aur har zabaan allaah kee tamjeed karegee.”

¹²haan, ham men say har ek ko allaah kay saamnay apnee zindagee ka javaab dena padega.

doosron kay liyay girnay ka baais na bannaa

¹³chunaanchay aaen, ham ek doosray ko mujrim na thaheraaen. pooray azam kay saath is ka khayaal rakhen ki aap apnay bhaaee kay liyay thokar khaanay ya gunaah men girnay ka baais na banen. ¹⁴mujhay khudaavand maseeh men ilm aur yaqeen hai ki koee bhee khaana bazaat-ay-khud naapaak naheen hai. lekin jo kisee khaanay ko naapaak samajhta hai us kay liyay vah khaana naapaak hee hai. ¹⁵agar aap apnay bhaaee ko apnay kisee khaanay kay baais pareshaan kar rahay hain to aap muhabbat kee rooh men zindagee naheen guzaar rahay. apnay bhaaee ko apnay khaanay say halaak na karen. yaad rakhen ki maseeh nay us kay liyay apnee jaan dee hai. ¹⁶aisa na ho ki log us achchhee cheez par kufr baken jo aap ko mil gaee hai. ¹⁷kyoonki allaah kee baadshaahee khaanay-peenay kee cheezon par qaaim naheen hai balki raastbaazee, sulah-salaamatee aur rooh-ul-quds men khushee par. ¹⁸jo yoon maseeh kee khidmat karta hai vah allaah ko pasand aur insaanon ko manzoor hai.

¹⁹chunaanchay aaen, ham pooree jidd-o-jahd kay saath vah kuchh karnay kee koshish karen jo sulah-salaamatee aur ek doosray kee ruhaanee taameer-o-taraqqee ka baais hai. ²⁰allaah ka kaam kisee khaanay kee khaatir barbaad na karen. har khaana paak hai, lekin agar aap kuchh khaatay hain jis say doosray ko thes lagay to yah ghalat hai. ²¹behatar yah hai ki na aap gosht khaaen, na mai pien aur na koee aur qadam uthaaen jis say aap ka bhaaee thokar khaaay. ²²jo bhee eemaan aap is naatay say rakhtay hain vah aap aur allaah tak mahdood rahay. mubaarak hai vah jo kisee cheez ko jaaiz qaraar day kar apnay aap ko mujrim naheen thaheraata. ²³lekin jo shak kartay huay koee khaana khaata hai usay mujrim thaheraaya jaata hai, kyoonki us ka yah amal eemaan par mabnee naheen hai. aur jo bhee amal eemaan par mabnee naheen hota vah gunaah hai.