Romiyon 13

r’aaya kay faraaiz

¹har shakhs ikhtiyaar rakhnay vaalay hukmaraanon kay taabay rahay, kyoonki tamaam ikhtiyaar allaah kee taraf say hai. jo ikhtiyaar rakhtay hain unhen allaah kee taraf say muqarrar kiya gaya hai. ²chunaanchay jo hukmaraan kee mukhaalafat karta hai vah allaah kay farmaan kee mukhaalafat karta aur yoon apnay aap par allaah kee adaalat laata hai. ³kyoonki hukmaraan un kay liyay khauf ka baais naheen hotay jo saheeh kaam kartay hain balki un kay liyay jo ghalat kaam kartay hain. kya aap hukmaraan say khauf khaaay baghair zindagee guzaarna chaahatay hain? to phir vah kuchh karen jo achchha hai to vah aap ko shaabaash dega. ⁴kyoonki vah allaah ka khaadim hai jo aap kee behatree kay liyay khidmat karta hai. lekin agar aap ghalat kaam karen to daren, kyoonki vah apnee talvaar ko khwaah-m-khwaah thaamay naheen rakhta. vah allaah ka khaadim hai aur us ka ghazab ghalat kaam karnay vaalay par naazil hota hai. ⁵is liyay laazim hai ki aap hukoomat kay taabay rahen, na sirf saza say bachnay kay liyay balki is liyay bhee ki aap kay zameer par daagh na lagay.

⁶yahee vajah hai ki aap taiks ada kartay hain, kyoonki sarkaaree mulaazim allaah kay khaadim hain jo is khidmat ko sar’anjaam denay men lagay rahetay hain. ⁷chunaanchay har ek ko vah kuchh den jo us ka haq hai, taiks lenay vaalay ko taiks aur kastam dyootee lenay vaalay ko kastam dyootee. jis ka khauf rakhna aap par farz hai us ka khauf maanen aur jis ka ehatiraam karna aap par farz hai us ka ehatiraam karen.

ek doosray kay liyay faraaiz

⁸kisee kay bhee qarzdaar na rahen. sirf ek qarz hai jo aap kabhee naheen utaar saktay, ek doosray say muhabbat rakhnay ka qarz. yah kartay rahen kyoonki jo doosron say muhabbat rakhta hai us nay shareeat kay tamaam taqaazay pooray kiay hain. ⁹maslan shareeat men likha hai, “qatl na karna, zina na karna, choree na karna, laalach na karna.” aur deegar jitnay ahkaam hain is ek hee hukm men samaaay huay hain ki “apnay padosee say vaisee muhabbat rakhna jaisee too apnay aap say rakhta hai.” ¹⁰jo kisee say muhabbat rakhta hai vah us say ghalat sulook naheen karta. yoon muhabbat shareeat kay tamaam taqaazay pooray kartee hai.

¹¹aisa karna laazim hai, kyoonki aap khud is vaqt kee ahemiyat ko jaantay hain ki neend say jaag uthnay kee ghadee a chukee hai. kyoonki jab ham eemaan laaay thay to hamaaree najaat itnee qareeb naheen thee jitnee ki ab hai. ¹²raat dhalnay vaalee hai aur din nikalnay vaala hai. is liyay aaen, ham taareekee kay kaam ganday kapdon kee tarah utaar kar noor kay hathiyaar baandh len. ¹³ham shareef zindagee guzaaren, aisay logon kee tarah jo din kee raushnee men chaltay hain. is liyay laazim hai ki ham in cheezon say baaz rahen : badamaston kee rangraliyon aur sharaabnoshee say, zinaakaaree aur ayyaashee say, aur jhagday aur hasad say. ¹⁴is kay bajaay khudaavand eesa maseeh ko pahen len aur apnee puraanee fitrat kee parvarish yoon na karen ki gunaah’aalooda khwaahishaat bedaar ho jaaen.