Romiyon 12

pooree zindagee allaah kee khidmat men

¹bhaaiyo, allaah nay aap par kitna rahem kiya hai! ab zarooree hai ki aap apnay badnon ko allaah kay liyay makhsoos karen, ki vah ek aisee zinda aur muqaddas qurbaanee ban jaaen jo usay pasand aaay. aisa karnay say aap us kee maaqool ibaadat karengay. ²is duniya kay saanchay men na dhal jaaen balki allaah ko aap kee soch kee tajdeed karnay den taaki aap vah shakl-o-soorat apna saken jo usay pasand hai. phir aap allaah kee marzee ko pahechaan sakengay, vah kuchh jo achchha, pasandeeda aur kaamil hai.

³us rahem kee bina par jo allaah nay mujh par kiya main aap men say har ek ko hidaayat deta hoon ki apnee haqeeqee haisiyat ko jaan kar apnay aap ko is say ziyaada na samjhen. kyoonki jis paimaanay say allaah nay har ek ko eemaan bakhsha hai usee kay mutaabiq vah samajhdaaree say apnee haqeeqee haisiyat ko jaan lay. ⁴hamaaray ek hee jism men bahut say aaza hain, aur har ek uzv ka farq farq kaam hota hai. ⁵isi tarah go ham bahut hain, lekin maseeh men ek hee badan hain, jis men har uzv doosron kay saath juda hua hai. ⁶allaah nay apnay fazl say har ek ko mukhtalif nemton say navaaza hai. agar aap kee nemat nubuvvat karna hai to apnay eemaan kay mutaabiq nubuvvat karen. ⁷agar aap kee nemat khidmat karna hai to khidmat karen. agar aap kee nemat taaleem dena hai to taaleem den. ⁸agar aap kee nemat hausalaaafzaaee karna hai to hausalaaafzaaee karen. agar aap kee nemat doosron kee zarooriyaat pooree karna hai to khuloosdilee say yahee karen. agar aap kee nemat raahanumaaee karna hai to sargarmee say raahanumaaee karen. agar aap kee nemat rahem karna hai to khushee say rahem karen.

⁹aap kee muhabbat mahez dikhaavay kee na ho. jo kuchh bura hai us say nafrat karen aur jo kuchh achchha hai us kay saath liptay rahen. ¹⁰aap kee ek doosray kay liyay baraadraana muhabbat sargarm ho. ek doosray kee izzat karnay men aap khud pahela qadam uthaaen. ¹¹aap ka josh dheela na pad jaaay balki ruhaanee sargarmee say khudaavand kee khidmat karen. ¹²ummeed men khush, museebat men saabitqadam aur dua men lagay rahen. ¹³jab muqaddaseen zarooratmand hain to un kee madad karnay men shareek hon. mehamaan-navaazee men lagay rahen.

¹⁴jo aap ko eeza pahunchaaen un ko barkat den. un par laanat mat karen balki barkat chaahen. ¹⁵khushee manaanay vaalon kay saath khushee manaaen aur ronay vaalon kay saath roen. ¹⁶ek doosray kay saath achchhay taalluqaat rakhen. oonchee soch na rakhen balki dabay huon say rifaaqat rakhen. apnay aap ko daana mat samjhen.

¹⁷agar koee aap say bura sulook karay to badlay men us say bura sulook na karna. dhyaan rakhen ki jo kuchh sab kee nazar men achchha hai vahee amal men laaen. ¹⁸apnee taraf say pooree koshish karen ki jahaan tak mumkin ho sab kay saath mel-milaap rakhen. ¹⁹azeezo, intiqaam mat len balki allaah kay ghazab ko badla lenay ka mauqa den. kyoonki kalaam-ay-muqaddas men likha hai, “rabb farmaata hai, intiqaam lena mera hee kaam hai, main hee badla loonga.” ²⁰is kay bajaay “agar tera dushman bhooka ho to usay khaana khila, agar piyaasa ho to paanee pila. kyoonki aisa karnay say too us kay sar par jaltay huay koilon ka dher lagaaega.” ²¹apnay par buraaee ko ghaalib na aanay den balki bhalaaee say aap buraaee par ghaalib aaen.