Romiyon 11

israaeel par allaah ka rahem

¹to kya is ka yah matlab hai ki allaah nay apnee qaum ko radd kiya hai? hargiz naheen! main to khud israaeelee hoon. ibraaheem mera bhee baap hai, aur main binyameen kay qabeelay ka hoon. ²allaah nay apnee qaum ko pahelay say chun liya tha. vah kis tarah usay radd karega! kya aap ko maaloom naheen ki kalaam-ay-muqaddas men ilyaas nabee kay baaray men kya likha hai? ilyaas nay allaah kay saamnay israaeelee qaum kee shikaayat karkay kaha, ³“ai rabb, unhon nay teray nabiyon ko qatl kiya aur teree qurbaanagaahon ko gira diya hai. main akela hee bacha hoon, aur vah mujhay bhee maar daalnay kay darpai hain.” ⁴is par allaah nay usay kya javaab diya? “main nay apnay liyay 7,000 mardon ko bacha liya hai jinhon nay apnay ghutnay baal devta kay saamnay naheen tekay.” ⁵aaj bhee yahee haalat hai. israaeel ka ek chhota hissa bach gaya hai jisay allaah nay apnay fazl say chun liya hai. ⁶aur choonki yah allaah kay fazl say hua hai is liyay yah un kee apnee koshishon say naheen hua. varna fazl fazl hee na raheta.

⁷gharaz, jis cheez kee talaash men israaeel raha vah pooree qaum ko haasil naheen huee balki sirf us kay ek chunay huay hissay ko. baaqee sab ko fazl kay baaray men behiss kar diya gaya, ⁸jis tarah kalaam-ay-muqaddas men likha hai,

“aaj tak allaah nay unhen aisee haalat men rakha hai

ki un kee rooh madahosh hai,

un kee aankhen dekh naheen sakteen

aur un kay kaan sun naheen saktay.”

⁹aur daaood farmaata hai,

“un kee mez un kay liyay phanda aur jaal ban jaaay,

is say vah thokar kha kar apnay ghalat kaamon ka muaavaza paaen.

¹⁰un kee aankhen taareek ho jaaen taaki vah dekh na saken,

un kee kamar hamesha jhukee rahay.”

¹¹to kya allaah kee qaum thokar kha kar yoon gir gaee ki kabhee bahaal naheen hogee? hargiz naheen! us kee khataaon kee vajah say allaah nay ghairyahoodiyon ko najaat paanay ka mauqa diya taaki israaeelee ghairat khaaen. ¹²yoon yahoodiyon kee khataaen duniya kay liyay bharpoor barkat ka baais ban gaeen, aur un ka nuqsaan ghairyahoodiyon kay liyay bharpoor barkat ka baais ban gaya. to phir yah barkat kitnee aur ziyaada hogee jab yahoodiyon kee pooree taadaad is men shaamil ho jaaegee!

ghairyahoodiyon kee najaat

¹³aap ko jo ghairyahoodee hain main yah bataata hoon, allaah nay mujhay ghairyahoodiyon kay liyay rasool banaaya hai, is liyay main apnee is khidmat par zor deta hoon. ¹⁴kyoonki main chaahata hoon ki meree qaum kay log yah dekh kar ghairat khaaen aur un men say kuchh bach jaaen. ¹⁵jab unhen radd kiya gaya to baaqee duniya kee allaah kay saath sulah ho gaee. to phir kya hoga jab unhen dubaara qabool kiya jaaega? yah murdon men say jee uthnay kay baraabar hoga!

¹⁶jab aap fasal kay pahelay aatay say rotee bana kar allaah kay liyay makhsoos-o-muqaddas kartay hain to baaqee saara aata bhee makhsoos-o-muqaddas hai. aur jab darakht kee jaden muqaddas hain to us kee shaakhen bhee muqaddas hain. ¹⁷zaitoon kay darakht kee kuchh shaakhen tod dee gaee hain aur un kee jagah janglee zaitoon kay darakht kee ek shaakh paivand kee gaee hai. aap ghairyahoodee is janglee shaakh say mutaabiqat rakhtay hain. jis tarah yah doosray darakht kee jad say ras aur taqviyat paatee hai usee tarah aap bhee yahoodee qaum kee ruhaanee jad say taqviyat paatay hain. ¹⁸chunaanchay aap ka doosree shaakhon kay saamnay shekhee maarnay ka haq naheen. aur agar aap shekhee maaren to yah khayaal karen ki aap jad ko qaaim naheen rakhtay balki jad aap ko.

¹⁹shaayad aap is par etiraaz karen, “haan, lekin doosree shaakhen todee gaeen taaki main paivand kiya jaaoon.” ²⁰beshak, lekin yaad rakhen, doosree shaakhen is liyay todee gaeen ki vah eemaan naheen rakhtee theen aur aap is liyay un kee jagah lagay hain ki aap eemaan rakhtay hain. chunaanchay apnay aap par fakhar na karen balki khauf rakhen. ²¹allaah nay aslee shaakhen bachnay na deen. agar aap is tarah kee harkaten karen to kya vah aap ko chhod dega? ²²yahaan hamen allaah kee meharbaanee aur sakhtee nazar aatee hai - jo gir gaay hain un kay silsilay men us kee sakhtee, lekin aap kay silsilay men us kee meharbaanee. aur yah meharbaanee rahegee jab tak aap us kee meharbaanee say liptay rahengay. varna aap ko bhee darakht say kaat daala jaaega. ²³aur agar yahoodee apnay kufr say baaz aaen to un kee paivandakaaree dubaara darakht kay saath kee jaaegee, kyoonki allaah aisa karnay par qaadir hai. ²⁴aakhir aap khud qudratee taur par zaitoon kay janglee darakht kee shaakh thay jisay allaah nay tod kar qudratee qavaaneen kay khilaaf zaitoon kay asal darakht par lagaaya. to phir vah kitnee ziyaada aasaanee say yahoodiyon kee todee gaee shaakhen dubaara un kay apnay darakht men laga dega!

allaah ka rahem sab par

²⁵bhaaiyo, main chaahata hoon ki aap ek bhed say vaaqif ho jaaen, kyoonki yah aap ko apnay aap ko daana samajhnay say baaz rakhega. bhed yah hai ki israaeel ka ek hissa allaah kay fazl kay baaray men behiss ho gaya hai, aur us kee yah haalat us vaqt tak rahegee jab tak ghairyahoodiyon kee pooree taadaad allaah kee baadshaahee men daakhil na ho jaaay. ²⁶phir poora israaeel najaat paaega. yah kalaam-ay-muqaddas men bhee likha hai,

“chhudaanay vaala siyyoon say aaega.

vah bedeenee ko yaaqoob say hata dega.

²⁷aur yah mera un kay saath ahd hogaa

jab main un kay gunaahon ko un say door karoonga.”

²⁸choonki yahoodee allaah kee khushkhabaree qabool naheen kartay is liyay vah allaah kay dushman hain, aur yah baat aap kay liyay faaiday ka baais ban gaee hai. to bhee vah allaah ko piyaaray hain, is liyay ki us nay un kay baapdaada ibraaheem, ishaaq aur yaaqoob ko chun liya tha. ²⁹kyoonki jab bhee allaah kisee ko apnee nemton say navaaz kar bulaata hai to us kee yah nemten aur bulaavay kabhee naheen mitnay kee. ³⁰maazee men ghairyahoodee allaah kay taabay naheen thay, lekin ab allaah nay aap par yahoodiyon kee naafarmaanee kee vajah say rahem kiya hai. ³¹ab is kay ulat hai ki yahoodee khud aap par kiay gaay rahem kee vajah say allaah kay taabay naheen hain, aur laazim hai ki allaah un par bhee rahem karay. ³²kyoonki us nay sab ko naafarmaanee kay qaidee bana diya hai taaki sab par rahem karay.

allaah kee tamjeed

³³vaah! allaah kee daulat, hikmat aur ilm kya hee gahera hai. kaun us kay faislon kee tah tak pahunch sakta hai! kaun us kee raahon ka khoj laga sakta hai! ³⁴kalaam-ay-muqaddas yoon farmaata hai,

“kis nay rabb kee soch ko jaana?

ya kaun itna ilm rakhta hai

ki vah usay mashvra day? ³⁵kya kisee nay kabhee usay kuchh diyaa

ki usay is ka muaavaza dena paday?”

³⁶kyoonki sab kuchh usee nay paida kiya hai, sab kuchh usee kay zareeay aur usee kay jalaal kay liyay qaaim hai. usee kee tamjeed abad tak hotee rahay! aameen.