Romiyon 10

¹bhaaiyo, meree dilee aarzoo aur meree allaah say dua yah hai ki israaeeliyon ko najaat milay. ²main is kee tasdeeq kar sakta hoon ki vah allaah kee ghairat rakhtay hain. lekin is ghairat kay peechhay ruhaanee samajh naheen hotee. ³vah us raastbaazee say naavaaqif rahay hain jo allaah kee taraf say hai. is kee bajaay vah apnee zaatee raastbaazee qaaim karnay kee koshish kartay rahay hain. yoon unhon nay apnay aap ko allaah kee raastbaazee kay taabay naheen kiya. ⁴kyoonki maseeh men shareeat ka maqsad poora ho gaya, haan vah anjaam tak pahunch gaee hai. chunaanchay jo bhee maseeh par eemaan rakhta hai vahee raastbaaz thaherta hai.

sab kay liyay raastbaazee

⁵moosa nay us raastbaazee kay baaray men likha jo shareeat say haasil hotee hai, “jo shakhs yoon karega vah jeeta rahega.” ⁶lekin jo raastbaazee eemaan say haasil hotee hai vah kahetee hai, “apnay dil men na kahena ki ‘kaun aasmaan par chadhega?’ (taaki maseeh ko neechay lay aaay). ⁷yah bhee na kahena ki ‘kaun paataal men utrega?’ (taaki maseeh ko murdon men say vaapas lay aaay).” ⁸to phir kya karna chaahiay? eemaan kee raastbaazee farmaatee hai, “yah kalaam teray qareeb balki teray munh aur dil men maujood hai.” kalaam say muraad eemaan ka vah paighaam hai jo ham sunaatay hain. ⁹yaanee yah ki agar too apnay munh say iqraar karay ki eesa khudaavand hai aur dil say eemaan laaay ki allaah nay usay murdon men say zinda kar diya to tujhay najaat milegee. ¹⁰kyoonki jab ham dil say eemaan laatay hain to allaah hamen raastbaaz qaraar deta hai, aur jab ham apnay munh say iqraar kartay hain to hamen najaat miltee hai. ¹¹yoon kalaam-ay-muqaddas farmaata hai, “jo bhee us par eemaan laaay usay sharminda naheen kiya jaaega.” ¹²is men koee farq naheen ki vah yahoodee ho ya ghairyahoodee. kyoonki sab ka ek hee khudaavand hai, jo fayyaazee say har ek ko deta hai jo usay pukaarta hai. ¹³kyoonki “jo bhee khudaavand ka naam lega najaat paaega.”

¹⁴lekin vah kis tarah usay pukaar sakengay agar vah us par kabhee eemaan naheen laaay? aur vah kis tarah us par eemaan la saktay hain agar unhon nay kabhee us kay baaray men suna naheen? aur vah kis tarah us kay baaray men sun saktay hain agar kisee nay unhen yah paighaam sunaaya naheen? ¹⁵aur sunaanay vaalay kis tarah doosron kay paas jaaengay agar unhen bheja na gaya? is liyay kalaam-ay-muqaddas farmaata hai, “un kay qadam kitnay piyaaray hain jo khushkhabaree sunaatay hain.” ¹⁶lekin sab nay allaah kee yah khushkhabaree qabool naheen kee. yoon yasaayaah nabee farmaata hai, “ai rabb, kaun hamaaray paighaam par eemaan laaya?” ¹⁷gharaz, eemaan paighaam sunnay say paida hota hai, yaanee maseeh ka kalaam sunnay say.

¹⁸to phir savaal yah hai ki kya israaeeliyon nay yah paighaam naheen suna? unhon nay isay zaroor suna. kalaam-ay-muqaddas men likha hai,

“un kee aavaaz nikal kar pooree duniya men sunaaee dee,

un kay alfaaz duniya kee intiha tak pahunch gaay.”

¹⁹to kya israaeel ko is baat kee samajh na aaee? naheen, usay zaroor samajh aaee. pahelay moosa is ka javaab deta hai,

“main khud hee tumhen ghairat dilaaoonga,

ek aisee qaum kay zareeay jo haqeeqat men qaum naheen hai.

ek naadaan qaum kay zareeay main tumhen ghussa dilaaoonga.”

²⁰aur yasaayaah nabee yah kahenay kee jur’at karta hai,

“jo mujhay talaash naheen kartay the

unhen main nay mujhay paanay ka mauqa diya,

jo meray baaray men darayaaft naheen kartay the

un par main zaahir hua.”

²¹lekin israaeel kay baaray men vah farmaata hai,

“din bhar main nay apnay haath phailaaay rakhe

taaki ek naaframaan aur sarkash qaum ka istiqbaal karoon.”