Romiyon 1

salaam

¹yah khat maseeh eesa kay ghulaam paulus kee taraf say hai jisay rasool honay kay liyay bulaaya aur allaah kee khushkhabaree kee munaadee karnay kay liyay alag kiya gaya hai.

²paak navishton men darj is khushkhabaree ka vaada allaah nay pahelay hee apnay nabiyon say kar rakha tha. ³aur yah paighaam us kay farzand eesa kay baaray men hai. insaanee lihaaz say vah daaood kee nasal say paida hua, ⁴jabki rooh-ul-quds kay lihaaz say vah qudrat kay saath allaah ka farzand thahera jab vah murdon men say jee utha. yah hai hamaaray khudaavand eesa maseeh kay baaray men allaah kee khushkhabaree. ⁵maseeh say hamen rasoolee ikhtiyaar ka yah fazl haasil hua hai ki ham tamaam ghairyahoodiyon men munaadee karen taaki vah eemaan la kar us kay taabay ho jaaen aur yoon maseeh kay naam ko jalaal milay. ⁶aap bhee un ghairyahoodiyon men say hain, jo eesa maseeh kay bulaaay huay hain.

⁷main aap sab ko likh raha hoon jo rom men allaah kay piyaaray hain aur makhsoos-o-muqaddas honay kay liyay bulaaay gaay hain.

khuda hamaara baap aur khudaavand eesa maseeh aap ko fazl aur salaamatee ata karen.

rom jaanay kee aarzoo

⁸avval, main aap sab kay liyay eesa maseeh kay vaseelay say apnay khuda ka shukr karta hoon, kyoonki pooree duniya men aap kay eemaan ka charcha ho raha hai. ⁹khuda hee mera gavaah hai jis kee khidmat main apnee rooh men karta hoon jab main us kay farzand kay baaray men khushkhabaree phailaata hoon, main lagaataar aap ko yaad karta raheta hoon ¹⁰aur har vaqt apnee duaaon men minnat karta hoon ki allaah mujhay aakhirkaar aap kay paas aanay kee kaamyaabee ata karay. ¹¹kyoonki main aap say milnay ka aarzoomand hoon. main chaahata hoon ki meray zareeay aap ko kuchh ruhaanee barkat mil jaaay aur yoon aap mazboot ho jaaen. ¹²yaanee aanay ka maqsad yah hai ki meray eemaan say aap kee hausalaaafzaaee kee jaaay aur isi tarah aap kay eemaan say mera hausla bhee badh jaaay.

¹³bhaaiyo, aap kay ilm men ho ki main nay bahut dafa aap kay paas aanay ka iraada kiya. kyoonki jis tarah deegar ghairyahoodee aqvaam men meree khidmat say phal paida hua hai usee tarah aap men bhee phal dekhna chaahata hoon. lekin aaj tak mujhay roka gaya hai. ¹⁴baat yah hai ki yah khidmat sar’anjaam dena mera farz hai, khwaah yoonaaniyon men ho ya ghairyoonaaniyon men, khwaah daanaaon men ho ya naadaanon men. ¹⁵yahee vajah hai ki main aap ko bhee jo rom men rahetay hain allaah kee khushkhabaree sunaanay ka mushtaaq hoon.

allaah kee khushkhabaree kee qudrat

¹⁶main to khushkhabaree kay sabab say sharmaata naheen, kyoonki yah allaah kee qudrat hai jo har ek ko jo eemaan laata hai najaat detee hai, pahelay yahoodiyon ko, phir ghairyahoodiyon ko. ¹⁷kyoonki is khushkhabaree men allaah kee hee raastbaazee zaahir hotee hai, vah raastbaazee jo shuroo say aakhir tak eemaan par mabnee hai. yahee baat kalaam-ay-muqaddas men darj hai jab likha hai, “raastbaaz eemaan hee say jeeta rahega.”

insaan par allaah ka ghazab

¹⁸lekin allaah ka ghazab aasmaan par say un tamaam bedeen aur naaraast logon par naazil hota hai jo sachchaaee ko apnee naaraastee say dabaaay rakhtay hain. ¹⁹jo kuchh allaah kay baaray men maaloom ho sakta hai vah to un par zaahir hai, haan allaah nay khud yah un par zaahir kiya hai. ²⁰kyoonki duniya kee takhleeq say lay kar aaj tak insaan allaah kee andekhee fitrat yaanee us kee azlee qudrat aur uloohiyat makhlooqaat ka mushaahada karnay say pahechaan sakta hai. is liyay un kay paas koee uzr naheen. ²¹allaah ko jaannay kay baavujood unhon nay usay vah jalaal na diya jo us ka haq hai, na us ka shukr ada kiya balki vah baatil khayaalaat men pad gaay aur un kay besamajh dilon par taareekee chha gaee. ²²vah daava to kartay thay ki ham daana hain, lekin ahemaq saabit huay. ²³yoon unhon nay ghairfaanee khuda ko jalaal denay kay bajaay aisay buton kee pooja kee jo faanee insaan, parindon, chaupaaiyon aur rengnay vaalay jaanvaron kee soorat men banaaay gaay thay.

²⁴is liyay allaah nay unhen un najis kaamon men chhod diya jo un kay dil karna chaahatay thay. nateejay men un kay jism ek doosray say behurmat hotay rahay. ²⁵haan, unhon nay allaah kay baaray men sachchaaee ko radd karkay jhoot ko apna liya aur makhlooqaat kee parastish aur khidmat kee, na ki khaaliq kee, jis kee taareef abad tak hotee rahay, aameen.

²⁶yahee vajah hai ki allaah nay unhen un kee sharmanaak shahevaton men chhod diya. un kee khavaateen nay fitratee jinsee taalluqaat kay bajaay ghairfitratee taalluqaat rakhay. ²⁷isi tarah mard khavaateen kay saath fitratee taalluqaat chhod kar ek doosray kee shahevat men mast ho gaay. mardon nay mardon kay saath behaya harkaten karkay apnay badnon men apnee is gumraahee ka munaasib badla paaya.

²⁸aur choonki unhon nay allaah ko jaannay say inkaar kar diya is liyay us nay unhen un kee makrooh soch men chhod diya. aur is liyay vah aisee harkaten kartay rahetay hain jo kabhee naheen karnee chaahien. ²⁹vah har tarah kee naaraastee, shar, laalach aur buraaee say bharay huay hain. vah hasad, khoonrezee, jhagday, fareb aur keenaavree say labrez hain. vah chughlee khaanay vaalay, ³⁰tuhamat lagaanay vaalay, allaah say nafrat karnay vaalay, sarkash, maghroor, shekheebaaz, badee ko eejaad karnay vaalay, maan-baap kay naaframaan, ³¹besamajh, bevafa, sangdil aur berahem hain. ³²agarchi vah allaah ka farmaan jaantay hain ki aisa karnay vaalay saza-ay-maut kay mustahiq hain to bhee vah aisa kartay hain. na sirf yah balki vah aisa karnay vaalay deegar logon ko shaabaash bhee detay hain.