Mukaashfa 9

¹phir paanchven farishtay nay apnay turam men phoonk maaree. is par main nay ek sitaara dekha jo aasmaan say zameen par gir gaya tha. is sitaaray ko athaah gadhay kay raastay kee chaabee dee gaee. ²us nay athaah gadhay ka raasta khol diya to us say dhuaan nikal kar oopar aaya, yoon jaisay dhuaan kisee baday bhattay say nikalta hai. sooraj aur chaand athaah gadhay kay is dhuen say taareek ho gaay. ³aur dhuen men say tiddiyaan nikal kar zameen par utar aaeen. unhen zameen kay bichhooon jaisa ikhtiyaar diya gaya. ⁴unhen bataaya gaya, “na zameen kee ghaas, na kisee pauday ya darakht ko nuqsaan pahunchaao balki sirf un logon ko jin kay maathon par allaah kee muhar naheen lagee hai.” ⁵tiddiyon ko in logon ko maar daalnay ka ikhtiyaar na diya gaya balki unhen bataaya gaya ki vah paanch maheenon tak in ko aziyat den. aur yah aziyat us takleef kee maanind hai jo tab paida hotee hai jab bichchhoo kisee ko dank maarta hai. ⁶un paanch maheenon kay dauraan log maut kee talaash men rahengay, lekin usay paaengay naheen. vah mar jaanay kee shadeed aarzoo karengay, lekin maut un say bhaag kar door rahegee.

⁷tiddiyon kee shakl-o-soorat jang kay liyay tayyaar ghodon kee maanind thee. un kay saron par sonay kay taajon jaisee cheezen theen aur un kay chiharay insaanon kay chiharon kee maanind thay. ⁸un kay baal khavaateen kay baalon kee maanind aur un kay daant sherbabar kay daanton jaisay thay. ⁹yoon laga jaisay un kay seenon par lohay kay say ziraabaktar lagay huay thay, aur un kay paron kee aavaaz beshumaar rathon aur ghodon kay shor jaisee thee jab vah mukhaalif par jhapat rahay hotay hon. ¹⁰un kee dum par bichchhoo ka sa dank laga tha aur unhen in hee dumon say logon ko paanch maheenon tak nuqsaan pahunchaanay ka ikhtiyaar tha. ¹¹un ka baadshaah athaah gadhay ka farishta hai jis ka ibraanee naam abaddon aur yoonaanee naam apulliyon (halaakoo) hai.

¹²yoon pahela afsos guzar gaya, lekin is kay baad do mazeed afsos honay vaalay hain.

¹³chhatay farishtay nay apnay turam men phoonk maaree. is par main nay ek aavaaz sunee jo allaah kay saamnay vaaqay sonay kee qurbaangaah kay chaar konon par lagay seengon say aaee. ¹⁴is aavaaz nay chhata turam pakday huay farishtay say kaha, “un chaar farishton ko khula chhod dena jo baday darya banaam furaat kay paas bandhay huay hain.” ¹⁵in chaar farishton ko isee maheenay kay isee din kay isee ghantay kay liyay tayyaar kiya gaya tha. ab inhen khula chhod diya gaya taaki vah insaanon ka teesra hissa maar daalen. ¹⁶mujhay bataaya gaya ki ghodon par savaar faujee bees karod thay. ¹⁷roya men ghoday aur savaar yoon nazar aaay : seenon par lagay ziraabaktar aag jaisay surkh, neelay aur gandhak jaisay peelay thay. ghodon kay sar sherbabar kay saron say mutaabiqat rakhtay thay aur un kay munh say aag, dhuaan aur gandhak nikaltee thee. ¹⁸aag, dhuen aur gandhak kee in teen balaaon say insaanon ka teesra hissa halaak hua. ¹⁹har ghoday kee taaqat us kay munh aur dum men thee, kyoonki un kee dumen saamp kee maanind theen jin kay sar nuqsaan pahunchaatay thay.

²⁰jo in balaaon say halaak naheen huay thay balki abhee baaqee thay unhon nay phir bhee apnay haathon kay kaamon say tauba na kee. vah badroohon aur sonay, chaandee, peetal, patthar aur lakdee kay buton kee pooja say baaz na aaay haalaanki aisee cheezen na to dekh saktee hain, na sunnay ya chalnay kay qaabil hotee hain. ²¹vah qatl-o-ghaarat, jaadoogree, zinaakaaree aur choriyon say bhee tauba karkay baaz na aaay.