Mukaashfa 8

saatveen muhar

¹jab lelay nay saatveen muhar kholee to aasmaan par khaamoshee chha gaee. yah khaamoshee taqreeban aadhay ghantay tak rahee. ²phir main nay allaah kay saamnay khaday saat farishton ko dekha. unhen saat turam diay gaay.

³ek aur farishta jis kay paas sonay ka bakhooradaan tha a kar qurbaangaah kay paas khada ho gaya. usay bahut sa bakhoor diya gaya taaki vah usay muqaddaseen kee duaaon kay saath takht kay saamnay kee sonay kee qurbaangaah par pesh karay. ⁴bakhoor ka dhuaan muqaddaseen kee duaaon kay saath farishtay kay haath say uthtay uthtay allaah kay saamnay pahuncha. ⁵phir farishtay nay bakhooradaan ko liya aur usay qurbaangaah kee aag say bhar kar zameen par phaink diya. tab kadaktee aur garajtee aavaazen sunaaee deen, bijlee chamaknay lagee aur zalzla a gaya.

turmon ka asar

⁶phir jin saat farishton kay paas saat turam thay vah unhen bajaanay kay liyay tayyaar huay.

⁷pahelay farishtay nay apnay turam ko baja diya. is par olay aur khoon kay saath milaaee gaee aag paida ho kar zameen par barsaaee gaee. is say zameen ka teesra hissa, darakhton ka teesra hissa aur tamaam haree ghaas bhasm ho gaee.

⁸phir doosray farishtay nay apnay turam men phoonk maaree. is par jaltee huee ek badee pahaadanuma cheez ko samundar men phainka gaya. samundar ka teesra hissa khoon men badal gaya, ⁹samundar men maujood zinda makhlooqaat ka teesra hissa halaak aur baheree jahaazon ka teesra hissa tabaah ho gaya.

¹⁰phir teesray farishtay nay apnay turam men phoonk maaree. is par mash’al kee tarah bhadakta hua ek bada sitaara aasmaan say daryaaon kay teesray hissay aur paanee kay chashmon par gir gaya. ¹¹is sitaaray ka naam afsanteen tha aur is say paanee ka teesra hissa afsanteen jaisa kadva ho gaya. bahut say log yah kadva paanee peenay say mar gaay.

¹²phir chauthay farishtay nay apnay turam men phoonk maaree. is par sooraj ka teesra hissa, chaand ka teesra hissa aur sitaaron ka teesra hissa raushnee say maheroom ho gaya. din ka teesra hissa raushnee say maheroom hua aur isee tarah raat ka teesra hissa bhee.

¹³phir dekhtay dekhtay main nay ek uqaab ko suna jis nay meray sar kay oopar hee bulandiyon par udtay huay oonchee aavaaz say pukaara, “afsos! afsos! zameen kay baashindon par afsos! kyoonki teen farishton kay turmon kee aavaazen abhee baaqee hain.”