Mukaashfa 7

israaeel kay 1,44,000 chunay huay afraad

¹is kay baad main nay chaar farishton ko zameen kay chaar konon par khaday dekha. vah zameen kee chaar havaaon ko chalnay say rok rahay thay taaki na zameen par, na samundar ya kisee darakht par koee hava chalay. ²phir main nay ek aur farishta mashriq say chadhtay huay dekha jis kay paas zinda khuda kee muhar thee. us nay oonchee aavaaz say un chaar farishton say baat kee jinhen zameen aur samundar ko nuqsaan pahunchaanay ka ikhtiyaar diya gaya tha. us nay kaha, ³“zameen, samundar ya darakhton ko us vaqt tak nuqsaan mat pahunchaana jab tak ham apnay khuda kay khaadimon kay maathon par muhar na laga len.” ⁴aur main nay suna ki jin par muhar lagaaee gaee thee vah 1,44,000 afraad thay aur vah israaeel kay har ek qabeelay say thay : ⁵12,000 yahoodaah say, 12,000 roobin say, 12,000 jad say, ⁶12,000 aashar say, 12,000 naftaalee say, 12,000 manassee say, ⁷12,000 shamaaoon say, 12,000 laavee say, 12,000 ishkaar say, ⁸12,000 zabooloon say, 12,000 yoosuf say aur 12,000 binyameen say.

allaah kay huzoor ek bada hujoom

⁹is kay baad main nay ek hujoom dekha jo itna bada tha ki usay gina naheen ja sakta tha. us men har millat, har qabeelay, har qaum aur har zabaan kay afraad safed libaas pahenay huay takht aur lelay kay saamnay khaday thay. un kay haathon men khajoor kee daaliyaan theen. ¹⁰aur vah oonchee aavaaz say chilla chilla kar kah rahay thay, “najaat takht par baithay huay hamaaray khuda aur lelay kee taraf say hai.” ¹¹tamaam farishtay takht, buzurgon aur chaar jaandaaron kay ird-gird khaday thay. unhon nay takht kay saamnay gir kar allaah ko sijda kiyaa ¹²aur kaha, “aameen! hamaaray khuda kee azal say abad tak sitaaish, jalaal, hikmat, shukrguzaaree, izzat, qudrat aur taaqat haasil rahay. aameen!”

¹³buzurgon men say ek nay mujh say poochha, “safed libaas pahenay huay yah log kaun hain aur kahaan say aaay hain?”

¹⁴main nay javaab diya, “meray aaqa, aap hee jaantay hain.”

us nay kaha, “yah vahee hain jo badee eezaarasaanee say nikal kar aaay hain. unhon nay apnay libaas lelay kay khoon men dho kar safed kar liyay hain. ¹⁵is liyay vah allaah kay takht kay saamnay khaday hain aur din raat us kay ghar men us kee khidmat kartay hain. aur takht par baitha hua un ko panaah dega. ¹⁶is kay baad na kabhee bhook unhen sataaegee na piyaas. na dhoop, na kisee aur qism kee taptee garmee unhen jhulasaaegee. ¹⁷kyoonki jo lela takht kay darmiyaan baitha hai vah un kee gallaabaanee karega aur unhen zindagee kay chashmon kay paas lay jaaega. aur allaah un kee aankhon say tamaam aansoo ponchh daalega.”