Mukaashfa 6

muharen todee jaatee hain

¹phir main nay dekha, lelay nay saat muharon men say pahelee muhar ko khola. is par main nay chaar jaandaaron men say ek ko jis kee aavaaz kadaktay baadlon kee maanind thee yah kahetay huay suna, “a!” ²meray dekhtay dekhtay ek safed ghoda nazar aaya. us kay savaar kay haath men kamaan thee, aur usay ek taaj diya gaya. yoon vah faatih kee haisiyat say aur fatah paanay kay liyay vahaan say nikla.

³lelay nay doosree muhar kholee to main nay doosray jaandaar ko kahetay huay suna ki “a!” ⁴is par ek aur ghoda nikla jo aag jaisa surkh tha. us kay savaar ko duniya say sulah-salaamatee chheennay ka ikhtiyaar diya gaya taaki log ek doosray ko qatl karen. usay ek badee talvaar pakdaaee gaee.

⁵lelay nay teesree muhar kholee to main nay teesray jaandaar ko kahetay huay suna ki “a!” meray dekhtay dekhtay ek kaala ghoda nazar aaya. us kay savaar kay haath men taraazoo tha. ⁶aur main nay chaaron jaandaaron men say goya ek aavaaz sunee jis nay kaha, “ek din kee mazdooree kay liyay ek kilograam gandum, aur ek din kee mazdooree kay liyay teen kilograam jau. lekin tel aur mai ko nuqsaan mat pahunchaana.”

⁷lelay nay chauthee muhar kholee to main nay chauthay jaandaar ko kahetay suna ki “a!” ⁸meray dekhtay dekhtay ek ghoda nazar aaya jis ka rang halka peela sa tha. us kay savaar ka naam maut tha, aur paataal us kay peechhay peechhay chal rahee thee. unhen zameen ka chautha hissa qatl karnay ka ikhtiyaar diya gaya, khwaah talvaar, kaal, muhalak vaba ya vaheshee jaanvaron kay zareeay say ho.

⁹lelay nay paanchveen muhar kholee to main nay qurbaangaah kay neechay un kee roohen dekheen jo allaah kay kalaam aur apnee gavaahee qaaim rakhnay kee vajah say shaheed ho gaay thay. ¹⁰unhon nay oonchee aavaaz say chilla kar kaha, “ai qaadir-ay-mutlaq, quddoos aur sachchay rabb, kitnee der aur lagegee? too kab tak zameen kay baashindon kee adaalat karkay hamaaray shaheed honay ka intiqaam na lega?” ¹¹tab un men say har ek ko ek safed libaas diya gaya, aur unhen samjhaaya gaya ki “mazeed thodee der aaraam karo, kyoonki pahelay tumhaaray hamkhidmat bhaaiyon men say utnon ko shaheed ho jaana hai jitnon kay liyay yah muqarrar hai.”

¹²lelay nay chhatee muhar kholee to main nay ek shadeed zalzla dekha. sooraj bakree kay baalon say banay taat kee maanind kaala ho gaya, poora chaand khoon jaisa nazar aanay lagaa ¹³aur aasmaan kay sitaaray zameen par yoon gir gaay jis tarah anjeer kay darakht par lagay aakhiree anjeer tez hava kay jhonkon say gir jaatay hain. ¹⁴aasmaan toomaar kee tarah jab usay lapet kar band kiya jaata hai peechhay hat gaya. aur har pahaad aur jazeera apnee apnee jagah say khisak gaya. ¹⁵phir zameen kay baadshaah, shahzaaday, jarnail, ameer, asar-o-rasookh vaalay, ghulaam aur aazaad sab kay sab ghaaron men aur pahaadee chataanon kay darmiyaan chhup gaay. ¹⁶unhon nay chilla kar pahaadon aur chataanon say minnat kee, “ham par gir kar hamen takht par baithay huay kay chiharay aur lelay kay ghazab say chhupa lo. ¹⁷kyoonki un kay ghazab ka azeem din a gaya hai, aur kaun qaaim rah sakta hai?”