Mukaashfa 5
saat muharon vaala toomaar
1phir main nay takht par baithnay vaalay kay dahenay haath men ek toomaar dekha jis par donon taraf likha hua tha aur jis par saat muharen lagee theen. 2aur main nay ek taaqatvar farishta dekha jis nay oonchee aavaaz say elaan kiya, “kaun muharon ko tod kar toomaar ko kholnay kay laaiq hai?” 3lekin na aasmaan par, na zameen par aur na zameen kay neechay koee tha jo toomaar ko khol kar us men nazar daal sakta. 4main khoob ro pada, kyoonki koee is laaiq na paaya gaya ki vah toomaar ko khol kar us men nazar daal sakta. 5lekin buzurgon men say ek nay mujh say kaha, “mat ro. dekh, yahoodaah qabeelay kay sherbabar aur daaood kee jad nay fatah paaee hai, aur vahee toomaar kee saat muharon ko khol sakta hai.”
6phir main nay ek lela dekha jo takht kay darmiyaan khada tha. vah chaar jaandaaron aur buzurgon say ghira hua tha aur yoon lagta tha ki usay zabah kiya gaya ho. us kay saat seeng aur saat aankhen theen. in say muraad allaah kee vah saat roohen hain jinhen duniya kee har jagah bheja gaya hai. 7lelay nay a kar takht par baithnay vaalay kay dahenay haath say toomaar ko lay liya. 8aur letay vaqt chaar jaandaar aur 24 buzurg lelay kay saamnay munh kay bal gir gaay. har ek kay paas ek sarod aur bakhoor say bharay sonay kay piyaalay thay. in say muraad muqaddaseen kee duaaen hain. 9saath saath vah ek naya geet gaanay lagay,
“too toomaar ko lay kar
us kee muharon ko kholnay kay laaiq hai.
kyoonki tujhay zabah kiya gaya, aur apnay khoon se
too nay logon ko har qabeelay, har ahel-ay-zabaan, har millat aur har qaum se
allaah kay liyay khareed liya hai.
10too nay unhen shaahee ikhtiyaar day kar
hamaaray khuda kay imaam bana diya hai.
aur vah duniya men hukoomat karengay.”
11main nay dubaara dekha to beshumaar farishton kee aavaaz sunee. vah takht, chaar jaandaaron aur buzurgon kay ird-gird khade 12oonchee aavaaz say kah rahay thay,
“laaiq hai vah lela jo zabah kiya gaya hai.
vah qudrat, daulat, hikmat aur taaqat,
izzat, jalaal aur sitaaish paanay kay laaiq hai.”
13phir main nay aasmaan par, zameen par, zameen kay neechay aur samundar kee har makhlooq kee aavaazen suneen. haan, kaainaat kee sab makhlooqaat yah ga rahay thay,
“takht par baithnay vaalay aur lelay kee sitaaish aur izzat,
jalaal aur qudrat azal say abad tak rahay.”
14chaar jaandaaron nay javaab men “aameen” kaha, aur buzurgon nay gir kar sijda kiya.