Mukaashfa 4

aasmaan par allaah kee parastish

¹is kay baad main nay dekha ki aasmaan men ek darvaaza khula hua hai aur turam kee see aavaaz nay jo main nay pahelay sunee thee kaha, “idhar oopar a. phir main tujhay vah kuchh dikhaaoonga jisay is kay baad pesh aana hai.” ²tab rooh-ul-quds nay mujhay fauran apnee girift men lay liya. vahaan aasmaan par ek takht tha jis par koee baitha tha. ³aur baithnay vaala dekhnay men yashab aur aqeeq say mutaabiqat rakhta tha. takht kay ird-gird qaus-ay-quzah thee jo dekhnay men zumurrad kee maanind thee. ⁴yah takht 24 takhton say ghira hua tha jin par 24 buzurg baithay thay. buzurgon kay libaas safed thay aur har ek kay sar par sonay ka taaj tha. ⁵darmiyaanee takht say bijlee kee chamken, aavaazen aur baadal kee garjen nikal rahee theen. aur takht kay saamnay saat mash’alen jal rahee theen. yah allaah kee saat roohen hain. ⁶takht kay saamnay sheeshay ka sa samundar bhee tha jo billaur say mutaabiqat rakhta tha.

beech men takht kay ird-gird chaar jaandaar thay jin kay jismon par har jagah aankhen hee aankhen theen, saamnay vaalay hissay par bhee aur peechhay vaalay hissay par bhee. ⁷pahela jaandaar sherbabar jaisa tha, doosra bail jaisa, teesray ka insaan jaisa chihara tha aur chautha udtay huay uqaab kee maanind tha. ⁸in chaar jaandaaron men say har ek kay chhah par thay aur jism par har jagah aankhen hee aankhen theen, baahar bhee aur andar bhee. din raat vah bilaanaagha kahetay rahetay hain,

“quddoos, quddoos, quddoos hai rabb qaadir-ay-mutlaq khuda,

jo tha, jo hai aur jo aanay vaala hai.”

⁹yoon yah jaandaar us kee tamjeed, izzat aur shukr kartay hain jo takht par baitha hai aur abad tak zinda hai. jab bhee vah yah kartay hain ¹⁰to 24 buzurg takht par baithnay vaalay kay saamnay munh kay bal ho kar usay sijda kartay hain jo azal say abad tak zinda hai. saath saath vah apnay sonay kay taaj takht kay saamnay rakh kar kahetay hain,

¹¹“ai rabb hamaaray khuda,

too jalaal, izzat aur qudrat kay laaiq hai.

kyoonki too nay sab kuchh khalaq kiya.

tamaam cheezen teree hee marzee say theen aur paida hueen.”