Mukaashfa 3

sardees kay liyay paighaam

¹sardees men maujood jamaaat kay farishtay ko yah likh dena :

yah us ka farmaan hai jo allaah kee saat roohon aur saat sitaaron ko apnay haath men thaamay rakhta hai. main teray kaamon ko jaanta hoon. too zinda to kahelaata hai lekin hai murda. ²jaag uth! jo baaqee rah gaya hai aur marnay vaala hai usay mazboot kar. kyoonki main nay teray kaam apnay khuda kee nazar men mukammal naheen paaay. ³chunaanchay jo kuchh tujhay mila hai aur jo too nay suna hai usay yaad rakhna. usay mahfooz rakh aur tauba kar. agar too bedaar na ho to main chor kee tarah aaoonga aur tujhay maaloom naheen hoga ki main kab tujh par aan padoonga. ⁴lekin sardees men teray kuchh aisay log hain jinhon nay apnay libaas aalooda naheen kiay. vah safed kapday pahenay huay meray saath chalen phirengay, kyoonki vah is kay laaiq hain. ⁵jo ghaalib aaega vah bhee un kee tarah safed kapday pahenay huay phirega. main us ka naam kitaab-ay-hayaat say naheen mitaaoonga balki apnay baap aur us kay farishton kay saamnay iqraar karoonga ki yah mera hai.

⁶jo sun sakta hai vah sun lay ki rooh-ul-quds jamaaaton ko kya kuchh bata raha hai.

filadilfiya kay liyay paighaam

⁷filadilfiya men maujood jamaaat kay farishtay ko yah likh dena :

yah us ka farmaan hai jo quddoos aur sachcha hai, jis kay haath men daaood kee chaabee hai. jo kuchh vah kholta hai usay koee band naheen kar sakta, aur jo kuchh vah band kar deta hai usay koee khol naheen sakta. ⁸main teray kaamon ko jaanta hoon. dekh, main nay teray saamnay ek aisa darvaaza khol rakha hai jisay koee band naheen kar sakta. mujhay maaloom hai ki teree taaqat kam hai. lekin too nay meray kalaam ko mahfooz rakha hai aur meray naam ka inkaar naheen kiya. ⁹dekh, jahaan tak un ka taalluq hai jo iblees kee jamaaat say hain, vah jo yahoodee honay ka daava kartay hain haalaanki vah jhoot boltay hain, main unhen teray paas aanay doonga, unhen teray paaon men jhuk kar yah tasleem karnay par majboor karoonga ki main nay tujhay piyaar kiya hai. ¹⁰too nay mera saabitqadam rahenay ka hukm poora kiya, is liyay main tujhay aazmaaish kee us ghadee say bachaaay rakhoonga jo pooree duniya par a kar us men basnay vaalon ko aazmaaegee.

¹¹main jald a raha hoon. jo kuchh teray paas hai usay mazbootee say thaamay rakhna taaki koee tujh say tera taaj chheen na lay. ¹²jo ghaalib aaega usay main apnay khuda kay ghar men satoon banaaoonga, aisa satoon jo usay kabhee naheen chhodega. main us par apnay khuda ka naam aur apnay khuda kay shaher ka naam likh doonga, us naay yarooshalam ka naam jo meray khuda kay haan say utarnay vaala hai. haan, main us par apna naya naam bhee likh doonga.

¹³jo sun sakta hai vah sun lay ki rooh-ul-quds jamaaaton ko kya kuchh bata raha hai.

laudeekiya kay liyay paighaam

¹⁴laudeekiya men maujood jamaaat kay farishtay ko yah likh dena :

yah us ka farmaan hai jo aameen hai, vah jo vafaadaar aur sachcha gavaah aur allaah kee kaainaat ka mamba hai. ¹⁵main teray kaamon ko jaanta hoon. too na to sard hai, na garm. kaash too in men say ek hota! ¹⁶lekin choonki too neemgarm hai, na garm, na sard, is liyay main tujhay qai karkay apnay munh say nikaal phainkoonga. ¹⁷too kaheta hai, “main ameer hoon, main nay bahut daulat haasil kar lee hai aur mujhay kisee bhee cheez kee zaroorat naheen.” aur too naheen jaanta ki too asal men badabakht, qaabil-ay-rahem, ghareeb, andha aur nanga hai. ¹⁸main tujhay mashvra deta hoon ki mujh say aag men khaalis kiya gaya sona khareed lay. tab hee too daulatmand banega. aur mujh say safed libaas khareed lay jis ko pahennay say teray nangepan kee sharm zaahir naheen hogee. is kay ilaava mujh say aankhon men lagaanay kay liyay marham khareed lay taaki too dekh sakay. ¹⁹jin ko main piyaar karta hoon un kee main saza day kar tarbiyat karta hoon. ab sanjeeda ho ja aur tauba kar. ²⁰dekh, main darvaazay par khada khatkhata raha hoon. agar koee meree aavaaz sun kar darvaaza kholay to main andar a kar us kay saath khaana khaaoonga aur vah meray saath. ²¹jo ghaalib aaay usay main apnay saath apnay takht par baithnay ka haq doonga, bilkul usee tarah jis tarah main khud bhee ghaalib a kar apnay baap kay saath us kay takht par baith gaya.

²²jo sun sakta hai vah sun lay ki rooh-ul-quds jamaaaton ko kya kuchh bata raha hai.”