Mukaashfa 22
mukaashfaa
1phir farishtay nay mujhay zindagee kay paanee ka darya dikhaaya. vah billaur jaisa saaf-shaffaaf tha aur allaah aur lelay kay takht say nikal kar 2shaher kee badee sadak kay beech men say bah raha tha. darya kay donon kinaaron par zindagee ka darakht tha. yah darakht saal men baarah dafa phal laata tha, har maheenay men ek baar. aur darakht kay pattay qaumon kee shifa kay liyay istemaal hotay thay. 3vahaan koee bhee malaoon cheez naheen hogee. allaah aur lelay ka takht shaher men hongay aur us kay khaadim us kee khidmat karengay. 4vah us ka chihara dekhengay, aur us ka naam un kay maathon par hoga. 5vahaan raat naheen hogee aur unhen kisee charaagh ya sooraj kee raushnee kee zaroorat naheen hogee, kyoonki rabb khuda unhen raushnee dega. vahaan vah abad tak hukoomat karengay.
eesa kee aamad
6farishtay nay mujh say kaha, “yah baaten qaabil-ay-etimaad aur sachchee hain. rabb nay jo nabiyon kee roohon ka khuda hai apnay farishtay ko bhej diya taaki apnay khaadimon ko vah kuchh dikhaaay jo jald honay vaala hai.”
7eesa farmaata hai, “dekho, main jald aaoonga. mubaarak hai vah jo is kitaab kee peshgoiyon kay mutaabiq zindagee guzaarta hai.”
8main yoohanna nay khud yah kuchh suna aur dekha hai. aur usay sunnay aur dekhnay kay baad main us farishtay kay paaon men gir gaya jis nay mujhay yah dikhaaya tha aur usay sijda karna chaahata tha. 9lekin us nay mujh say kaha, “aisa mat kar! main bhee usee ka khaadim hoon jis ka too, teray bhaaee nabee aur kitaab kee pairvee karnay vaalay hain. khuda hee ko sijda kar!” 10phir us nay majhay bataaya, “is kitaab kee peshgoiyon par muhar mat lagaana, kyoonki vaqt qareeb a gaya hai. 11jo ghalat kaam kar raha hai vah ghalat kaam karta rahay. jo ghinauna hai vah ghinauna hota jaaay. jo raastbaaz hai vah raastbaazee karta rahay. jo muqaddas hai vah muqaddas hota jaaay.”
12eesa farmaata hai, “dekho, main jald aanay ko hoon. main ajr lay kar aaoonga aur main har ek ko us kay kaamon kay muvaafiq ajr doonga. 13main alif aur yah, avval aur aakhir, ibtida aur intiha hoon.”
14mubaarak hain vah jo apnay libaas ko dhotay hain. kyoonki vah zindagee kay darakht kay phal say khaanay aur darvaazon kay zareeay shaher men daakhil honay ka haq rakhtay hain. 15lekin baaqee sab shaher kay baahar rahengay. kuttay, zinaakaar, qaatil, butparast aur tamaam vah log jo jhoot ko piyaar kartay aur us par amal kartay hain sab kay sab baahar rahengay.
16“main eesa nay apnay farishtay ko tumhaaray paas bheja hai taaki vah jamaaaton kay liyay tumhen in baaton kee gavaahee day. main daaood kee jad aur aulaad hoon, main hee chamakta hua subah ka sitaara hoon.”
17rooh aur dulhan kahetee hain, “a!”
har sunnay vaala bhee yahee kahay, “a!”
jo piyaasa ho vah aaay aur jo chaahay vah zindagee ka paanee muft lay lay.
khulaasaa
18main, yoohanna har ek ko jo is kitaab kee peshgoiyaan sunta hai aagaah karta hoon, agar koee is kitaab men kisee bhee baat ka izaafa karay to allaah us kee zindagee men un balaaon ka izaafa karega jo is kitaab men bayaan kee gaee hain. 19aur agar koee nubuvvat kee is kitaab say baaten nikaalay to allaah us say kitaab men mazkoor zindagee kay darakht kay phal say khaanay aur muqaddas shaher men rahenay ka haq chheen lega.
20jo in baaton kee gavaahee deta hai vah farmaata hai, “jee haan! main jald hee aanay ko hoon.” “aameen! ai khudaavand eesa a!”
21khudaavand eesa ka fazl sab kay saath rahay.