Mukaashfa 20

hazaar saal ka daur

¹phir main nay ek farishta dekha jo aasmaan say utar raha tha. us kay haath men athaah gadhay kee chaabee aur ek bhaaree zanjeer thee. ²us nay ajhdahay yaanee qadeem saamp ko jo shaitaan ya iblees kahelaata hai pakad kar hazaar saal kay liyay baandh liya. ³us nay usay athaah gadhay men phaink kar taala laga diya aur us par muhar laga dee taaki vah hazaar saal tak qaumon ko gumraah na kar sakay. us kay baad zarooree hai ki usay thodee der kay liyay aazaad kar diya jaaay.

⁴phir main nay takht dekhay jin par vah baithay thay jinhen adaalat karnay ka ikhtiyaar diya gaya tha. aur main nay un kee roohen dekheen jinhen eesa kay baaray men gavaahee denay aur jin ka allaah ka kalaam pesh karnay kee vajah say sar qalam kiya gaya tha. unhon nay haivaan ya us kay mujassmay ko sijda naheen kiya tha, na us ka nishaan apnay maathon ya haathon par lagvaaya tha. ab yah log zinda huay aur hazaar saal tak maseeh kay saath hukoomat kartay rahay. ⁵(baaqee murday hazaar saal kay ikhtitaam par hee zinda huay). yah pahelee qiyaamat hai. ⁶mubaarak aur muqaddas hain vah jo is pahelee qiyaamat men shareek hain. in par doosree maut ka koee ikhtiyaar naheen hai balki yah allaah aur maseeh kay imaam ho kar hazaar saal tak us kay saath hukoomat karengay.

iblees kee shikast

⁷hazaar saal guzar jaanay kay baad iblees ko us kee qaid say aazaad kar diya jaaega. ⁸tab vah nikal kar zameen kay chaaron konon men maujood qaumon banaam jooj aur maajooj ko bahekaaega aur unhen jang karnay kay liyay jama karega. ladnay vaalon kee taadaad saahil par kee ret kay zarron jaisee beshumaar hogee. ⁹unhon nay zameen par phail kar muqaddaseen kee lashkargaah ko gher liya, yaanee us shaher ko jisay allaah piyaar karta hai. lekin aag nay aasmaan say naazil ho kar unhen hadap kar liya. ¹⁰aur iblees ko jis nay un ko fareb diya tha jaltee huee gandhak kee jheel men phainka gaya, vahaan jahaan haivaan aur jhootay nabee ko pahelay phainka gaya tha. us jagah par unhen din raat balki abad tak azaab sahena padega.

aakhiree adaalat

¹¹phir main nay ek bada safed takht dekha aur usay jo us par baitha hai. aasmaan-o-zameen us kay huzoor say bhaag kar ghaaib ho gaay. ¹²aur main nay tamaam murdon ko takht kay saamnay khaday dekha, khwaah vah chhotay thay ya baday. kitaaben kholee gaeen. phir ek aur kitaab ko khol diya gaya jo kitaab-ay-hayaat thee. murdon ka us kay mutaabiq faisla kiya gaya jo kuchh unhon nay kiya tha aur jo kitaabon men darj tha. ¹³samundar nay un tamaam murdon ko pesh kar diya jo us men thay, aur maut aur paataal nay bhee un murdon ko pesh kar diya jo un men thay. chunaanchay har shakhs ka us kay mutaabiq faisla kiya gaya jo us nay kiya tha. ¹⁴phir maut aur paataal ko jaltee huee jheel men phainka gaya. yah jheel doosree maut hai. ¹⁵jis kisee ka naam kitaab-ay-hayaat men darj naheen tha usay jaltee huee jheel men phainka gaya.