Mukaashfa 2

ifisus kay liyay paighaam

¹ifisus men maujood jamaaat kay farishtay ko yah likh dena : yah us ka farmaan hai jo apnay dahenay haath men saat sitaaray thaamay rakhta aur sonay kay saat shamaadaanon kay darmiyaan chalta phirta hai. ²main teray kaamon ko jaanta hoon, teree sakht mehanat aur teree saabitqadmee ko. main jaanta hoon ki too buray logon ko bardaasht naheen kar sakta, ki too nay un kee padtaal kee hai jo rasool honay ka daava kartay hain, haalaanki vah rasool naheen hain. tujhay to pata chal gaya hai ki vah jhootay thay. ³too meray naam kee khaatir saabitqadam raha aur bardaasht kartay kartay thaka naheen. ⁴lekin mujhay tujh say yah shikaayat hai, too mujhay us tarah piyaar naheen karta jis tarah pahelay karta tha. ⁵ab khayaal kar ki too kahaan say gir gaya hai. tauba karkay vah kuchh kar jo too pahelay karta tha, varna main a kar teray shamaadaan ko us kee jagah say hata doonga. ⁶lekin yah baat teray haq men hai, too meree tarah neekuliyon kay kaamon say nafrat karta hai.

⁷jo sun sakta hai vah sun lay ki rooh-ul-quds jamaaaton ko kya kuchh bata raha hai.

jo ghaalib aaega usay main zindagee kay darakht ka phal khaanay ko doonga, us darakht ka phal jo allaah kay firdaus men hai.

smurna kay liyay paighaam

⁸smurna men maujood jamaaat kay farishtay ko yah likh dena : yah us ka farmaan hai jo avval aur aakhir hai, jo mar gaya tha aur dubaara zinda hua. ⁹main teree museebat aur ghurbat ko jaanta hoon. lekin haqeeqat men too daulatmand hai. main un logon kay buhtaan say vaaqif hoon jo kahetay hain ki vah yahoodee hain haalaanki hain naheen. asal men vah iblees kee jamaaat hain. ¹⁰jo kuchh tujhay jhelna padega us say mat darna. dekh, iblees tujhay aazmaanay kay liyay tum men say baaz ko jel men daal dega, aur das din tak tujhay eeza pahunchaaee jaaegee. maut tak vafaadaar rah to main tujhay zindagee ka taaj doonga.

¹¹jo sun sakta hai vah sun lay ki rooh-ul-quds jamaaaton ko kya kuchh bata raha hai.

jo ghaalib aaega usay doosree maut say nuqsaan naheen pahunchega.

pirgamun kay liyay paighaam

¹²pirgamun men maujood jamaaat kay farishtay ko yah likh dena :

yah us ka farmaan hai jis kay paas dodhaaree tez talvaar hai. ¹³main jaanta hoon ki too kahaan raheta hai, vahaan jahaan iblees ka takht hai. taaham too meray naam ka vafaadaar raha hai. too nay un dinon men bhee mujh par eemaan rakhnay ka inkaar na kiya jab mera vafaadaar gavaah antipaas tumhaaray paas shaheed hua, vahaan jahaan iblees basta hai. ¹⁴lekin mujhay tujh say kaee baaton kee shikaayat hai. teray paas aisay log hain jo bal’aam kee taaleem kee pairvee kartay hain. kyoonki bal’aam nay balaq ko sikhaaya ki vah kis tarah israaeeliyon ko gunaah karnay par uksa sakta hai yaanee buton ko pesh kee gaee qurbaaniyaan khaanay aur zina karnay say. ¹⁵isee tarah teray paas bhee aisay log hain, jo neekuliyon kee taaleem kee pairvee kartay hain. ¹⁶ab tauba kar! varna main jald hee teray paas a kar apnay munh kee talvaar say un kay saath ladoonga.

¹⁷jo sun sakta hai vah sun lay ki rooh-ul-quds jamaaaton ko kya kuchh bata raha hai.

jo ghaalib aaega usay main posheeda mann men say doonga. main usay ek safed patthar bhee doonga jis par ek naya naam likha hoga, aisa naam jo sirf milnay vaalay ko maaloom hoga.

thuaateera kay liyay paighaam

¹⁸thuaateera men maujood jamaaat kay farishtay ko yah likh dena :

yah allaah kay farzand ka farmaan hai jis kee aankhen aag kay sholon aur paaon damaktay peetal kee maanind hain. ¹⁹main teray kaamon ko jaanta hoon yaanee teree muhabbat aur eemaan, teree khidmat aur saabitqadmee, aur yah ki is vaqt too pahelay kee nisbat kaheen ziyaada kar raha hai. ²⁰lekin mujhay tujh say yah shikaayat hai, too us aurat eezbil ko jo apnay aap ko nabiya kahetee hai kaam karnay deta hai, haalaanki yah apnee taaleem say meray khaadimon ko saheeh raah say door karkay unhen zina karnay aur buton ko pesh kee gaee qurbaaniyaan khaanay par uksaatee hai. ²¹main nay usay kaafee der say tauba karnay ka mauqa diya hai, lekin vah is kay liyay tayyaar naheen hai. ²²chunaanchay main usay yoon maaroonga ki vah bistar par padee rahegee. aur agar vah jo us kay saath zina kar rahay hain apnee ghalat harkaton say tauba na karen to main unhen shadeed museebat men phansaaoonga. ²³haan, main us kay farzandon ko maar daaloonga. phir tamaam jamaaaten jaan lengee ki main hee zahenon aur dilon ko parakhta hoon, aur main hee tum men say har ek ko us kay kaamon ka badla doonga.

²⁴lekin thuaateera kee jamaaat kay aisay log bhee hain jo is taaleem kee pairvee naheen kartay, aur jinhon nay vah kuchh naheen jaana jisay in logon nay “iblees kay gaheray bhed” ka naam diya hai. tumhen main bataata hoon ki main tum par koee aur bojh naheen daaloonga. ²⁵lekin itna zaroor karo ki jo kuchh tumhaaray paas hai usay meray aanay tak mazbootee say thaamay rakhna. ²⁶jo ghaalib aaega aur aakhir tak meray kaamon par qaaim rahega usay main qaumon par ikhtiyaar doonga. ²⁷haan, vah lohay kay shaahee asa say un par hukoomat karega, unhen mittee kay bartanon kee tarah phod daalega. ²⁸yaanee usay vahee ikhtiyaar milega jo mujhay bhee apnay baap say mila hai. aisay shakhs ko main subah ka sitaara bhee doonga.

²⁹jo sun sakta hai vah sun lay ki rooh-ul-quds jamaaaton ko kya kuchh bata raha hai.