Mukaashfa 19

¹is kay baad main nay aasmaan par ek baday hujoom kee see aavaaz sunee jis nay kaha, “allaah kee tamjeed ho! najaat, jalaal aur qudrat hamaaray khuda ko haasil hai. ²kyoonki us kee adaalaten sachchee aur raast hain. us nay us badee kasbee ko mujrim thaheraaya hai jis nay zameen ko apnee zinaakaaree say bigaad diya. us nay us say apnay khaadimon kee qatl-o-ghaarat ka badla lay liya hai.” ³aur vah dubaara bol uthay, “allaah kee tamjeed ho! is shaher ka dhuaan abad tak chadhta raheta hai.” ⁴chaubees buzurgon aur chaar jaandaaron nay gir kar takht par baithay allaah ko sijda kiya. unhon nay kaha, “aameen, allaah kee tamjeed ho.”

lelay kee ziyaafat

⁵phir takht kee taraf say ek aavaaz sunaaee dee. us nay kaha, “ai us kay tamaam khaadimo, hamaaray khuda kee tamjeed karo. ai us ka khauf maannay vaalo, khwaah baday ho ya chhotay us kee sitaaish karo.” ⁶phir main nay ek baday hujoom kee see aavaaz sunee, jo badee aabshaar kay shor aur garajtay baadlon kee kadak kee maanind thee. in logon nay kaha, “allaah kee tamjeed ho! kyoonki hamaara rabb qaadir-ay-mutlaq khuda takhtnasheen ho gaya hai. ⁷aao, ham masroor hon, khushee manaaen aur usay jalaal den, kyoonki lelay kee shaadee ka vaqt a gaya hai. us kee dulhan nay apnay aap ko tayyaar kar liya hai, ⁸aur usay pahennay kay liyay baareek kataan ka chamakta aur paak-saaf libaas day diya gaya.” (baareek kataan say muraad muqaddaseen kay raast kaam hain.)

⁹phir farishtay nay mujh say kaha, “likh, mubaarak hain vah jinhen lelay kee shaadee kee ziyaafat kay liyay daavat mil gaee hai.” us nay mazeed kaha, “yah allaah kay sachchay alfaaz hain.”

¹⁰is par main usay sijda karnay kay liyay us kay paaon men gir gaya. lekin us nay mujh say kaha, “aisa mat kar! main bhee tera aur teray un bhaaiyon ka hamkhidmat hoon jo eesa kee gavaahee denay par qaaim hain. sirf allaah ko sijda kar. kyoonki jo eesa kay baaray men gavaahee deta hai vah yah nubuvvat kee rooh men karta hai.”

safed ghoday ka savaar

¹¹phir main nay aasmaan ko khula dekha. ek safed ghoda nazar aaya jis kay savaar ka naam “vafaadaar aur sachcha” hai, kyoonki vah insaaf say adaalat aur jang karta hai. ¹²us kee aankhen bhadaktay sholay kee maanind hain aur us kay sar par bahut say taaj hain. us par ek naam likha hai jisay sirf vahee jaanta hai, koee aur usay naheen jaanta. ¹³vah ek libaas say mulabbas tha jisay khoon men duboya gaya tha. us ka naam “allaah ka kalaam” hai. ¹⁴aasmaan kee faujen us kay peechhay peechhay chal rahee theen. sab safed ghodon par savaar thay aur baareek kataan kay chamaktay aur paak-saaf kapday pahenay huay thay. ¹⁵us kay munh say ek tez talvaar nikaltee hai jis say vah qaumon ko maar dega. vah lohay kay shaahee asa say un par hukoomat karega. haan, vah angoor ka ras nikaalnay kay hauz men unhen kuchal daalega. yah hauz kya hai? allaah qaadir-ay-mutlaq ka sakht ghazab. ¹⁶us kay libaas aur raan par yah naam likha hai, “baadshaahon ka baadshaah aur rabbon ka rabb.”

¹⁷phir main nay ek farishta sooraj par khada dekha. us nay oonchee aavaaz say pukaar kar un tamaam parindon say jo meray sar par mandla rahay thay kaha, “aao, allaah kee badee ziyaafat kay liyay jama ho jaao. ¹⁸phir tum baadshaahon, jarnailon, baday baday afsaron, ghodon aur un kay savaaron ka gosht khaaogay, haan tamaam logon ka gosht, khwaah aazaad hon ya ghulaam, chhotay hon ya baday.”

¹⁹phir main nay haivaan aur baadshaahon ko un kee faujon samet dekha. vah ghoday par “allaah ka kalaam” naamee savaar aur us kee fauj say jang karnay kay liyay jama huay thay. ²⁰lekin haivaan ko giriftaar kiya gaya. us kay saath us jhootay nabee ko bhee giriftaar kiya gaya jis nay haivaan kee khaatir mojizaana nishaan dikhaaay thay. in mojizon kay vaseelay say us nay un ko fareb diya tha jinhen haivaan ka nishaan mil gaya tha aur jo us kay mujassmay ko sijda kartay thay. donon ko jaltee huee gandhak kee sholaakhez jheel men phainka gaya. ²¹baaqee logon ko us talvaar say maar daala gaya jo ghoday par savaar kay munh say nikaltee thee. aur tamaam parinday laashon ka gosht kha kar ser ho gaay.