Mukaashfa 18
baabal shaher kee shikast
1is kay baad main nay ek aur farishta dekha jo aasmaan par say utar raha tha. usay bahut ikhtiyaar haasil tha aur zameen us kay jalaal say raushan ho gaee. 2us nay oonchee aavaaz say pukaar kar kaha, “vah gir gaee hai! haan, azeem kasbee baabal gir gaee hai! ab vah shayaateen ka ghar aur har badruh ka basera ban gaee hai, har naapaak aur ghinaunay parinday ka basera. 3kyoonki tamaam qaumon nay us kee haraamkaaree aur mastee kee mai pee lee hai. zameen kay baadshaahon nay us kay saath zina kiya aur zameen kay saudaagar us kee belagaam ayyaashee say ameer ho gaay hain.” 4phir main nay ek aur aavaaz sunee. us nay aasmaan kee taraf say kaha,
“ai meree qaum, us men say nikal a,
taaki tum us kay gunaahon men shareek na ho jaao
aur us kee balaaen tum par na aaen. 5kyoonki us kay gunaah aasmaan tak pahunch gaay hain,
aur allaah un kee badiyon ko yaad karta hai.
6us kay saath vahee sulook karo
jo us nay tumhaaray saath kiya hai.
jo kuchh us nay kiya hai
us ka dugna badla usay dena.
jo sharaab us nay doosron ko pilaanay kay liyay tayyaar kee hai
us ka dugna badla usay day dena.
7usay utnee hee aziyat aur gham pahuncha do
jitna us nay apnay aap ko shaandaar banaaya aur ayyaashee kee.
kyoonki apnay dil men vah kahetee hai,
‘main yahaan apnay takht par raanee hoon.
na main beva hoon, na main kabhee maatam karoongee.’
8is vajah say ek din yah balaaen yaanee maut, maatam aur kaal
us par aan padengee.
vah bhasm ho jaaegee,
kyoonki us kee adaalat karnay vaala rabb khuda qavee hai.”
9aur zameen kay jin baadshaahon nay us kay saath zina aur ayyaashee kee vah us kay jalnay ka dhuaan dekh kar ro padengay aur aah-o-zaaree karengay. 10vah us kee aziyat ko dekh kar khauf khaaengay aur door door khaday ho kar kahengay, “afsos! tujh par afsos, ai azeem aur taaqatvar shaher baabal! ek hee ghantay kay andar andar allaah kee adaalat tujh par a gaee hai.”
11zameen kay saudaagar bhee usay dekh kar ro padengay aur aah-o-zaaree karengay, kyoonki koee naheen raha hoga jo un ka maal khareeday : 12un ka sona, chaandee, beshaqeemat javaahir, motee, baareek kataan, arghvaanee aur qirmizee rang ka kapda, resham, har qism kee khushboodaar lakdee, haatheedaant kee har cheez aur qeemtee lakdee, peetal, lohay aur sang-ay-marmar kee har cheez, 13daarcheenee, masaala, agrabattee, mur, bakhoor, mai, zaitoon ka tel, behtareen maida, gandum, gaay-bail, bheden, ghoday, rath aur ghulaam yaanee insaan. 14saudaagar us say kahengay, “jo phal too chaahatee thee vah tujh say door ho gaya hai. teree tamaam daulat aur shaan-o-shaukat ghaaib ho gaee hai aur aainda kabhee bhee teray paas paaee naheen jaaegee.” 15jo saudaagar usay yah cheezen farokht karnay say daulatmand huay vah us kee aziyat dekh kar khauf kay maaray door door khaday ho jaaengay. vah ro ro kar maatam karenge 16aur kahengay, “haay! tujh par afsos, ai azeem shaher, ai khaatoon jo pahelay baareek kataan, arghvaanee aur qirmizee rang kay kapday pahenay phirtee thee aur jo sonay, qeemtee javaahir aur motiyon say sajee huee thee. 17ek hee ghantay kay andar andar saaree daulat tabaah ho gaee hai!”
har baheree jahaaz ka kaptaan, har samundaree musaafir, har mallaah aur vah tamaam log jo samundar par safar karnay say apnee rozee kamaatay hain vah sab door door khaday ho jaaengay. 18us kay jalnay ka dhuaan dekh kar vah kahengay, “kya kabhee koee itna azeem shaher tha?” 19vah apnay saron par khaak daal lengay aur chilla chilla kar roengay aur aah-o-zaaree karengay. vah kahengay, “haay! tujh par afsos, ai azeem shaher, jis kee daulat say tamaam baheree jahaazon kay maalik ameer huay. ek hee ghantay kay andar andar vah veeraan ho gaya hai.”
20ai aasmaan, usay dekh kar khushee mana!
ai muqaddso, rasoolo aur nabiyo, khushee manaao!
kyoonki allaah nay tumhaaree khaatir us kee adaalat kee hai.
21phir ek taaqatvar farishtay nay badee chakkee kay paat kee maanind ek baday patthar ko utha kar samundar men phaink diya. us nay kaha, “azeem shaher baabal ko itnee hee zabardastee say patak diya jaaega. baad men usay kaheen naheen paaya jaaega. 22ab say na mooseeqaaron kee aavaazen tujh men kabhee sunaaee dengee, na sarod, baansree ya turam bajaanay vaalon kee. ab say kisee bhee kaam ka kaareegar tujh men paaya naheen jaaega. haan, chakkee kee aavaaz hamesha kay liyay band ho jaaegee. 23ab say charaagh tujhay raushan naheen karega, dulhan-doolhay kee aavaaz tujh men sunaaee naheen degee. haay, teray saudaagar duniya kay baday baday afsar thay, aur teree jaadoogree say tamaam qaumon ko bahekaaya gaya.”
24haan, baabal men nabiyon, muqaddaseen aur un tamaam logon ka khoon paaya gaya hai jo zameen par shaheed ho gaay hain.