Mukaashfa 17
mashhoor kasbee
1phir saat piyaalay apnay paas rakhnay vaalay in saat farishton men say ek meray paas aaya. us nay kaha, “a, main tujhay us badee kasbee kee saza dikha doon jo gaheray paanee kay paas baithee hai. 2zameen kay baadshaahon nay us kay saath zina kiya. haan, us kee zinaakaaree kee mai say zameen kay baashinday mast ho gaay.”
3phir farishta mujhay rooh men ek registaan men lay gaya. vahaan main nay ek aurat ko dekha. vah ek qirmizee rang kay haivaan par savaar thee jis kay pooray jism par kufr kay naam likhay thay aur jis kay saat sar aur das seeng thay. 4yah aurat arghvaanee aur qirmizee rang kay kapday pahenay aur sonay, beshaqeemat javaahir aur motiyon say sajee huee thee. us kay haath men sonay ka ek piyaala tha jo ghinaunee cheezon aur us kee zinaakaaree kee gandgee say bhara hua tha. 5us kay maathay par yah naam likha tha, jo ek bhed hai, “azeem baabal, kasbiyon aur zameen kee ghinaunee cheezon kee maan.” 6aur main nay dekha ki yah aurat un muqaddaseen kay khoon say mast ho gaee thee jinhon nay eesa kee gavaahee dee thee.
usay dekh kar main nihaayat hairaan hua. 7farishtay nay mujh say poochha, “too kyoon hairaan hai? main tujh par aurat aur us haivaan ka bhed khol doonga jis par aurat savaar hai aur jis kay saat sar aur das seeng hain. 8jis haivaan ko too nay dekha vah pahelay tha, is vaqt naheen hai aur dubaara athaah gadhay men say nikal kar halaakat kee taraf badhega. zameen kay jin baashindon kay naam duniya kee takhleeq say hee kitaab-ay-hayaat men darj naheen hain vah haivaan ko dekh kar hairatzada ho jaaengay. kyoonki vah pahelay tha, is vaqt naheen hai lekin dubaara aaega.
9yahaan samajhdaar zahen kee zaroorat hai. saat saron say muraad saat pahaad hain jin par yah aurat baithee hai. yah saat baadshaahon kee numaaindagee bhee kartay hain. 10in men say paanch gir gaay hain, chhata maujood hai aur saatvaan abhee aanay vaala hai. lekin jab vah aaega to usay thodee der kay liyay rahena hai. 11jo haivaan pahelay tha aur is vaqt naheen hai vah aathvaan baadshaah hai, go vah saat baadshaahon men say bhee ek hai. vah halaakat kee taraf badh raha hai.
12jo das seeng too nay dekhay vah das baadshaah hain jinhen abhee koee baadshaahee naheen milee. lekin unhen ghantay bhar kay liyay haivaan kay saath baadshaah ka ikhtiyaar milega. 13yah ek hee soch rakh kar apnee taaqat aur ikhtiyaar haivaan ko day dengay aur lelay say jang karengay, 14lekin lela apnay bulaaay gaay, chunay huay aur vafaadaar pairokaaron kay saath un par ghaalib aaega, kyoonki vah rabbon ka rabb aur baadshaahon ka baadshaah hai.”
15phir farishtay nay mujh say kaha, “jis paanee kay paas too nay kasbee ko baithee dekha vah ummaten, hujoom, qaumen aur zabaanen hai. 16jo haivaan aur das seeng too nay dekhay vah kasbee say nafrat karengay. vah usay veeraan karkay nanga chhod dengay aur us ka gosht kha kar usay bhasm karengay. 17kyoonki allaah nay un kay dilon men yah daal diya hai ki vah us ka maqsad poora karen aur us vaqt tak hukoomat karnay ka apna ikhtiyaar haivaan kay sapurd kar den jab tak allaah kay farmaan takmeel tak na pahunch jaaen.
18jis aurat ko too nay dekha vah vahee bada shaher hai jo zameen kay baadshaahon par hukoomat karta hai.”