Mukaashfa 16
allaah kay ghazab kay piyaale
1phir main nay ek oonchee aavaaz sunee jis nay allaah kay ghar men say saat farishton say kaha, “jaao, allaah kay ghazab say bharay saat piyaalon ko zameen par undel do.”
2pahelay farishtay nay ja kar apna piyaala zameen par undel diya. is par un logon kay jismon par bhadday aur takleefdih phoday nikal aaay jin par haivaan ka nishaan tha aur jo us kay mujassmay ko sijda kartay thay.
3doosray farishtay nay apna piyaala samundar par undel diya. is par samundar ka paanee laash kay say khoon men badal gaya, aur us men har zinda makhlooq mar gaee.
4teesray farishtay nay apna piyaala daryaaon aur paanee kay chashmon par undel diya to un ka paanee khoon ban gaya. 5phir main nay paaniyon par muqarrar farishtay ko yah kahetay suna, “too yah faisla karnay men raast hai, too jo hai aur jo tha, too jo quddoos hai. 6choonki unhon nay teray muqaddaseen aur nabiyon kee khoonrezee kee hai, is liyay too nay unhen vah kuchh day diya jis kay laaiq vah hain. too nay unhen khoon pila diya.” 7phir main nay qurbaangaah ko yah javaab detay suna, “haan, ai rabb qaadir-ay-mutlaq khuda, haqeeqatan teray faislay sachchay aur raast hain.”
8chauthay farishtay nay apna piyaala sooraj par undel diya. is par sooraj ko logon ko aag say jhulsaanay ka ikhtiyaar diya gaya. 9log shadeed tapish say jhulas gaay, aur unhon nay allaah kay naam par kufr baka jisay in balaaon par ikhtiyaar tha. unhon nay tauba karnay aur usay jalaal denay say inkaar kiya.
10paanchven farishtay nay apna piyaala haivaan kay takht par undel diya. is par us kee baadshaahee men andhera chha gaya. log aziyat kay maaray apnee zabaanen kaattay rahay. 11unhon nay apnee takleephon aur phodon kee vajah say aasmaan par kufr baka aur apnay kaamon say inkaar na kiya.
12chhatay farishtay nay apna piyaala baday darya furaat par undel diya. is par us ka paanee sookh gaya taaki mashriq kay baadshaahon kay liyay raasta tayyaar ho jaaay. 13phir main nay teen badruhen dekheen jo mendhkon kee maanind theen. vah ajhdahay kay munh, haivaan kay munh aur jhootay nabee kay munh men say nikal aaeen. 14yah mendhak shayaateen kee roohen hain jo mojizay dikhaatee hain aur nikal kar pooree duniya kay baadshaahon kay paas jaatee hain taaki unhen allaah qaadir-ay-mutlaq kay azeem din par jang kay liyay ikattha karen.
15“dekho, main chor kee tarah aaoonga. mubaarak hai vah jo jaagta raheta aur apnay kapday pahenay huay raheta hai taaki usay nangee haalat men chalna na paday aur log us kee sharmgaah na dekhen.”
16phir unhon nay baadshaahon ko us jagah par ikattha kiya jis ka naam ibraanee zabaan men harmajiddon hai.
17saatven farishtay nay apna piyaala hava men undel diya. is par allaah kay ghar men takht kee taraf say ek oonchee aavaaz sunaaee dee jis nay kaha, “ab kaam takmeel tak pahunch gaya hai!” 18bijliyaan chamaknay lageen, shor mach gaya, baadal garajnay lagay aur ek shadeed zalzla aaya. is qism ka zalzla zameen par insaan kee takhleeq say lay kar aaj tak naheen aaya, itna sakht zalzla ki 19azeem shaher teen hisson men bat gaya aur qaumon kay shaher tabaah ho gaay. allaah nay azeem baabal ko yaad karkay usay apnay sakht ghazab kee mai say bhara piyaala pila diya. 20tamaam jazeeray ghaaib ho gaay aur pahaad kaheen nazar na aaay. 21logon par aasmaan say man man bhar kay baday baday olay gir gaay. aur logon nay olon kee bala kee vajah say allaah par kufr baka, kyoonki yah bala nihaayat sakht thee.