Mukaashfa 15
aakhiree balaaon kay farishte
1phir main nay aasmaan par ek aur ilaahee nishaan dekha, jo azeem aur hairat’angez tha. saat farishtay saat aakhiree balaaen apnay paas rakh kar khaday thay. in say allaah ka ghazab takmeel tak pahunch gaya.
2main nay sheeshay ka sa ek samundar bhee dekha jis men aag milaaee gaee thee. is samundar kay paas vah khaday thay jo haivaan, us kay mujassmay aur us kay naam kay nambar par ghaalib a gaay thay. vah allaah kay diay huay sarod pakde 3allaah kay khaadim moosa aur lelay ka geet ga rahay thay,
“ai rabb qaadir-ay-mutlaq khuda,
teray kaam kitnay azeem aur hairat’angez hain.
ay zamaanon kay baadshaah,
teree raahen kitnee raast aur sachchee hain.
4ai rabb, kaun tera khauf naheen maanega?
kaun teray naam ko jalaal naheen dega?
kyoonki too hee quddoos hai.
tamaam qaumen a kar teray huzoor sijda karengee,
kyoonki teray raast kaam zaahir ho gaay hain.”
5is kay baad main nay dekha ki allaah kay ghar yaanee aasmaan par kay shareeat kay khaimay ko [a] yaanee mulaaqaat kay khaimay ko. khol diya gaya. 6allaah kay ghar say vah saat farishtay nikal aaay jin kay paas saat balaaen theen. un kay kataan kay kapday saaf-suthray aur chamak rahay thay. yah kapday seenon par sonay kay kamarband say bandhay huay thay. 7phir chaar jaandaaron men say ek nay in saat farishton ko sonay kay saat piyaalay diay. yah piyaalay us khuda kay ghazab say bharay huay thay jo azal say abad tak zinda hai. 8us vaqt allaah ka ghar us kay jalaal aur qudrat say paida honay vaalay dhuen say bhar gaya. aur jab tak saat farishton kee saat balaaen takmeel tak na pahuncheen us vaqt tak koee bhee allaah kay ghar men daakhil na ho saka.