Mukaashfa 14

lela aur us kee qaum

¹phir main nay dekha ki lela meray saamnay hee siyyoon kay pahaad par khada hai. us kay saath 1,44,000 afraad khaday thay jin kay maathon par us ka aur us kay baap ka naam likha tha. ²aur main nay aasmaan say ek aisee aavaaz sunee jo kisee baday aabshaar aur garajtay baadlon kee oonchee kadak kee maanind thee. yah us aavaaz kee maanind thee jo sarod bajaanay vaalay apnay saazon say nikaaltay hain. ³yah 1,44,000 afraad takht, chaar jaandaaron aur buzurgon kay saamnay khaday ek naya geet ga rahay thay, ek aisa geet jo sirf vahee seekh sakay jinhen lelay nay zameen say khareed liya tha. ⁴yah vah mard hain jinhon nay apnay aap ko khavaateen kay saath aalooda naheen kiya, kyoonki vah kunvaaray hain. jahaan bhee lela jaata hai vahaan vah bhee jaatay hain. unhen baaqee insaanon men say fasal kay pahelay phal kee haisiyat say allaah aur lelay kay liyay khareeda gaya hai. ⁵un kay munh say kabhee jhoot naheen nikla balki vah beilzaam hain.

teen farishte

⁶phir main nay ek aur farishta dekha. vah meray sar kay oopar hee hava men ud raha tha. us kay paas allaah kee abdee khushkhabaree thee taaki vah usay zameen kay baashindon yaanee har qaum, qabeelay, ahel-ay-zabaan aur ummat ko sunaaay. ⁷us nay oonchee aavaaz say kaha, “khuda ka khauf maan kar usay jalaal do, kyoonki us kee adaalat ka vaqt a gaya hai. usay sijda karo jis nay aasmaanon, zameen, samundar aur paanee kay chashmon ko khalaq kiya hai.”

⁸ek doosray farishtay nay pahelay kay peechhay peechhay chaltay huay kaha, “vah gir gaya hai! haan, azeem baabal gir gaya hai, jis nay tamaam qaumon ko apnee haraamkaaree aur mastee kee mai pilaaee hai.”

⁹in do farishton kay peechhay ek teesra farishta chal raha tha. us nay oonchee aavaaz say kaha, “jo bhee haivaan aur us kay mujassmay ko sijda karay aur jisay bhee us ka nishaan apnay maathay ya haath par mil jaae ¹⁰vah allaah kay ghazab kee mai say piega, aisee mai jo milaavat kay baghair hee allaah kay ghazab kay piyaalay men daalee gaee hai. muqaddas farishton aur lelay kay huzoor usay aag aur gandhak ka azaab sahena padega. ¹¹aur in logon ko sataanay vaalee yah aag jaltee rahegee, is ka dhuaan abad tak chadhta rahega. jo haivaan aur us kay mujassmay ko sijda kartay hain ya jinhon nay us kay naam ka nishaan liya hai vah na din, na raat ko aaraam paaengay.”

¹²yahaan muqaddaseen ko saabitqadam rahenay kee zaroorat hai, unhen jo allaah kay ahkaam pooray kartay aur eesa kay vafaadaar rahetay hain.

¹³phir main nay aasmaan say ek aavaaz yah kahetee huee sunee, “likh, mubaarak hain vah murday jo ab say khudaavand men vafaat paatay hain.”

“jee haan,” rooh farmaata hai, “vah apnee mehanat-mashaqqat say aaraam paaengay, kyoonki un kay nek kaam un kay peechhay ho kar un kay saath chalengay.”

zameen par fasal kee kataaee

¹⁴phir main nay ek safed baadal dekha, aur us par koee baitha tha jo ibn-ay-aadam kee maanind tha. us kay sar par sonay ka taaj aur haath men tez daraantee thee. ¹⁵ek aur farishta allaah kay ghar say nikal kar oonchee aavaaz say pukaar kar us say mukhaatib hua jo baadal par baitha tha, “apnee daraantee lay kar fasal kee kataaee kar! kyoonki fasal kaatnay ka vaqt a gaya hai aur zameen par kee fasal pak gaee hai.” ¹⁶chunaanchay baadal par baithnay vaalay nay apnee daraantee zameen par chalaaee aur zameen kee fasal kee kataaee huee.

¹⁷is kay baad ek aur farishta allaah kay us ghar say nikal aaya jo aasmaan par hai, aur us kay paas bhee tez daraantee thee.

¹⁸phir ek teesra farishta aaya. usay aag par ikhtiyaar tha. vah qurbaangaah say aaya aur oonchee aavaaz say pukaar kar tez daraantee pakday huay farishtay say mukhaatib hua, “apnee tez daraantee lay kar zameen kee angoor kee bel say angoor kay guchchhay jama kar, kyoonki us kay angoor pak gaay hain.” ¹⁹farishtay nay zameen par apnee daraantee chalaaee, us kay angoor jama kiay aur unhen allaah kay ghazab kay us baday hauz men phaink diya jis men angoor ka ras nikaala jaata hai. ²⁰yah hauz shaher say baahar vaaqay tha. us men paday angooron ko itna raunda gaya ki hauz men say khoon bah nikla. khoon ka yah sailaab 300 kilomeetar door tak pahunch gaya aur vah itna ziyaada tha ki ghodon kee lagaamon tak pahunch gaya.