Mukaashfa 13

do haivaan

¹phir main nay dekha ki samundar men say ek haivaan nikal raha hai. us kay saat seeng aur saat sar thay. har seeng par ek taaj aur har sar par kufr ka ek naam tha. ²yah haivaan cheetay kee maanind tha. lekin us kay reechh kay say paaon aur sherbabar ka sa munh tha. ajhdahay nay is haivaan ko apnee quvvat, apna takht aur bada ikhtiyaar day diya. ³lagta tha ki haivaan kay saron men say ek par laailaaj zakhm laga hai. lekin is zakhm ko shifa dee gaee. pooree duniya yah dekh kar hairatzada huee aur haivaan kay peechhay lag gaee. ⁴logon nay ajhdahay ko sijda kiya, kyoonki usee nay haivaan ko ikhtiyaar diya tha. aur unhon nay yah kah kar haivaan ko bhee sijda kiya, “kaun is haivaan kee maanind hai? kaun is say lad sakta hai?”

⁵is haivaan ko badee badee baaten aur kufr baknay ka ikhtiyaar diya gaya. aur usay yah karnay ka ikhtiyaar 42 maheenay kay liyay mil gaya. ⁶yoon vah apna munh khol kar allaah, us kay naam, us kee sukoonatgaah aur aasmaan kay baashindon par kufr baknay laga. ⁷usay muqaddaseen say jang karkay un par fatah paanay ka ikhtiyaar bhee diya gaya. aur usay har qabeelay, har ummat, har zabaan aur har qaum par ikhtiyaar diya gaya. ⁸zameen kay tamaam baashinday is haivaan ko sijda karengay yaanee vah sab jin kay naam duniya kee ibtida say lelay kee kitaab-ay-hayaat men darj naheen hain, us lelay kee kitaab men jo zabah kiya gaya hai.

⁹jo sun sakta hai vah sun lay! ¹⁰agar kisee ko qaidee banna hai to vah qaidee hee banega. agar kisee ko talvaar kee zad men a kar marna hai to vah aisay hee marega. ab muqaddaseen ko saabitqadmee aur vafaadaar eemaan kee khaas zaroorat hai.

¹¹phir main nay ek aur haivaan ko dekha. vah zameen men say nikal raha tha. us kay lelay kay say do seeng thay, lekin us kay bolnay ka andaaz ajhdahay ka sa tha. ¹²us nay pahelay haivaan ka poora ikhtiyaar us kee khaatir istemaal karkay zameen aur us kay baashindon ko pahelay haivaan ko sijda karnay par uksaaya, yaanee us haivaan ko jis ka laailaaj zakhm bhar gaya tha. ¹³aur us nay baday mojizaana nishaan dikhaaay, yahaan tak ki us nay logon kay dekhtay dekhtay aasmaan say zameen par aag naazil honay dee. ¹⁴yoon usay pahelay haivaan kee khaatir mojizaana nishaan dikhaanay ka ikhtiyaar diya gaya, aur in kay zareeay us nay zameen kay baashindon ko saheeh raah say bahekaaya. us nay unhen kaha ki vah us haivaan kee taazeem men ek mujassma bana den jo talvaar say zakhmee honay kay baavujood dubaara zinda hua tha. ¹⁵phir usay pahelay haivaan kay mujassmay men jaan daalnay ka ikhtiyaar diya gaya taaki mujassma bol sakay aur unhen qatl karva sakay jo usay sijda karnay say inkaar kartay thay. ¹⁶us nay yah bhee karvaaya ki har ek kay dahenay haath ya maathay par ek khaas nishaan lagaaya jaaay, khwaah vah chhota ho ya bada, ameer ho ya ghareeb, aazaad ho ya ghulaam. ¹⁷sirf vah shakhs kuchh khareed ya bech sakta tha jis par yah nishaan laga tha. yah nishaan haivaan ka naam ya us kay naam ka nambar tha.

¹⁸yahaan hikmat kee zaroorat hai. jo samajhdaar hai vah haivaan kay nambar ka hisaab karay, kyoonki yah ek mard ka nambar hai. us ka nambar 666 hai.