Mukaashfa 12

khaatoon aur ajhdahaa

¹phir aasmaan par ek azeem nishaan zaahir hua, ek khaatoon jis ka libaas sooraj tha. us kay paaon talay chaand aur sar par baarah sitaaron ka taaj tha. ²us ka paaon bhaaree tha, aur janm denay kay shadeed dard men mubtala honay kee vajah say vah chilla rahee thee.

³phir aasmaan par ek aur nishaan nazar aaya, ek bada aur aag jaisa surkh ajhdaha. us kay saat sar aur das seeng thay, aur har sar par ek taaj tha. ⁴us kee dum nay sitaaron kay teesray hissay ko aasmaan par say utaar kar zameen par phaink diya. phir ajhdaha janm denay vaalee khaatoon kay saamnay khada hua taaki us bachchay ko janm letay hee hadap kar lay. ⁵khaatoon kay beta paida hua, vah bachcha jo lohay kay shaahee asa say qaumon par hukoomat karega. aur khaatoon kay is bachchay ko chheen kar allaah aur us kay takht kay saamnay laaya gaya. ⁶khaatoon khud registaan men hijrat karkay ek aisee jagah pahunch gaee jo allaah nay us kay liyay tayyaar kar rakhee thee, taaki vahaan 1,260 din tak us kee parvarish kee jaaay.

⁷phir aasmaan par jang chhid gaee. meekaael aur us kay farishtay ajhdahay say laday. ajhdaha aur us kay farishtay un say ladtay rahay, ⁸lekin vah ghaalib na a sakay balki aasmaan par apnay maqaam say maheroom ho gaay. ⁹baday ajhdahay ko nikaal diya gaya, us qadeem ajhdahay ko jo iblees ya shaitaan kahelaata hai aur jo pooree duniya ko gumraah kar deta hai. usay us kay farishton samet zameen par phainka gaya.

¹⁰phir aasmaan par ek oonchee aavaaz sunaaee dee, “ab hamaaray khuda kee najaat, qudrat aur baadshaahee a gaee hai, ab us kay maseeh ka ikhtiyaar a gaya hai. kyoonki hamaaray bhaaiyon aur bahenon par ilzaam lagaanay vaala jo din raat allaah kay huzoor un par ilzaam lagaata raheta tha usay zameen par phainka gaya hai. ¹¹eemaandaar lelay kay khoon aur apnee gavaahee sunaanay kay zareeay hee us par ghaalib aaay hain. unhon nay apnee jaan azeez na rakhee balki usay denay tak tayyaar thay. ¹²chunaanchay khushee manaao, ai aasmaano! khushee manaao, un men basnay vaalo! lekin zameen aur samundar par afsos! kyoonki iblees tum par utar aaya hai. vah baday ghussay men hai, kyoonki vah jaanta hai ki ab us kay paas vaqt kam hai.”

¹³jab ajhdahay nay dekha ki usay zameen par gira diya gaya hai to vah us khaatoon kay peechhay pad gaya jis nay bachchay ko janm diya tha. ¹⁴lekin khaatoon ko baday uqaab kay say do par diay gaay taaki vah ud kar registaan men us jagah pahunchay jo us kay liyay tayyaar kee gaee thee aur jahaan vah saadhay teen saal tak ajhdahay kee pahunch say mahfooz rah kar parvarish paaegee. ¹⁵is par ajhdahay nay apnay munh say paanee nikaal kar darya kee soorat men khaatoon kay peechhay peechhay baha diya taaki usay baha lay jaaay. ¹⁶lekin zameen nay khaatoon kee madad karkay apna munh khol diya aur us darya ko nigal liya jo ajhdahay nay apnay munh say nikaal diya tha. ¹⁷phir ajhdahay ko khaatoon par ghussa aaya, aur vah us kee baaqee aulaad say jang karnay kay liyay chala gaya. (khaatoon kee aulaad vah hain jo allaah kay ahkaam pooray karkay eesa kee gavaahee ko qaaim rakhtay hain). ¹⁸aur ajhdaha samundar kay saahil par khada ho gaya.