Mukaashfa 11

do gavaah

¹mujhay gaz kee tarah ka sarkanda diya gaya aur bataaya gaya, “ja, allaah kay ghar aur qurbaangaah kee paimaaish kar. us men parastaaron kee taadaad bhee gin. ²lekin bairoonee sahen ko chhod day. usay mat naap, kyoonki usay ghaireemaandaaron ko diya gaya hai jo muqaddas shaher ko 42 maheenon tak kuchaltay rahengay. ³aur main apnay do gavaahon ko ikhtiyaar doonga, aur vah taat odh kar 1,260 dinon kay dauraan nubuvvat karengay.”

⁴yah do gavaah zaitoon kay vah do darakht aur vah do shamaadaan hain jo duniya kay aaqa kay saamnay khaday hain. ⁵agar koee unhen nuqsaan pahunchaana chaahay to un kay munh men say aag nikal kar un kay dushmanon ko bhasm kar detee hai. jo bhee unhen nuqsaan pahunchaana chaahay usay is tarah marna padta hai. ⁶in gavaahon ko aasmaan ko band rakhnay ka ikhtiyaar hai taaki jitna vaqt vah nubuvvat karen baarish na ho. unhen paanee ko khoon men badalnay aur zameen ko har qism kee aziyat pahunchaanay ka ikhtiyaar bhee hai. aur vah jitnee dafa jee chaahay yah kar saktay hain.

⁷un kee gavaahee ka muqarrara vaqt poora honay par athaah gadhay men say nikalnay vaala haivaan un say jang karna shuroo karega aur un par ghaalib a kar unhen maar daalega. ⁸un kee laashen us baday shaher kee sadak par padee rahengee jis ka alaamtee naam sadoom aur misr hai. vahaan un ka aaqa bhee masloob hua tha. ⁹aur saadhay teen dinon kay dauraan har ummat, qabeelay, zabaan aur qaum kay log in laashon ko ghoor kar dekhengay aur inhen dafan karnay naheen dengay. ¹⁰zameen kay baashinday un kee vajah say masroor hongay aur khushee mana kar ek doosray ko tuhfay bhejengay, kyoonki in do nabiyon nay zameen par rahenay vaalon ko kaafee eeza pahunchaaee thee. ¹¹lekin in saadhay teen dinon kay baad allaah nay un men zindagee ka dam phoonk diya, aur vah apnay paaon par khaday huay. jo unhen dekh rahay thay vah sakht dahshatzada huay. ¹²phir unhon nay aasmaan say ek oonchee aavaaz sunee jis nay un say kaha, “yahaan oopar aao!” aur un kay dushmanon kay dekhtay dekhtay donon ek baadal men aasmaan par chalay gaay. ¹³usee vaqt ek shadeed zalzla aaya aur shaher ka dasvaan hissa gir kar tabaah ho gaya. 7,000 afraad us kee zad men a kar mar gaay. bachay huay logon men dahshat phail gaee aur vah aasmaan kay khuda ko jalaal denay lagay.

¹⁴doosra afsos guzar gaya, lekin ab teesra afsos jald honay vaala hai.

saatvaan turam

¹⁵saatven farishtay nay apnay turam men phoonk maaree. is par aasmaan par say oonchee aavaazen sunaaee den jo kah rahee theen, “zameen kee baadshaahee hamaaray aaqa aur us kay maseeh kee ho gaee hai. vahee azal say abad tak hukoomat karega.” ¹⁶aur allaah kay takht kay saamnay baithay 24 buzurgon nay gir kar allaah ko sijda kiyaa ¹⁷aur kaha, “ai rabb qaadir-ay-mutlaq khuda, ham tera shukr kartay hain, too jo hai aur jo tha. kyoonki too apnee azeem qudrat ko kaam men la kar hukoomat karnay laga hai. ¹⁸qaumen ghussay men aaen to tera ghazab naazil hua. ab murdon kee adaalat karnay aur apnay khaadimon ko ajr denay ka vaqt a gaya hai. haan, teray nabiyon, muqaddaseen aur tera khauf maannay vaalon ko ajr milega, khwaah vah chhotay hon ya baday. ab vah vaqt bhee a gaya hai ki zameen ko tabaah karnay vaalon ko tabaah kiya jaaay.”

¹⁹aasmaan par allaah kay ghar ko khola gaya aur us men us kay ahd ka sandooq nazar aaya. bijlee chamaknay lagee, shor mach gaya, baadal garajnay aur baday baday olay padnay lagay.